Сәнин нөгсансызлығын Јеһованын гәлбини севиндирир
«Оғлум, һикмәтли ол, гој гәлбим севинсин, онда мәни утандырана ҹаваб верә биләрәм» (СҮЛ. МӘС. 27:11).
1, 2. а) «Әјјуб» китабында Шејтанын ирәли сүрдүјү һансы иттиһамдан бәһс едилир? б) Нәдән ҝөрүнүр ки, Шејтан Әјјубун ҝүнләриндән сонра да Јеһоваја истеһза етмәјә давам едир?
ЈЕҺОВА Шејтана садиг хидмәтчиси Әјјубун нөгсансызлығыны сынамаға изин верди. Нәтиҹәдә, о, мал-гарасындан, ушагларындан вә сағламлығындан мәһрум олду. Лакин Шејтан Әјјубун нөгсансызлығыны шүбһә алтына аларкән анҹаг ону нәзәрдә тутмурду. Шејтан: «Дәри әвәзинә дәри! Инсан ҹанына ҝөрә һәр шејини верәр»,— дејә бәјан етди. Бу сөзләрлә Шејтан башгаларына да тохунан бир суал галдырды. О, Әјјубун ҝүнләриндән индијәдәк инсанларын нөгсансызлығыны һәлә дә шүбһә алтына алмаға давам едир (Әјј. 2:4).
2 Әјјубун сынагларындан тәхминән 600 ил сонра Сүлејман Аллаһдан илһам алараг јазмышдыр: «Оғлум, һикмәтли ол, гој гәлбим севинсин, онда мәни утандырана ҹаваб верә биләрәм» (Сүл. мәс. 27:11). Ајдындыр ки, о вахт Шејтан һәлә дә Јеһованы иттиһам етмәјә давам едирди. Үстәлик, һәвари Јәһја алдығы ҝөрүнтүдә Аллаһын Падшаһлығынын 1914-ҹү илдә ҝөјдә гурулмасындан бир гәдәр сонра Шејтанын јерә атылдығыны вә Аллаһын хидмәтчиләрини иттиһам етдијини ҝөрдү. Бәли, һәтта бу ҝүн, бу пис систем артыг сона чатмаг үзрә олдуғу вахтда белә, Шејтан һәлә дә Аллаһын хидмәтчиләринин нөгсансызлығыны шүбһә алтына алыр! (Вәһј 12:10).
3. «Әјјуб» китабындан һансы ваҹиб дәрсләри өјрәнирик?
3 Ҝәлин «Әјјуб» китабындан өјрәндијимиз үч ваҹиб дәрси нәзәрдән кечирәк. Биринҹиси, Әјјубун сынаглары бәшәријјәтин әсил дүшмәнинин вә Аллаһын халгыны тәгиб едәнин ким олдуғуну ифша едир: бу дүшмән Шејтан Иблисдир. Икинҹиси, гаршылашдығымыз сынаглардан асылы олмајараг, Аллаһла сых мүнасибәт нөгсансызлығымызы горумаға көмәк едәҹәк. Үчүнҹүсү, әзаб-әзијјәтләрлә вә сынагларла үзләшәндә, Әјјуба јардым етдији кими, Аллаһ бизә дә јардым едир. Јеһова бу ҝүн буну Өз Кәламы, тәшкилаты вә мүгәддәс руһу васитәсилә едир.
Әсил дүшмәнин ким олдуғуну һеч вахт унутма
4. Дүнјада һөкм сүрән һазыркы вәзијјәтә ҝөрә ким мәсулијјәт дашыјыр?
4 Чохлары Шејтанын мөвҹудлуғуна инанмыр. Дүнјанын вәзијјәти инсанлары нараһат етсә дә, онлар бунун архасында дуранын Шејтан Иблис олдуғуну ҝөрмүрләр. Дүздүр, бәшәријјәтин бир чох бәдбәхтликләринә ҝөрә инсанларын өзләри мәсулијјәт дашыјыр. Улу валидејнләримиз Адәмлә Һәвва Јараданларындан асылы олмамағы сечдиләр. О вахтдан бәри бир-биринин ардынҹа ҝәлән нәсилләр чох дүшүнҹәсиз давранмышлар. Бунунла белә, Һәвваны Аллаһа гаршы үсјана тәһрик едән Иблис иди. Гејри-камил, фани бәшәријјәт арасында өз һакимијјәти алтында олан бир систем јарадан да мәһз о олуб. Шејтан «бу әсрин танрысы» олдуғу үчүн инсан ҹәмијјәти она хас олан тәкәббүрлүлүк, худбинлик, һәсәд, аҹҝөзлүк, јаланчылыг вә үсјанкарлыг кими хүсусијјәтләр тәзаһүр етдирир. (2 Кор. 4:4; 1 Тим. 2:14; 3:6; Јагуб 3:14, 15 ајәләрини оху.) Белә кејфијјәтләр бәшәријјәтин изтирабларыны даһа да артыран сијаси вә дини мүнагишәләрә, нифрәтә, коррупсијаја вә низамсызлыға ҝәтириб чыхармышдыр.
5. Малик олдуғумуз дәјәрли биликдән неҹә истифадә етмәк истәјирик?
5 Јеһованын хидмәтчиләри олан бизләр неҹә дә дәјәрли билијә маликик! Бәли, биз дүнјанын писләшмәсинә ҝөрә кимин ҝүнаһкар олдуғундан аҝаһыг. Мәҝәр бу бизи хидмәтдә инсанлара әсас фитнәкарын ким олдуғуну демәјә тәшвиг етмирми? Һәгиги Аллаһ олан Јеһованын тәрәфини тутмаг вә башгаларына Онун Шејтана вә бәшәријјәтин бәдбәхтликләринә неҹә сон гојаҹағыны данышмаг бизим үчүн севиндириҹи дејилми?
6, 7. а) Һәгиги мәсиһчиләрин үзләшдији тәгибләрә ҝөрә ким мәсулијјәт дашыјыр? б) Гәдимдә јашамыш Елиһунун нүмунәсини неҹә тәглид едә биләрик?
6 Шејтан тәкҹә дүнјанын бир чох изтирабларына ҝөрә дејил, һәм дә Аллаһын халгынын үзләшдији мүгавимәтләрә ҝөрә мәсулијјәт дашыјыр. О бизи имтаһана чәкмәјә гәти гәрарлыдыр. Иса Мәсиһ һәвари Петерә демишди: «Шимон, Шимон! Шејтан сизләри тәләб етди ки, буғда кими хәлбирләсин» (Лука 22:31). Ејнилә, Исанын изләри илә ҝедән һәр биримиз бу вә ја диҝәр сынагларла үзләшәҹәјик. Петер Иблиси «ашырмаг үчүн кимисә ахтаран аслан»а бәнзәтмишди. Павел исә демишди ки, «Аллаһ јолунда Мәсиһ Исаја бағлы олараг јашамаг истәјәнләрин һамысы да тәгибә мәруз галаҹагдыр» (1 Пет. 5:8; 2 Тим. 3:12).
7 Һәмиманлымызла фаҹиә баш верәндә әсил дүшмәнимизин ким олдуғуну јадда сахладығымызы неҹә ҝөстәрә биләрик? Әзијјәт чәкән гардашдан үз дөндәрмәк әвәзинә, биз Әјјубла әсил дост кими данышан Елиһуну тәглид едирик. Биз үмуми дүшмәнимиз олан Шејтана гаршы мүбаризәдә гардашымыза дајаг олуруг (Сүл. мәс. 3:27; 1 Салон. 5:25). Биздән нә гәдәр сәј тәләб олунурса-олунсун, мәгсәдимиз һәмиманлымыза нөгсансызлығыны горумаға көмәк етмәк вә бунунла да Јеһованын гәлбини севиндирмәкдир.
8. Нәјә ҝөрә Шејтан Әјјубу Јеһованы шәрәфләндирмәкдән чәкиндирә билмәди?
8 Шејтан илк нөвбәдә Әјјубун мал-гарасыны әлиндән алды. Бу һејванлар онун үчүн ваҹиб иди; ҝөрүнүр, о, аиләсини бунунла доландырырды. Анҹаг Әјјуб онлардан ибадәтдә дә истифадә едирди. Әјјуб өвладларыны тәгдис етдикдән сонра «еркән галхыб бүтүн өвладларынын сајына ҝөрә јандырма гурбаны тәгдим едәрди. Әјјуб “бәлкә өвладларым ҝүнаһа батараг үрәкләриндә Аллаһа ләнәт едибләр” дејә дүшүндүјүндән һәмишә белә едәрди» (Әјј. 1:4, 5). Ҝөрдүјүмүз кими, Әјјуб һејванлары мүнтәзәм олараг Јеһоваја гурбан ҝәтирирди. Амма сынаглары башлајанда бу артыг мүмкүн дејилди. Јеһованы шәрәфләндирмәк үчүн артыг Әјјубун ‘вар-дөвләти’ јох иди (Сүл. мәс. 3:9). Лакин онун Јеһованы өз додаглары илә шәрәфләндирмәк имканы варды. Әјјуб мәһз белә дә едирди!
Јеһова илә сых мүнасибәт гур
9. Малик олдуғумуз ән дәјәрли шеј нәдир?
9 Зәнҝин вә ја јохсул, ҹаван вә ја гоҹа, хәстә вә ја сағлам олмағымыздан асылы олмајараг, һәр биримиз Јеһова илә сых мүнасибәт гура биләрик. Һансы сынагларла үзләшириксә-үзләшәк, Јеһова илә сых мүнасибәтимиз олса, нөгсансызлығымызы горујаҹаг вә Онун гәлбини севиндирәҹәјик. Һәтта Мүгәддәс Китаб биликләри мәһдуд олан бәзи инсанлар ҹәсарәтли мөвге тутмуш вә нөгсансызлыгларыны горумаға мүвәффәг олмушлар.
10, 11. а) Нөгсансызлығы сынаглара мәруз галан бир баҹы онлара неҹә мүнасибәт ҝөстәрди? б) Бу баҹынын Шејтана вердији ҹаваб нә дәрәҹәдә ҝүҹлү иди?
10 Гарновскаја Валентина баҹынын нүмунәсинә нәзәр салаг. О, садиг Әјјуб кими, шиддәтли сынаглар гаршысында өз нөгсансызлығыны горујан бир чох русијалы Шаһидләрдән бири олмушдур. О, 1945-ҹи илдә тәхминән 20 јашларында оланда бир гардаш она тәблиғ етмишди. Бундан сонра онлар ҹәми ики дәфә Мүгәддәс Китаб һаггында сөһбәт етмишдиләр вә баҹы бир даһа ону ҝөрмәмишди. Буна бахмајараг, Валентина өз гоншуларына тәблиғ етмәјә башлады. Нәтиҹәдә о һәбс едилиб 8 иллик дүшәрҝә ҹәзасына мәһкум олунду. 1953-ҹү илдә азадлыға бурахылдыгдан дәрһал сонра тәблиғини давам етдирди. О, јенидән һәбс олунду, бу дәфә она он ил иш кәсилди. Дүшәрҝәләрин бириндә бир нечә ил кечирдикдән сонра ону башга дүшәрҝәјә кечирдиләр. Һәмин дүшәрҝәдә ҹәми бир Мүгәддәс Китаб нүсхәләри олан бир нечә баҹы варды. Бир ҝүн баҹылардан бири Валентинаја Мүгәддәс Китабы ҝөстәрди. Бу неҹә дә һәјәҹан долу бир ан иди! Тәсәввүр един, о, Мүгәддәс Китабы биринҹи вә ахырынҹы дәфә 1945-ҹи илдә она тәблиғ едән гардашын әлиндә ҝөрмүшдү!
11 Валентина 1967-ҹи илдә азадлыға бурахылды вә нәһајәт, Јеһоваја һәср олунмасыны суда вәфтизлә символизә едә билди. О, азадлығындан истифадә едәрәк 1969-ҹу иләдәк сәјлә хидмәт етди. Лакин һәмин ил о, јенидән һәбс олунду вә она 3 ил иш верилди. Буна бахмајараг, Валентина тәблиғини дајандырмырды. 2001-ҹи илдә һәјатыны баша вуранадәк о, 44 нәфәрә һәгигәти өјрәнмәјә көмәк етмишди. Валентина өмрүнүн 21 илини һәбсханаларда вә дүшәрҝәләрдә кечирди. О, нөгсансызлығыны горумаг үчүн һәр шејиндән, о ҹүмләдән азадлығындан белә имтина етмәјә һазыр иди. Һәјатынын сонуна јахына Валентина демишди: «Мәним һеч вахт өз евим олмајыб. Һәр шејими балаҹа бир чамадана јерләшдирмәк мүмкүн иди, буна бахмајараг, Јеһоваја хидмәтдән мәмнунлуг вә севинҹ дујурдум». Валентина инсанларын сынаглар алтында Аллаһа садиг галмајаҹагларыны иддиа едән Шејтана неҹә дә ҝүҹлү ҹаваб верди! (Әјј. 1:9-11). Биз онун Јеһованын гәлбини севиндирдијинә әмин ола биләрик. Шүбһә јохдур ки, Јеһова, Валентина да дахил олмагла, бүтүн садиг хидмәтчиләрини дирилдәҹәји вахты сәбирсизликлә ҝөзләјир (Әјј. 14:15).
12. Јеһова илә мүнасибәтимиздә мәһәббәт һансы ролу ојнајыр?
12 Јеһова илә достлуғумуз Она олан мәһәббәтимизә әсасланыр. Аллаһын хүсусијјәтләри бизи валеһ едир вә биз Онун ирадәсинә ујғун јашамаг үчүн әлимиздән ҝәләни едирик. Иблисин иддиаларына рәғмән биз Јеһованы үрәкдән вә гејдсиз-шәртсиз севирик. Дахилимиздән ҝәлән бу мәһәббәт сынагларла үзләшәндә нөгсансызлығымызы горумаг үчүн бизә ҝүҹ верир. Јеһова исә, Өз нөвбәсиндә, «мөминләрин јолларыны һифз едир» (Сүл. мәс. 2:8; Мәз. 97:10).
13. Јеһова Онун үчүн етдикләримизи неҹә гијмәтләндирир?
13 Мәһәббәт бизи, мәһдудијјәтләримиздән асылы олмајараг, Јеһованын адыны иззәтләндирмәјә тәшвиг едир. Аллаһ бизим јахшы мотивләримизи ҝөрүр вә әҝәр етмәк истәдикләримизин һамысыны едә билмириксә, О бизи мүһакимә етмир. Онун үчүн өнәмли олан јалныз ҝөрдүјүмүз ишләр јох, һәм дә онлары һансы сәбәбләрдән ирәли ҝәләрәк етмәјимиздир. Әјјуб кәдәр ичиндә олмасына вә бир чох сынаглара таб ҝәтирмәсинә бахмајараг, иттиһамчыларына Јеһованын јолларына олан мәһәббәти барәдә данышырды. (Әјјуб 10:12; 28:28 ајәләрини оху.) «Әјјуб» китабынын сонунҹу фәслиндә Аллаһ Елифаза, Билдада вә Софара гәзәбләндијини билдирди, чүнки онларын сөјләдикләри һәгигәт дејилди. Ејни заманда О, дөрд дәфә «гулум» Әјјуб демәклә вә она јаланчы тәсәлливериҹиләр үчүн дуа етмәји тапшырмагла ондан разы галдығыны билдирди (Әјј. 42:7-9). Ҝәлин һәмишә елә давранаг ки, Јеһова бизә дә лүтф ҝөстәрсин.
Јеһова Өз садиг хидмәтчиләринә көмәк едир
14. Јеһова Әјјуба дүшүнҹә тәрзини дәјишмәјә неҹә көмәк етди?
14 Әјјуб гејри-камил олса белә, нөгсансызлығыны горуду. Бәзән бөјүк тәзјигләр алтында о, јанлыш дүшүнҹә тәрзинә гапылырды. Мәсәлән, Әјјуб Јеһоваја демишди: «Сәнә јалварырам, ҹаваб вермирсән... Ҝүҹлү әлләринлә мәни әзирсән». Үстәлик, Әјјуб: «Мән шәр адам дејиләм» вә «залымлыг әлимдән ҝәлмир, Сәнә сәмимијјәтлә дуа едирәм»,— демәклә диггәти даһа чох өзүнә бәраәт газандырмаға јөнәлдирди (Әјј. 10:7; 16:17; 30:20, 21). Бунунла белә, Јеһова Әјјуба диггәтини өзүндән јајындырмаг үчүн бир сыра суаллар верәрәк хејирхаһлыгла она көмәк етди. Бу суалларын сајәсиндә Әјјуб һәм дә Аллаһын еһтишамыны вә инсанын Онунла мүгајисәјә ҝәлмәдијини даһа ајдын ҝөрдү. Әјјуб мәсләһәтләри гәбул етди вә дүшүнҹә тәрзини дәјишди. (Әјјуб 40:8; 42:2, 6 ајәләрини оху.)
15, 16. Бу ҝүн Јеһова Өз хидмәтчиләринә нәјин васитәсилә көмәк едир?
15 Јеһова һәмчинин Өз хидмәтчиләринә сәмими, ајдын рәһбәрлик вә мәсләһәтләр верир. Үстәлик, биз бөјүк хејир-дуалара маликик. Мәсәлән, Иса Мәсиһ өз һәјатыны гурбан вермәклә ҝүнаһларымызын бағышланмасы үчүн әсас гојуб. Гејри-камиллијимизә бахмајараг, бу фидијә гурбанлығынын сајәсиндә Аллаһла јахын мүнасибәтләрә малик ола биләрик (Јаг. 4:8; 1 Јәһ. 2:1). Сынагларла үзләшәндә биз һәмчинин дуада Аллаһдан Өз мүгәддәс руһу илә бизә дәстәк олмасыны вә гүввә вермәсини хаһиш едирик. Бундан әлавә, әлимиздә там Мүгәддәс Китаб вар вә әҝәр биз ону охујуб үзәриндә дүшүнүрүксә, өзүмүзү иман сынагларына һазырламыш олуруг. Өјрәнмә бизә Аллаһын али һөкмранлығына вә шәхси нөгсансызлығымыза даир галдырылан мәсәләләри баша дүшмәјә көмәк едир.
16 Бундан әлавә, Јеһованын «садиг вә ағыллы гул» васитәсилә руһани гида илә тәмин етдији үмумдүнја гардашлығынын бир үзвү олмаг бизә бөјүк фајда ҝәтирир (Мат. 24:45-47). Јеһованын Шаһидләринин тәхминән 100 000 јығынҹағынын һәр бириндә өјүд-нәсиһәт алыр вә иман сынаглары гаршысында мөһкәмләнирик. Буна Алманијада јашајан јенијетмә Шејланын нүмунәсини мисал ҝәтирмәк олар.
17. Јеһованын тәшкилатынын бу ҝүн вердији тәлимә дәгиг риајәт етмәјин мүдриклик олдуғуну ҝөстәрән нүмунә данышын.
17 Бир ҝүн мәктәбдә Шејланын синфи нәзарәтсиз галмышды. Онун синиф јолдашлары спиритик сеансларда истифадә едилән әлифба лөвһәҹијинин көмәји илә фала бахмаг гәрарына ҝәлдиләр. Шејла дәрһал синфи тәрк етди вә сонра орада нә баш вердијини ешидәндә бу ҹүр даврандығына севинди. Һәмин вахт шаҝирдләрдән бәзиләри ҹинләрин орада олдуғуну һисс едиб тәлаш ичиндә синифдән гачмышдылар. Бәс Шејлаја дәрһал синфи тәрк етмәк гәрарыны гәбул етмәјә нә көмәк етди? О дејир: «Бу әһвалатдан бир гәдәр әввәл Падшаһлыг Залында әлифба лөвһәҹијинин тәһлүкәси барәдә данышылмышды. Буна ҝөрә дә нә етмәк лазым олдуғуну билирдим. Мән, Сүлејманын мәсәлләри 27:11 ајәсиндә јазылдығы кими, Јеһованы севиндирмәк истәјирдим». Нә јахшы ки, Шејла һәмин ҝөрүшдә иштирак едиб програма диггәтлә гулаг асмышды!
18. Шәхсән сән нә етмәјә гәрарлысан?
18 Ҝәлин һәр биримиз Аллаһын тәшкилатынын вердији рәһбәрлијә дәгиг риајәт етмәјә гәти гәрарлы олаг. Биз јығынҹаг ҝөрүшләринә мүнтәзәм олараг ҝәлмәклә, Мүгәддәс Китабы вә она әсасланан нәшрләри охумагла, дуа етмәклә вә јеткин мәсиһчиләрлә достлуг етмәклә лазым олан рәһбәрлији вә көмәји алырыг. Јеһова бизим гәләбә чалмағымызы истәјир вә О әминдир ки, биз садиглијимизи горујаҹағыг. Јеһованын адыны иззәтләндирмәк, нөгсансызлығымызы горумаг вә Онун гәлбини севиндирмәк неҹә дә бөјүк шәрәфдир!
Јадыныздадырмы?
• Шејтан һансы вәзијјәтә вә сынаглара ҝөрә ҹавабдеһдир?
• Малик олдуғумуз ән дәјәрли шеј нәдир?
• Јеһова илә достлуғумуз нәјә әсасланыр?
• Јеһованын бу ҝүн бизә көмәк етдији үсуллардан бәзиләри һансылардыр?
[8-ҹи сәһифәдәки шәкил]
Малик олдуғун дәјәрли биликләри башгалары илә бөлүшмәк истәјин вармы?
[9-ҹу сәһифәдәки шәкил]
Биз һәмиманлыларымыза нөгсансызлыгларыны горумаға көмәк едә биләрик
[10-ҹу сәһифәдәки шәкил]
Валентина нөгсансызлығыны горумаг үчүн һәр шејиндән кечмәјә һазыр иди