Охуҹуларын суаллары

Ана бәтниндә өлән ушаг үчүн дирилмәјә үмид вармы?

Ушағы дүшән вә ја өлү доғулан инсанларын һиссләрини белә бир итки илә үзләшмәјән инсанлара баша дүшмәк чәтин ола биләр. Бәзи валидејнләр үчүн белә иткијә таб ҝәтирмәк дөзүлмәз олур. Мисал үчүн, бир ана беш ушағыны өлү доғмуш вә ја салмышдыр. Бир мүддәтдән сонра о, ики сағлам оғлан ушағы дүнјаја ҝәтирмиш вә боја-баша чатдырмышдыр. Бунунла белә, о, өмрүнүн сонунадәк итирдији ушагларынын һеч бирини унуда билмәмишди. О, һәмишә отуруб өлү доғдуғу вә салдығы ушагларынын, өлмәјиб сағ галсајдылар, нечә јашлары олаҹағы барәдә дүшүнәрди. Белә мәсиһчиләрин дирилмәјә үмид етмәк үчүн әсаслары вармы?

Биз бу суалын дәгиг ҹавабыны билмирик. Мүгәддәс Китабда дүшән, јахуд да өлү доғулан ушагларын дирилмәси һаггында бирбаша һеч нә дејилмир. Анҹаг Аллаһын Кәламында бу мәсәләјә даир бизә мүәјјән дәрәҹәдә тәсәлли верә биләҹәк принсипләр вар.

Ҝәлин бир-бири илә әлагәли олан ики суалы нәзәрдән кечирәк. Биринҹиси, Јеһованын нөгтеји-нәзәринҹә, инсанын һәјаты нә заман башлајыр: ана бәтнинә дүшән андан, јохса доғулан заман? Икинҹиси, Јеһова һәлә дүнјаја ҝәлмәмиш көрпәни тәкраролунмаз бир шәхсијјәт, јохса ана бәтниндәки һүҹејрәләр вә тохумалар топлусу һесаб едир? Мүгәддәс Китаб принсипләри һәр ики суала ајдын ҹаваб верир.

Мусанын Ганунунда ајдын дејилирди ки, һәјат ушаг анадан олан заман јох, ондан чох өнҹә башлајыр. Нә үчүн белә демәк олар? Ганунда дејилирди ки, һәлә дүнјаја ҝөз ачмамыш көрпәнин өлүмүнә сәбәб олан адам өлдүрүлмәлидир. Орада охујуруг: «Адамлар далашанда һамилә гадына вурарларса вә о, вахтындан әввәл доғарса, анҹаг өлүмлә нәтиҹәләнән һадисә баш вермәзсә, тәгсиркар адам гадынын әринин тәләб етдији мәбләғи верәрәк зәрәрин әвәзини мүтләг өдәмәлидир; вә о, буну һакимләр васитәсилә вермәлидир. Анҹаг әҝәр өлүмлә нәтиҹәләнән бәдбәхт һадисә баш верәрсә, сән ҹан әвәзинә ҹан вермәлисән»a (Чых. 21:22, 23, ЈД). Демәли, гадынын бәтниндәки доғулмамыш ушаг ҹанлы шәхсијјәт сајылыр. Бу данылмаз һәгигәти баша дүшмәјин сајәсиндә милјонларла мәсиһчиләр абортун Аллаһа гаршы ҹидди ҝүнаһ олдуғуну дәрк едәрәк ондан имтина етмишләр.

Нәзәрә алсаг ки, ана бәтниндәки ушаг ҹанлыдыр, онда бәс Јеһова бу һәјаты нә дәрәҹәдә гијмәтләндирир? Јухарыда ситат ҝәтирилән гануна әсасән, доғулмамыш ушағын өлүмүнә сәбәб олан инсана өлүм ҹәзасы кәсилмәли иди. Бурадан ајдын ҝөрүрүк ки, ана бәтниндәки ушағын һәјаты Аллаһын ҝөзүндә олдугҹа дәјәрлидир. Үстәлик, Мүгәддәс Јазыларда Јеһованын доғулмамыш ушағы фәрд кими гијмәтләндирдијини ҝөстәрән бир чох ајәләр вар. Мәсәлән, Давуд падшаһ Аллаһдан илһам алараг Онун һаггында нөвбәти сөзләри демишди: «Мәнә ана бәтниндән гурулуш вермисән. [...] ...Ҝөзләрин һәтта рүшејмими ҝөрүб, онун бүтүн һиссәләри, әмәлә ҝәлдикләри ҝүнләр, онларын һеч бири һәлә јох икән, Сәнин китабында јазылмышды» (Мәз. 139:13-15, 16, ЈД; Әјј. 31:14, 15).

Јеһова һәмчинин ана бәтниндәки ушағын сәҹијјәви хүсусијјәтләрини вә онун бөјүк имканлара малик ола биләҹәјини ҝөрүр. Исһагын арвады Ривга әкизләрә һамилә галанда Јеһова онун бәтниндә чарпышан ики оғлан ушағы барәдә пејғәмбәрлик сөјләди вә бундан белә нәтиҹәјә ҝәлмәк олар ки, О онларын ҝәләҹәкдә бир чохларына тәсир едәҹәк сәҹијјәви хүсусијјәтләрини артыг ҝөрүрдү (Јар. 25:22, 23; Ром. 9:10-13).

Вәфтизчи Јәһјанын да һадисәси чох мараглыдыр. «Инҹилдә» дејилир: «Елизавет Мәрјәмин саламыны ешитдикдә ушаг онун бәтниндә динҝилдәди вә Елизавет Мүгәддәс Руһла долду» (Лука 1:41). Бу һадисәни тәсвир едәрәк һәким Лука дөлә вә јахуд тәзә анадан олмуш ушаға аид едилән јунан сөзүндән истифадә етмишдир. О, ахурда јатан көрпә Исаја истинад едәркән дә һәмин сөзү ишләтмишдир (Лука 2:12, 16; 18:15).

Бу фактлары нәзәрә алсаг, Мүгәддәс Китаб ана бәтниндә олан ушагла јениҹә дүнјаја ҝөз ачмыш көрпә арасында фәрг гојмаға әсас верирми? Ҝөрүнүр, јох. Бу да мүасир алимләрин кәшфләринә мүвафигдир. Мәсәлән, тәдгигатчылар ана бәтниндә олан көрпәнин дујма вә хариҹи гыҹыгландырмалара реаксија ҝөстәрмәк габилијјәтинә малик олдуғуну ашкар етмишләр. Буна ҝөрә дә, ҝәләҹәк ананын бәтниндә инкишаф едән көрпәсинә сых бағланмасы тәәҹҹүблү дејил.

Ушаглар инкишаф дөврүнүн мүхтәлиф мәрһәләләриндә дүнјаја ҝәлә биләрләр. Нүмунә үчүн: бир ана дүнјаја вахтындан тез ушаг ҝәтирир, анҹаг көрпә бир нечә ҝүндән сонра өлүр. Башга бир ана исә ушағыны доггуз ај бәтниндә ҝәздирдикдән сонра өлү доғур. Демәк олармы ки, биринҹи ана хош тәсадүф нәтиҹәсиндә вахтындан әввәл доғдуғуна ҝөрә дирилмәјә үмид едә биләр, о бири ана исә јох?

Јекунда демәк олар ки, Мүгәддәс Китаб инсан һәјатынын мајаланма заманы башладығыны вә Јеһованын ана бәтниндәки ушағы тәкраролунмаз вә дәјәрли бир фәрд кими гијмәтләндирдијини ачыг-ајдын өјрәдир. Бу Мүгәддәс Китаб һәгигәтләрини нәзәрә алараг, бәзиләри фикирләшә биләрләр ки, өлү доғулан ушаг үчүн дирилмә үмидинин олмадығыны иддиа етмәк һәмин һәгигәтләрә зиддир. Һәтта онлар дүшүнә биләрләр ки, белә иддиалар әсас етибарилә бу һәгигәтләрә әсаслан аборта даир Мүгәддәс Китаб мөвгејимизи сарсыдыр.

Кечмишдә бу журналда бәзи суаллар галдырылмышды вә ҝөрүнүр, бу суаллар доғулмамыш ушагларын дирилиб-дирилмәјәҹәјинә даир шүбһәләр ојатмышдыр. Мәсәлән, Аллаһ гисмән инкишаф етмиш рүшејми Ҹәннәтдә јенидән гадынын бәтнинә гајтараҹагмы? Амма бу мәсәләни јенидән арашдырдыгдан, дуа едәрәк үзәриндә дүшүндүкдән сонра Рәһбәрлик Шурасы гәнаәтә ҝәлмишдир ки, бу кими суал вә мүлаһизәләрин дирилмә үмиди илә һеч бир әлагәси јохдур. Иса демишдир: «Аллаһ үчүн һәр шеј мүмкүндүр» (Марк 10:27). Исанын өз нүмунәси бу сөзләрин һәгигилијини ҝөстәрир; онун һәјаты ҝөјләрдән ҝәнҹ бакирә гызын бәтнинә көчүрүлмүшдү. Әлбәттә, инсан нөгтеји-нәзәринҹә белә бир шеј әсла мүмкүн дејил.

Бәс бүтүн бунлар о демәкдирми ки, Мүгәддәс Китаб дүнјаја ҝәлмәјиб, өлән ушагларын дириләҹәјини өјрәдир? Бир даһа гејд етмәлијик ки, Мүгәддәс Китаб бу суала бирбаша ҹаваб вермир, буна ҝөрә дә бу мәсәләдә нәјисә гәти сурәтдә иддиа етмәк үчүн әсас јохдур. Бу сәбәбдән, ән јахшысы фәрзијјәләрдән гачмагдыр. Бир шеј ајдындыр: бу мәсәлә мәһәббәтли вә рәһмли Јеһова Аллаһын әлиндәдир (Мәз. 86:15). Онун өлүмүн вурдуғу зәрәри дирилмә васитәсилә арадан галдырмаг истәдијинә шүбһә јохдур (Әјј. 14:14, 15). Әмин ола биләрик ки, О, һәмишә дүзҝүн оланы едир. Аллаһ бу пис системдә јашадығымыз мүддәтдә алдығымыз бир чох јаралара шәфа верәҹәк вә О артыг Өз Оғлуна ‘иблисин әмәлләрини пуч етмәји’ тапшырыб (1 Јәһ. 3:8).

[Һашијә]

[13-ҹү сәһифәдәки шәкил]

Јеһова бүтүн јараларымыза шәфа верәҹәк