Касыблыг Аллаһын наразылығынынмы әламәтидир?
АЛЛАҺ гәдим исраиллиләрә демишди ки, онларын арасында касыб олмамалыдыр. Чүнки онлара верилән Ганунда касыбларын гајғысына галмаг, һәтта онларын борҹларыны бағышламагла бағлы әмрләр вар иди (Ганунун тәкрары 15:1—4, 7—10). Беләликлә, исраиллиләр арасында касыб олмамалы иди, чүнки Јеһова онлара хејир-дуа верәҹәјини вәд етмишди. Лакин бу хејир-дуаны алмалары Гануна табе олмаларындан асылы иди, исраиллиләр исә буну етмәдиләр.
Анҹаг бу о демәк дејил ки, әҝәр инсан касыбдырса, демәли, Аллаһы наразы салыб, јахуд да әксинә, әҝәр варлыдырса, демәли, Аллаһ ону хејир-дуаландырыб. Аллаһын бир чох садиг хидмәтчиләри јохсул олмушдур. Мәсәлән, Амос пејғәмбәр чобанлыг едән вә мөвсүми ишлә мәшғул олан касыб бир адам иди (Амос 1:1; 7:14). Исраилә аҹлыг үз верәндә Илјас пејғәмбәрин һәјаты јохсул дул гадынын гонагпәрвәрлијиндән асылы иди. Һәмин дул гадынын бир аз уну, бир аз да јағы вар иди. Аҹлыг дөврүндә ун вә јағ мөҹүзәви шәкилдә түкәнмәк билмирди. Һәмин вахт нә Илјас, нә дә гадын варланды, Јеһова онларын јалныз ән зәрури тәләбатларыны өдәјирди (1 Падшаһлар 17:8—16).
Тәсадүф нәтиҹәсиндә инсан һәр шејиндән мәһрум ола биләр. Һәрдән бәдбәхтлик вә ја хәстәлик нәтиҹәсиндә инсанлар мүвәггәти вә ја даими олараг әмәк габилијјәтләрини итирирләр. Өлүм кимиләрини јетим, кимиләрини дул гојур. Һәтта бу ҹүр бәдбәхтликләр белә, Аллаһын наразылығынын әламәти дејил. Наоми илә Рутун нүмунәси Јеһованын јохсулларын гајғысына нәвазишлә галдығына чох ҝөзәл нүмунәдир. Һәјат јолдашларыны итирдикдән сонра сон дәрәҹә јохсуллуг ичиндә јашасалар да, Јеһова Аллаһ онлара хејир-дуа верди вә мадди тәләбатларынын гајғысына галды (Рут 1:1—6; 2:2—12; 4:13—17).
Ајдындыр ки, јохсуллуг Аллаһын инсандан наразы олдуғуну ҝөстәрмир. Јеһова Аллаһа садиг галан инсанлар Давуд падшаһын сөзләринә инана биләрләр: «Ҝәнҹлијимдән гоҹалығымадәк салеһин тәрк едилдијини, нәслинин чөрәк үчүн диләндијини ҝөрмәмишәм» (Мәзмур 37:25).
[8-ҹи сәһифәдәки шәкил]
Касыб олмаларына бахмајараг, Аллаһ Наоми илә Рута хејир-дуа верир вә мәһәббәтлә онларын гајғысына галырды