Бирлик — һәгиги ибадәтин сәҹијјәви хүсусијјәти
«Сизи ағылдакы гојун-кечи кими бир јерә јығаҹағам» (МИК. 2:12).
1. Аллаһын мүдриклијини јаратдыгларындан неҹә ҝөрмәк олар?
«ЈА РӘББ, әмәлләрин чохдур! Һәр бирини мүдрикликлә етмисән, јаратдыгларын јер үзүнү долдуруб», — дејә мәзмурчу нида етмишди (Мәз. 104:24). Аллаһын мүдриклији һејрәтамиз вә олдугҹа мүрәккәб ҹанлы аләми тәшкил едән милјонларла биткиләрин, һәшәратларын, һејванларын вә микроорганизмләрин гаршылыглы әлагәсиндән ҝөрүнүр. Һәмчинин организмимиздәки бөјүк органлардан тутмуш һүҹејрәләримиздәки ән хырда һиссәҹикләрәдәк минләрлә мүхтәлиф системләрин бирҝә фәалијјәти бизим сағлам бир фәрд олмағымызы тәмин едир.
2. Он үчүнҹү сәһифәдә тәсвир олундуғу кими, нәјә ҝөрә мәсиһчиләр арасындакы бирлик башгалары үчүн әсил мөҹүзә иди?
2 Јеһова инсанлары бир-бириндән асылы шәкилдә јарадыб. Инсанлар хариҹи ҝөрүнүшләринә, хүсусијјәтләринә вә габилијјәтләринә ҝөрә бир-бириндән фәргләнирләр. Бундан әлавә, Аллаһ илк инсанлары Өз сурәтиндә јаратмышды. Онлара бәхш етдији хүсусијјәтләрин сајәсиндә бир-бирилә әмәкдашлыг едә вә бир-биринә етибар едә биләрдиләр (Јар. 1:27; 2:18). Лакин инди бәшәријјәт, үмуми ҝөтүрдүкдә, Аллаһдан узагдыр вә бу ҝүнәдәк бирлијә наил ола билмәјиб (1 Јәһ. 5:19). Буна ҝөрә дә еркән мәсиһчи јығынҹағынын Ефес гулларындан, нүфузлу јунан гадынларындан, зијалы јәһуди кишиләриндән вә кечмиш бүтпәрәстләрдән тәшкил олунмасыны нәзәрә алсаг, чох еһтимал ки, онларын арасындакы бирлик башгаларынын ҝөзүндә әсил мөҹүзә кими ҝөрүнүрдү (Һәв. иш. 13:1; 17:4; 1 Салон. 1:9; 1 Тим. 6:1).
3. Мүгәддәс Китабда һәгиги мәсиһчиләр арасындакы бирлик неҹә тәсвир олунур вә бу мәгаләдә биз һансы суаллары мүзакирә едәҹәјик?
3 Һәгиги ибадәтдә бирләшән инсанлар, бәдән үзвләри кими, бир-бирилә һәмаһәнҝ шәкилдә әмәкдашлыг едирләр. (1 Коринфлиләрә 12:12, 13 ајәләрини оху.) Бу мәгаләдә биз нөвбәти суаллары нәзәрдән кечирәҹәјик: һәгиги ибадәт инсанлары неҹә бирләшдирир? Нәјә ҝөрә бүтүн милләтләрдән олан милјонларла инсанлары бирләшдирмәјә јалныз Јеһова гадирдир? Бирлијә мане олан бәзи шејләр һансылардыр? Онларын өһдәсиндән ҝәлмәкдә Јеһова бизә неҹә көмәк едир? Вә нәһајәт, һәгиги мәсиһчиләр бу мәсәләдә Христиан дүнјасына мәнсуб оланлардан нә илә фәргләнирләр?
Һәгиги ибадәт инсанлары неҹә бирләшдирир?
4. Һәгиги ибадәт инсанлары неҹә бирләшдирир?
4 Һәгиги динә мәнсуб олан инсанлар баша дүшүрләр ки, һәр шеји јарадан Јеһовадыр; мәһз бу сәбәбдән Ону Каинатын тамһүгуглу Али Һөкмдары кими гәбул едирләр (Вәһј 4:11). Буна ҝөрә дә һәгиги мәсиһчиләр, мүхтәлиф өлкәләрдә вә фәргли шәраитләрдә јашамаларына бахмајараг, Јеһованын гојдуғу гајда-ганунлары вә ејни Мүгәддәс Китаб принсипләрини әлдә рәһбәр тутурлар. Аллаһын бүтүн һәгиги хидмәтчиләри мүвафиг олараг Она «Ата» дејә мүраҹиәт едирләр (Јешаја 64:8; Мат. 6:9). Беләликлә, онларын һамысы бир-бириләринә руһани мәнада баҹы-гардашдырлар вә мәзмурчунун тәсвир етдији ҝөзәл бирлик ичиндә јашамагдан һәзз алырлар. О демишди: «Нә јахшыдыр, нә хошдур гардаш олуб, бир јашамаг!» (Мәз. 133:1).
5. Һансы хүсусијјәтин сајәсиндә һәгиги мәсиһчиләрин арасында бирлик һөкм сүрүр?
5 Һәгиги мәсиһчиләр гејри-камил олсалар да, Аллаһа бирлик ичиндә ибадәт едирләр, чүнки онлар бир-бириләрини севмәји өјрәнмишләр. Онлара севмәји өјрәдән Јеһовадыр вә Ондан башга буну һеч ким едә билмәз. (1 Јәһја 4:7, 8 ајәләрини оху.) Онун Кәламында дејилир: «Дахилдән ҝәлән шәфгәти, һәмчинин хејирхаһлығы, тәвазөкарлығы, һәлимлији вә сәбири ҝејинин. Бир-биринизә гаршы һәмишә сәбирли олун, биринизин диҝәриндән шикајәти оларса, бир-биринизи үрәкдән бағышлајын. Јеһова сизи үрәкдән бағышладығы кими, сиз дә бир-биринизи үрәкдән бағышлајын. Бүтүн бунлардан зијадә, мәһәббәтә бүрүнүн, чүнки јалныз мәһәббәт инсанлар арасында камил бирлик јаратмаға гадирдир» (Колос. 3:12—14). Һәгиги мәсиһчиләри бирлијин камил бағы олан мәһәббәтдән танымаг олар. Мәҝәр бу бирлијин һәгиги ибадәтин сәҹијјәви хүсусијјәти олдуғуна шәхсән өзүн әмин олмамысан? (Јәһ. 13:35).
6. Падшаһлыг үмиди арамызда бирлијин һөкм сүрмәсинә неҹә тәсир едир?
6 Аллаһын һәгиги хидмәтчиләри арасында бирлијин олмасына тәсир едән амилләрдән бири дә Аллаһын Падшаһлығынын бәшәријјәтин јеҝанә үмид јери олдуғуну һесаб етмәләридир. Онлар билирләр ки, бу Падшаһлыг тезликлә инсан һакимијјәтини әвәз едәҹәк вә итаәткар бәшәријјәтә һәгиги вә әбәди сүлһ бәхш едәҹәк (Јешаја 11:4—9; Дан. 2:44). Мәсиһчиләр Исанын өз давамчылары һагда дедијинә ујғун јашајырлар. О демишди: «Онлар да мәним кими дүнјаја мәхсус дејилләр» (Јәһ. 17:16). Һәгиги мәсиһчиләр дүнјада ҝедән мүнагишәләрдә битәрәф мөвге тутурлар; онлар мүһарибә шәраитиндә јашасалар белә, араларындакы бирлији горујуб сахлајырлар.
Руһани рәһбәрлијин јеҝанә мәнбәји
7, 8. Мүгәддәс Китаба әсасланан рәһбәрлик арамызда бирлијин олмасына неҹә сәбәб олур?
7 Еркән мәсиһчиләрин арасында бирлијин мөвҹуд олмасына сәбәб рәһбәрлији ејни мәнбәдән алмалары иди. Онлар Јерусәлимдәки һәвариләрдән вә ағсаггаллардан ибарәт олан рәһбәрлик шурасы васитәсилә Исанын јығынҹаглара тәлим вә рәһбәрлик вердијини гәбул едирдиләр. Бу садиг кишиләрин вердији гәрарлар Аллаһын Кәламына әсасланыр вә онларын ҝөстәришләри сәјјар нәзарәтчиләр васитәсилә бир чох шәһәрләрдә јерләшән јығынҹаглара чатдырылырды. Бәзи нәзарәтчиләр барәдә Мүгәддәс Китабда дејилир: «Онлар шәһәрбәшәһәр ҝәзәрәк шаҝирдләрә Јерусәлимдәки һәвариләрин вә ағсаггалларын гәрарларыны чатдырыр, бу гәрарлара әмәл етмәји тапшырырдылар» (Һәв. иш. 15:6, 19—22; 16:4).
8 Ејнилә, бу ҝүн дә мәсһ олунмушлардан ибарәт олан Рәһбәрлик Шурасы бүтүн дүнјадакы јығынҹагларда бирлијин һөкм сүрмәси үчүн әлиндән ҝәләни әсирҝәмир. Бу шура бир чох дилләрдә руһани рәһбәрлик тәгдим едән нәшрләр дәрҹ едир. Бу руһани гида Аллаһын Кәламына әсасланыр. Бир сөзлә, бу рәһбәрлик инсандан јох, Јеһовадан ҝәлир (Јешаја 54:13).
9. Аллаһын бизә һәвалә етдији иш арамызда бирлијин олмасына неҹә көмәк едир?
9 Арамызда бирлијин һөкм сүрмәсиндә јығынҹаг ағсаггалларынын да пајы аз дејил; онлар тәблиғ ишиндә рәһбәрлији өз үзәрләринә ҝөтүрүрләр. Аллаһа бирликдә хидмәт едән инсанлары бирләшдирән әмәкдашлыг руһу садәҹә сөһбәт етмәк үчүн бир араја ҝәлән инсанлар арасындакы мүнасибәтдән даһа ҝүҹлүдүр. Мәсиһчи јығынҹағы инсанларын асудә вахтларыны бир јердә кечирмәк үчүн топлашдыглары јер дејил. О, Јеһованын адыны уҹалтмаг, хош хәбәри тәблиғ етмәк, шаҝирд һазырламаг, еләҹә дә јығынҹаг үзвләрини мөһкәмләндирмәк мәгсәдилә тәсис олунуб (Ром. 1:11, 12; 1 Салон. 5:11; Ибр. 10:24, 25). Елә буна ҝөрә дә һәвари Павел мәсиһчиләр һаггында демишди: ‘Јекдиллик ичиндә мәтанәтлә дурараг хош хәбәрә ҝәтирдијиниз иман уғрунда чијин-чијинә мүбаризә апарырсыныз’ (Филип. 1:27).
10. Јеһованын халгы олан бизләри нәләр бирләшдирир?
10 Беләликлә, Јеһованын халгы олан бизләри баҹы-гардашларымыза мәһәббәт, Аллаһын Падшаһлығына үмид, арамызда рәһбәрлији өз үзәринә ҝөтүрәнләрә һөрмәт, о ҹүмләдән Аллаһын һөкмранлығыны гәбул етмәјимиз бирләшдирир. Үстәлик, Јеһова бизә мәнфи хүсусијјәтләрин өһдәсиндән ҝәлмәјә дә көмәк едир. Әкс тәгдирдә, гејри-камил олдуғумуз үчүн бу хүсусијјәтләр арамыздакы бирлијә хәләл ҝәтирә биләр (Ром. 12:2).
Тәкәббүрә вә пахыллыға гаршы дур!
11. Нәјә ҝөрә тәкәббүр инсанлары бир-бириндән ајырыр вә онун өһдәсиндән ҝәлмәкдә Јеһова бизә неҹә көмәк едир?
11 Тәкәббүр инсанлары бир-бириндән ајырыр. Тәкәббүрлү инсан башгаларына јухарыдан ашағы бахыр вә адәтән, өјүнмәкдән зөвг алыр. Лакин чох вахт бу, бирлијин позулмасына ҝәтириб чыхарыр, чүнки киминсә ловғаландығыны ҝөрән инсанын үрәјиндә пахыллыг һисси јарана биләр. Исанын шаҝирдләриндән бири олан Јагуб ачыг-ајдын демишди: «Бу ҹүр гүрур чох писдир» (Јаг. 4:16). Башгаларына јухарыдан ашағы бахмаг һеч дә мәһәббәтин тәзаһүрү дејил. Чох мараглыдыр ки, гејри-камил олсаг да, Јеһова бизимлә бу ҹүр давранмыр. Давуд јазырды: «Етдијин көмәклә Сән мәни јүксәлтдин» (2 Шам. 22:36). Орижинал мәтнә әсасән, бурада «көмәк» кими тәрҹүмә олунан ибрани сөзү алтында Јеһованын тәкәббүрлү олмамасы нәзәрдә тутулур. Аллаһын Кәламы бизә дүзҝүн шәкилдә мүлаһизә јүрүтмәји өјрәтмәклә тәкәббүр үзәриндә гәләбә чалмаға көмәк едир. Һәвари Павел Аллаһдан илһам алараг коринфлиләрә јаздығы мәктубунда сорушур: «Сәни башгаларындан фәргләндирән нәдир? Мәҝәр Аллаһ сәндән нә исә әсирҝәјиб? Әҝәр әсирҝәмәјибсә, онда нијә бунлары Аллаһдан алдығыны унудуб ловғаланырсан?» (1 Кор. 4:7).
12, 13. а) Нәјә ҝөрә пахыллыг үрәјимиздә асанлыгла баш галдыра биләр? б) Башгаларына Јеһованын ҝөзү илә бахмағын фајдасы нәдир?
12 Бирлији позан шејләрдән бири дә пахыллыгдыр. Гејри-камиллији мирас алдығымыз үчүн һәр биримизин дахилиндә «пахыллыг руһу» вар. Һәтта узун илләр Јеһоваја хидмәт едән мәсиһчиләр белә бәзән башгаларынын шәраитинә, мал-мүлкүнә, мәсулијјәтләринә, јахуд да габилијјәтләринә һәсәд апара биләрләр (Јаг. 4:5). Мәсәлән, аиләли бир гардаш таммүддәтли хидмәт едән гардашын малик олдуғу мәсулијјәтләри ҝөрүб она пахыллыг едә биләр. Һалбуки о, ағлына белә ҝәтирмир ки, таммүддәтли хидмәтчи дә аиләси вә ушаглары олан гардаша һәсәд апара биләр. Пахыллыг бирлијимизи позмасын дејә нә едә биләрик?
13 Артыг гејд олундуғу кими, Мүгәддәс Китабда мәсиһчи јығынҹағынын мәсһ олунмуш үзвләри бәдән үзвләри илә мүгајисә олунур. Буну јадда сахламаг бизә пахыллыгдан гачынмаға көмәк едәҹәк. (1 Коринфлиләрә 12:14—18 ајәләрини оху.) Мәсәлән, ҝөздән фәргли олараг, үрәји ҝөрмәсәк дә, онларын һәр икиси бизим үчүн ваҹибдир. Буна бәнзәр тәрздә, јығынҹағын бәзи үзвләри һәрдән башгаларына нисбәтән даһа чох нәзәрә чарпса да, Јеһова һәр бир мәсиһчини гијмәтләндирир. Буна ҝөрә дә ҝәлин гардашларымыза Јеһованын ҝөзү илә бахаг! Башгаларына пахыллыг етмәкдәнсә, ҝәлин онлара гајғы ҝөстәрәк вә онларла јахындан марагланаг! Онда һәгиги мәсиһчиләрлә Христиан дүнјасына мәнсуб оланлар арасындакы фәргин даһа ајдын ҝөрүнмәсиндә бизим дә пајымыз олаҹаг.
Парчаланма — Христиан аләминин сәҹијјәви хүсусијјәти
14, 15. Дөнүк христианлығы парчалајан нә олду?
14 Һәгиги мәсиһчиләр арасында бирлик һөкм сүрдүјү һалда, христиан килсәләри даим бир-бирилә чәкишир. Артыг дөрдүнҹү әсрдә дөнүк христианлыг о гәдәр ҝениш јајылмышды ки, бүтпәрәст Рома императору вәзијјәти әлә алараг онун инкишафына даһа бөјүк тәкан верди. Бундан сонра чохсајлы бөлүнмәләр нәтиҹәсиндә бир чох падшаһлыглар Ромадан ајрылараг өзләринин дөвләт килсәләрини јаратдылар.
15 Әсрләр боју бу падшаһлыгларын чоху арасында ҝедән мүһарибәләр сәнҝимәк билмәјиб. XVII—XVIII әсрләрдә Бөјүк Британија, Франса вә Бирләшмиш Штатлар өз вәтәндашларына вәтәнпәрвәрлик руһуну ашыламаға башлады вә бунун нәтиҹәси олараг милләтчилик дин шәклини алды. Артыг XIX—XX әсрләрдә милләтчилик әксәр инсанларын дүшүнҹәсинә һаким кәсилмишди. Нәтиҹәдә, христиан килсәләри милләтчилијә ҝөз јуман чохсајлы тәригәтләрә бөлүндү. Һәтта бу ҝүн дә христианлар башга өлкәдә јашајан һәмиманлыларына силаһ галдырырлар. Христиан дүнјасыны парчалајан гүввә мүхтәлиф тәригәтләрин тәлимләри вә милләтчиликдир.
16. Бу ҝүн Христиан аләмини парчалајан нәдир?
16 ХХ әсрдә јүзләрлә христиан тәригәтләри килсәләри бирләшдирмәк мәгсәдилә Екумен һәрәкатынын әсасыны гојду. Лакин чох илләр әрзиндә нә гәдәр чалышсалар да, ҝүҹләри јалныз бир нечә килсәни бирләшдирмәјә чатды. Килсә үзвләри тәкамүл, аборт, һомосексуализм вә гадынлара дини рүтбә верилмәси мәсәләләриндә һәлә дә ортаг мәхрәҹә ҝәлә билмирләр. Христиан дүнјасынын бәзи рәһбәрләри вахтилә мүбаһисә доғуран тәлимләрин маһијјәтини азалдараг мүхтәлиф тәригәтләри бирләшдирмәјә чалышырлар. Лакин бу, инсанларын иманыны сарсыдыр вә сөзсүз ки, парчаланмыш Христиан аләминин бирләшмәсинә хидмәт етмир.
Һәгиги ибадәт милләтчилик үзәриндә зәфәр чалыр
17. Пејғәмбәрликдә дејилдији кими, һәгиги ибадәт «ахыр заманда» инсанлары неҹә бирләшдирәҹәкди?
17 Һәлә һеч вахт бәшәријјәт бу дәрәҹәдә парчаланмамышдыр. Лакин бирлик һәгиги мәсиһчиләрин сәҹијјәви хүсусијјәти олараг галыр. Аллаһын пејғәмбәри Микеја габагҹадан демишди: «Сизи ағылдакы гојун-кечи кими бир јерә јығаҹағам» (Мик. 2:12). Микеја пејғәмбәрлик етмишди ки, һәгиги ибадәт диҝәр ибадәт формаларындан — истәр јаланчы аллаһлара, истәрсә дә дөвләтә ситајишдән јүксәкдә дураҹаг. О јазмышды: «Ахыр заманда Рәббин еви олан дағ дағларын зирвәсиндә мөһкәм дураҹаг, тәпәләрдән јухары уҹалаҹаг. Халглар она сары ҝәләҹәк. Бүтүн халглар, өз аллаһларынын ады илә ҝетсәләр белә, биз даим вә әбәди Аллаһымыз Рәббин ады илә ҝедирик» (Мик. 4:1, 5).
18. Һәгиги ибадәт бизә һансы дәјишикликләри етмәјә көмәк едиб?
18 Микеја һәмчинин һәгиги ибадәтин вахтилә бир-биринә дүшмән олан инсанлары неҹә бирләшдирәҹәјини дә тәсвир етмишди. «Чох милләтләр [милләтләрдән олан инсанлар] ҝәлиб дејәҹәк: “Ҝәлин Рәббин дағына, Јагубун Аллаһынын евинә галхаг, гој Рәбб бизә Өз јолларыны өјрәтсин, биз Онун ризләри илә ҝедәк”... Онлар гылынҹларындан котан, низәләриндән исә дәрјаз дүзәлдәҹәк. Милләт милләтә гаршы гылынҹ галдырмајаҹаг, артыг дава етмәји өјрәнмәјәҹәк» (Мик. 4:2, 3). Инсан әли илә дүзәлдилмиш аллаһлара ибадәт етмәкдән имтина едән вә милләтчилик руһундан азад олуб Јеһоваја хидмәт етмәјә башлајан бүтүн инсанлар арасында бирлик һөкм сүрүр. Аллаһ бу инсанлара бир-бирини севмәји өјрәдир.
19. Милјонларла инсанларын һәгиги ибадәтдә бирләшмәси нәјин сүбутудур?
19 Бу ҝүн бүтүн дүнјада јашајан һәгиги мәсиһчиләр арасында һөкм сүрән бирлијә даһа һеч бир јердә раст ҝәлмәк мүмкүн дејил. Бу ҝөстәрир ки, Јеһова Өз халгына мүгәддәс руһу васитәсилә рәһбәрлик етмәјә давам едир. Бәшәр тарихинин һәлә һеч бир чағында бүтүн милләтләрдән олан инсанлар арасында белә бирлик олмајыб. Бу, Вәһј 7:9 вә 14 ајәләриндә дејиләнләрин мөһтәшәм иҹрасыдыр вә бурада јазыланлар ҝөстәрир ки, Аллаһын мәләкләри тезликлә индики дүнјаны мәһв едәҹәк ‘күләкләри’ бурахаҹаглар. (Вәһј 7:1—4, 9, 10, 14 ајәләрини оху.) Мәҝәр араларында бирлик һөкм сүрән үмумдүнја гардашлығын бир һиссәси олмаг шәрәф дејил? Һәр биримиз бу бирлији мөһкәмләндирмәк үчүн нә едә биләрик? Бу суала ҹаваб нөвбәти мәгаләдә вериләҹәк.
Неҹә ҹаваб верәрдиниз?
• Һәгиги ибадәт инсанлары неҹә бирләшдирир?
• Пахыллыг бирлијимизә хәләл ҝәтирмәсин дејә нә едә биләрик?
• Нәјә ҝөрә милләтчилик Аллаһын һәгиги хидмәтчиләринин бирлијини позмаға гадир дејил?
[13-ҹү сәһифәдәки шәкил]
Еркән мәсиһчи јығынҹағы мүхтәлиф инсанлардан ибарәт иди
[15-ҹи сәһифәдәки шәкилләр]
Падшаһлыг Залларынын тикинтисиндә иштирак етмәк бирлијимизи неҹә мөһкәмләндирир?