«Бир Рәһбәриниз вар, о да Мәсиһдир»
«Өзүнүзү “рәһбәр” адландырмаға иҹазә вермәјин, чүнки бир Рәһбәриниз вар, о да Мәсиһдир» (МАТ. 23:9, 10).
1. Јеһованын Шаһидләринин гәбул етдикләри Рәһбәр кимдир вә нәјә ҝөрә?
БИР чох динләрин, еләҹә дә христиан килсәләринин чохлу башчылары вар. Мәсәлән, Рома папасы, патриарх, митрополит вә саирә. Анҹаг Јеһованын Шаһидләри һеч бир инсаны өз башчылары кими гәбул етмирләр. Онлар һансыса инсанын давамчысы вә ја шаҝирди дејилләр. Бу, Јеһованын Оғлу барәдә сөјләдији пејғәмбәрлијә ујғун ҝәлир. О демишди: «Будур, ону үммәтләрә шаһид, халглара башчы вә һөкмдар етдим» (Јешаја 55:4). Мәсһ олунмушлардан вә онларын әмәкдашлары олан ‘башга гојунлардан’ ибарәт үмумдүнја мәсиһчи јығынҹағынын үзвләри Јеһованын тәјин етдији рәһбәрдән башга һеч бир рәһбәр истәмирләр (Јәһ. 10:16). Онлар Исанын: «Бир Рәһбәриниз вар, о да Мәсиһдир», — сөзләринә шәрикдирләр (Мат. 23:10).
Исраилин сәмави Башчысы
2, 3. Аллаһын Оғлу Исраил халгынын рифаһы наминә нәләр едирди?
2 Мәсиһчи јығынҹағынын тәсис олунмасындан јүзилликләр әввәл Јеһова мәләкләрин арасындан Исраил халгы үзәринә башчы тәјин етмишди. Исраиллиләри Мисир әсарәтиндән азад едәндән сонра Јеһова онлара деди: «Будур, Мән јолда сизи горумаг вә һазырладығым јерә ҝәтирмәк үчүн гаршынызда бир Мәләк ҝөндәрирәм. Онун һүзурунда еһтијатлы олун вә сәсинә гулаг асын. Она гаршы үсјан галдырмајын, О, итаәтсизлијинизи бағышламаз, чүнки Мәним адым онун үзәриндәдир» (Чых. 23:20, 21). Үзәриндә Јеһованын ады олан һәмин мәләјин Аллаһын илкин Оғлу олдуғу гәнаәтинә ҝәлмәк мәнтигәујғундур.
3 Јер үзүндә инсан кими доғулмаздан өнҹә онун ады Микајыл иди. «Даниел» китабында о, Исраил халгынын ‘башчысы’ адланыр (Дан. 10:21). Исанын шаҝирдләриндән бири олан Јәһуда исә јазыр ки, Микајыл Даниелин ҝүнләриндән чох илләр өнҹә Исраил халгынын ишләри илә мәшғул олурду. Мусанын өлүмүндән сонра Шејтан онун ҹәсәдини өз мәнфур мәгсәдләри, еһтимал ки, Исраил халгыны бүтпәрәстлијә тәһрик етмәк үчүн истифадә етмәк истәјирди. Микајыл бунун гаршысыны алмаг мәгсәдилә ишә мүдахилә етди. Бу һагда Јәһуда јазыр: «Һәтта баш мәләк Микајыл Мусанын ҹәсәди барәсиндә Иблислә мүбаһисә едәндә ону тәһгирамиз сөзләрлә иттиһам етмәјә ҹүрәт етмәди, садәҹә деди: “Гој Јеһова сәни мәһкум етсин”» (Јәһуда 9). Јерихо шәһәрини мүһасирәјә алмаздан өнҹә Јешуанын гаршысында пејда олараг ону Јеһованын дәстәјинә әмин едән шәхс, шүбһәсиз, ‘Рәббин ордусунун башчысы’ олан Микајыл иди. (Јешуа 5:13—15 ајәләрини оху.) Гүдрәтли бир ҹин Даниел пејғәмбәрә ваҹиб хәбәри чатдырмаг үчүн ҝөндәрилән мәләјә мане олмаг истәјәндә баш мәләк Микајыл онун дадына чатды (Дан. 10:5—7, 12—14).
Вәд олунмуш Рәһбәр ҝәлир
4. Мәсиһлә бағлы һансы пејғәмбәрлик дејилмишди?
4 Бу һадисәдән әввәл Јеһованын тапшырығы илә Даниел пејғәмбәрин јанына ҝәлән Ҹәбрајыл мәләк она ‘мәсһ олунмуш һөкмдарын’ пејда олаҹағыны габагҹадан хәбәр вермишди (Дан. 9:21—25)a. Иса, бу пејғәмбәрликдә дејилдији кими, дүз вахтында, ерамызын 29-ҹу илинин пајызында Јәһја тәрәфиндән вәфтиз олунду. Мүгәддәс руһ онун үзәринә енәндә о, мәсһ олунмуш, јәни Мәсиһ олду (Мат. 3:13—17; Јәһ. 1:29—34; Галат. 4:4). О, тајы-бәрабәри олмајан Рәһбәр олаҹагды.
5. Иса јерүзү хидмәти заманы бир Рәһбәр кими һансы ишләри һәјата кечирирди?
5 Јер үзүндә хидмәтинә башлајан илк ҝүндән Иса ‘мәсһ олунмуш һөкмдар’ олдуғуну сүбут етди. Бир нечә ҝүнүн ичиндә о, өзүнә шаҝирд топламаға башлады вә илк мөҹүзәсини ҝөстәрди (Јәһ. 1:35—2:11). Иса Исраил торпағыны долашараг Падшаһлыг һаггында хош хәбәри тәблиғ едәндә шаҝирдләри дә онунла иди (Лука 8:1). Иса шаҝирдләринә тәблиғ етмәји өјрәдир, һәмчинин тәблиғ вә тәлим ишинә рәһбәрлик едәрәк онлара ҝөзәл нүмунә верирди (Лука 9:1—6). Мәсиһчи ағсаггаллар бу саһәдә ону тәглид етмәлидирләр.
6. Мәсиһ хејирхаһ Чобан вә Рәһбәр олдуғуну неҹә сүбут етди?
6 Иса өзүнү сүрүсүнү севән чобанла мүгајисә едәрәк рәһбәрлијинин диҝәр ҹәһәтини ҝөстәрди. Шәргдә чобанлар, һәгигәтән дә, сүрүләрини архаларынҹа апарырлар. Уилјам Томпсон «Торпаг вә Мүгәддәс Китаб» адлы китабында јазыр: «Чобан јалныз сүрүјә јол ҝөстәрмәк јох, јолун тәһлүкәсиз олдуғуна әмин олмаг үчүн дә сүрүнүн өнүндә ҝедир... О, чомағы илә гојунлары јөнәлдир, онлары јашыл јајлаглара апарыр вә јыртыҹы һејванлардан мүдафиә едир». Иса әсил Чобан вә Рәһбәр олдуғуну ҝөстәрәрәк демишди: «Мән хејирхаһ чобанам. Хејирхаһ чобан гојунлары уғрунда ҹаныны белә әсирҝәмир. Мәним гојунларым сәсимә гулаг асырлар, мән онлары таныјырам вә онлар мәним ардымҹа ҝәлирләр» (Јәһ. 10:11, 27). Бу сөзләрин тәсдиги олараг, Иса гојунлары уғрунда һәјатыны гурбан верди, анҹаг Јеһова ‘ону Өндәр вә Хиласкар кими јүксәлтди’ (Һәв. иш. 5:31; Ибр. 13:20).
Мәсиһчи јығынҹағынын нәзарәтчиси
7. Иса мәсиһчи јығынҹағыны неҹә идарә едир?
7 Ҝөјә галхмаздан бир аз әввәл дирилмиш Иса шаҝирдләринә деди: «Ҝөјдәки вә јердәки бүтүн һакимијјәт мәнә верилиб» (Мат. 28:18). Иса Јеһовадан алдығы мүгәддәс руһ васитәсилә өз шаҝирдләрини иманда мөһкәмләндирирди (Јәһ. 15:26). О, ерамызын 33-ҹү илинин Әллинҹи ҝүн бајрамында еркән давамчыларынын үзәринә бу руһдан төкдү (Һәв. иш. 2:33). Мәһз һәмин ҝүн мәсиһчи јығынҹағынын әсасы гојулду. Јеһова Өз Оғлуна јер үзүндәки бүтүн јығынҹаглара башчылыг етмәк сәлаһијјәти верди. (Ефеслиләрә 1:22; Колослулара 1:13, 18 ајәләрини оху.) Иса мәсиһчи јығынҹағыны Јеһованын мүгәддәс руһу вә табелијиндә олан мәләкләр васитәсилә идарә едир (1 Пет. 3:22).
8. Мәсиһ өз шаҝирдләринә рәһбәрлик вермәк үчүн биринҹи әсрдә јер үзүндә кимләрдән истифадә едирди вә бизим ҝүнләрдә кимләрдән истифадә едир?
8 Бундан әлавә, Мәсиһ мүгәддәс руһ васитәсилә бәзиләрини чобан, бәзиләрини исә мүәллим тәјин едәрәк јығынҹаға «инсанлар тимсалында һәдијјәләр» бәхш едир (Ефес. 4:8, 11). Һәвари Павел мәсиһчи нәзарәтчиләринә белә ҝөстәриш вермишди: «Өзүнүзә вә бүтүн сүрүјә фикир верин. Аллаһ сизи мүгәддәс руһ васитәсилә бу сүрүјә нәзарәт етмәк үчүн тәјин едиб ки, Аллаһын... јығынҹағыны отарасыныз» (Һәв. иш. 20:28). Мәсиһчи јығынҹағы тәзә јарананда нәзарәтчиләрин һамысы мәсһ олунмуш иди. Јерусәлим јығынҹағында хидмәт едән һәвариләр вә ағсаггаллар рәһбәрлик шурасыны тәшкил едирдиләр. Мәсиһ бу шуранын васитәсилә о вахт јер үзүндә јашајан бүтүн мәсһ олунмуш ‘гардашларыны’ идарә едирди (Ибр. 2:11; Һәв. иш. 16:4, 5). Бу сон ҝүнләрдә Мәсиһ «бүтүн әмлакынын», јәни Падшаһлығын јер үзүндәки ишләринин идарәсини «садиг вә ағыллы нөкәр»ә вә онун тәмсилчиси олан Рәһбәрлик Шурасына һәвалә едиб. Бу шура мәсһ олунмуш гардашлардан ибарәтдир (Мат. 24:45—47). Мәсһ олунмушлар вә онларын башга гојунлардан ибарәт әмәкдашлары дәрк едирләр ки, мүасир Рәһбәрлик Шурасынын ҝөстәришләринә риајәт етмәклә билаваситә Башчылары олан Мәсиһин рәһбәрлијинә риајәт етмиш олурлар.
Мәсиһ тәблиғ ишинин әсасыны гојур
9, 10. Мәсиһ Падшаһлыг һаггында хош хәбәрин тәблиғинә неҹә рәһбәрлик едирди?
9 Иса үмумдүнја тәблиғ вә тәлим ишинә лап башланғыҹдан шәхсән өзү нәзарәт едирди. О, Падшаһлыг һаггында хош хәбәрин јер үзүндәки инсанлара һансы ардыҹыллыгла чатдырылаҹағыны мүәјјән етмишди. Јер үзүндә оларкән Иса һәвариләринә белә бир тапшырыг вермишди: «Башга халгларын јанына апаран јола чыхмајын вә самаријалыларын шәһәрләринә ҝирмәјин. Јалныз Исраил евинин итмиш гојунларынын јанына ҝедин. Ҝетдијиниз јерләрдә: “Сәмави падшаһлыг јахынлашыб”, — дејәрәк тәблиғ един» (Мат. 10:5—7). Онлар хүсусилә дә ерамызын 33-ҹү илинин Әллинҹи ҝүн бајрамындан сонра Исанын бу ҝөстәришинә әсасән давранараг јәһудиләр вә прозелитләр арасында сәјлә тәблиғ етмәјә башладылар (Һәв. иш. 2:4, 5, 10, 11; 5:42; 6:7).
10 Сонралар Иса мүгәддәс руһун васитәсилә тәблиғ ишини ҝенишләндирәрәк шаҝирдләринә самаријалылара вә гејри-јәһудиләрә тәблиғ етмәк ҝөстәришини верди (Һәв. иш. 8:5, 6, 14—17; 10:19—22, 44, 45). Хош хәбәрин ҝәләҹәкдә башга халглар арасында бәјан едилмәси үчүн о, тарслы Шаулун мәсиһчи олмасына шәхсән гајғы ҝөстәрди. Иса шаҝирди Һананјаја ҝөстәриш верәрәк деди: «Дур, Дүз адланан күчәјә ҝет, Јәһуданын евиндә тарслы Шаул адында адамы тап... Ҝет, чүнки бу адам адымы милләтләрә, о ҹүмләдән һөкмдарлара вә Исраил оғулларына билдирмәк үчүн сечдијим аләтдир» (Һәв. иш. 9:3—6, 10, 11, 15). Һаггында данышылан «бу адам» сонралар һәвари Павел кими танынды (1 Тим. 2:7).
11. Мәсиһ мүгәддәс руһ васитәсилә тәблиғ ишини неҹә ҝенишләндирди?
11 Падшаһлыг һаггында хош хәбәри башга милләтләр арасында тәблиғ етмәјин вахты ҝәлиб чатанда мүгәддәс руһ Павели Кичик Асијада вә Авропада миссионер сәјаһәтинә башламаға тәшвиг етди. Лука «Һәвариләрин ишләри» китабында јазыр: «Онлар [Суријанын Антакја шәһәриндәки јығынҹағын пејғәмбәрләри вә мүәллимләри] оруҹ тутуб Јеһоваја хидмәт едән заман мүгәддәс руһ деди: “Барнаба вә Шаулу мәним үчүн ајырын. Мән онлары сечмишәм, онлара иш тапшыраҹағам”. Онлар оруҹ тутдулар, дуа етдиләр вә сонра әлләрини Барнаба илә Шаулун үзәринә гојуб јола салдылар» (Һәв. иш. 13:2, 3). Иса адыны милләтләрә билдирмәк үчүн тарслы Шаулу шәхсән өзү сечди. Демәли, тәблиғ ишинә јени тәкан верән шәхс јығынҹағын Башчысы олан Мәсиһ иди. Тәблиғ ишинә истигамәт вермәкдә Исанын мүгәддәс руһдан истифадә етмәси Павелин икинҹи миссионер сәјаһәти заманы өзүнү даһа ајдын ҝөстәрди. Мүгәддәс Китабда дејилир ки, «Иса руһ васитәсилә» Павелә вә онун әмәкдашларына тәблиғ етмәк үчүн јер сечмәкдә көмәк етди вә онлара ҝөрүнәрәк Авропаја јөнәлтди. (Һәвариләрин ишләри 16:6—10 ајәләрини оху.)
Иса јығынҹағына рәһбәрлик едир
12, 13. Мәсиһин һәр бир јығынҹагла јахындан марагландығыны «Вәһј» китабындан неҹә ҝөрмәк олар?
12 Иса ерамызын биринҹи әсриндәки мәсһ олунмушларын јығынҹагларында баш верәнләрә диггәтлә нәзарәт едирди. О, һәр бир јығынҹағын руһани вәзијјәтиндән аҝаһ иди. Буну «Вәһј» китабынын 2-ҹи вә 3-ҹү фәсилләриндән ҝөрмәк олар. Бу фәсилләрдә о, Кичик Асијада јерләшән једди јығынҹағын адыны чәкир (Вәһј 1:11). Биз әмин ола биләрик ки, Иса о вахт јер үзүндә олан диҝәр јығынҹагларын да вәзијјәти илә јахындан таныш иди. (Вәһј 2:23 ајәсини оху.)
13 Иса бәзи јығынҹаглары тәһәммүл ҝөстәрдикләринә, сынаглар заманы садиг галдыгларына, сөзүнә әмәл етдикләринә вә дөнүклүјә гаршы дурдугларына ҝөрә тәрифләди (Вәһј 2:2, 9, 13, 19; 3:8). Бунунла јанашы, о, бәзи јығынҹаглара бир нечә ҹидди мәсләһәт верди, чүнки она гаршы мәһәббәтләри сојумушду вә онлар бүтпәрәстлијә, әхлагсызлыға вә тәригәтчилијә ҝөз јумурдулар (Вәһј 2:4, 14, 15, 20; 3:15, 16). Иса јығынҹагларын руһани вәзијјәтинә мәһәббәтлә нәзарәт едән бир шәхс кими һамыја, һәтта ҹидди мәсләһәт вердији инсанлара белә бу сөзләри дејирди: «Мәнә әзиз олан адамлары мән мәзәммәт вә тәрбијә едирәм. Она ҝөрә дә гејрәтли ол вә төвбә ет» (Вәһј 3:19). Иса ҝөјдә олса да, јер үзүндәки јығынҹагларына мүгәддәс руһ васитәсилә нәзарәт едирди. О, бу јығынҹаглара мүраҹиәтинә белә јекун вурду: «Гулағы олан гој мүгәддәс руһун јығынҹаглара нә дедијини ешитсин» (Вәһј 3:22).
14-16. а) Иса Јеһованын јер үзүндәки халгынын ҹәсарәтли Рәһбәри олдуғуну неҹә ҝөстәрди? б) Исанын «дөврүн јекунуна кими» шаҝирдләри илә олмасы сајәсиндә һансы нәтиҹәләр әлдә едилди? в) Нөвбәти мәгаләдә нә мүзакирә олунаҹаг?
14 Ҝөрдүјүмүз кими, баш мәләк Микајыл (Иса) шүҹаәтли бир Башчы кими Исраил халгына рәһбәрлик едирди. Сонралар Иса еркән шаҝирдләринин гајғыкеш Чобаны вә ҹәсарәтли Рәһбәри олду. О, јер үзүндә хидмәт едәркән тәблиғ ишинә рәһбәрлик едирди. Дирилдикдән сонра исә Падшаһлыг һаггында хош хәбәрин бәјан едилмәсинә ҝөјдән нәзарәт етмәјә башлады.
15 Иса мүгәддәс руһ васитәсилә хош хәбәрин јерин уҹгарларынадәк тәблиғ олунмасынын гајғысына галаҹагды. Ҝөјә галхмаздан әввәл о, шаҝирдләринә демишди: «Мүгәддәс руһ үзәринизә ҝәләндә сиз гүввәт алаҹагсыныз вә Јерусәлимдә, бүтүн Јәһудеја вә Самаријада, һәтта јерин уҹгарларынадәк мәним шаһидим олаҹагсыныз». (Һәв. иш. 1:8; 1 Петер 1:12 ајәсини оху.) Бәли, биринҹи әсрдә Мәсиһин рәһбәрлији алтында мөһтәшәм шаһидлик верилмишди (Колос. 1:23).
16 Бунунла белә, Иса гејд етмишди ки, бу иш дөврүн сонунадәк давам едәҹәк. Давамчыларына милләтләр арасында тәблиғ етмәји вә шаҝирд һазырламағы тапшырандан сонра онлара белә бир вәд верди: «Мән бу дөврүн јекунуна кими һәмишә сизинләјәм» (Мат. 28:19, 20). Иса 1914-ҹү илдә Падшаһлыг тахтына чыхан ҝүндән етибарән шаҝирдләринә даһа чох көмәк едир вә рәһбәрлијини даһа фәал һәјата кечирир. Онун 1914-ҹү илдән бәри даһа да фәал олдуғуну нөвбәти мәгаләдә әтрафлы мүзакирә едәҹәјик.
[Һашијә]
a Бу пејғәмбәрлик барәдә әтрафлы мәлумат алмаг үчүн «Даниелин пејғәмбәрлијинә диггәт јетирин!» китабынын 11-ҹи фәслинә (рус.) бахын.
Тәкрар үчүн суаллар
• Аллаһын Оғлунун гәдим Исраил халгына фәал сурәтдә рәһбәрлик етдији һарадан билирик?
• Мәсиһ јер үзүндәки јығынҹаглара неҹә рәһбәрлик едир?
• Мәсиһ хош хәбәрин тәблиғинә индијәдәк неҹә нәзарәт едир?
• Мәсиһин һәр бир јығынҹағын руһани вәзијјәтинә диггәтлә нәзарәт етдијини һарадан билирик?
[21-ҹи сәһифәдәки шәкил]
«Гаршынызда бир Мәләк ҝөндәрирәм»
[23-ҹү сәһифәдәки шәкил]
Кечмишдә олдуғу кими, бу ҝүн дә Мәсиһ јығынҹағы «инсанлар тимсалында һәдијјәләр» олан нәзарәтчиләр васитәсилә идарә едир