Охуҹуларын суаллары
Јарадылыш 6:3 ајәсиндә јазылыб: «Мәним Руһум инсанда әбәди галмајаҹаг, чүнки онлар анҹаг бәдәндир. Онларын өмрү јүз ијирми ил олаҹаг». Бу сөзләри демәклә Јеһова инсан өмрүнүн максимум 120 ил олаҹағыны, јохса Нуһун Дашгын ҝәлмәздән өнҹә бу гәдәр вахт әрзиндә тәблиғ етмәли олдуғуну нәзәрдә тутурду?
Бу суалын һәр ики һиссәсинин ҹавабы «хејр»дир.
Дашгындан әввәл бәзи инсанлар јүзләрлә ил јашајыб. Дашгын башлајанда Нуһун 600 јашы вар иди, үмумиликдә исә о, 950 ил јашајыб (Јар. 7:6; 9:29). Дашгындан сонра да доғулан бәзи инсанларын өмрү 120 илдән чох олмушду. Мәсәлән, Арпакшад 438, Шелаһ исә 433 јашында вәфат етди (Јар. 11:10—15). Артыг Мусанын дөврүндә исә инсанлар, орта һесабла, 70—80 ил јашајырдылар (Мәз. 90:10). Беләликлә, Јарадылыш 6:3 ајәсиндә инсанын максимум 120 ил јашајаҹағы нәзәрдә тутулмур.
Бәс онда демәк олармы ки, бу ајәдә Аллаһ Нуһа 120 илә Дашгынын олаҹағы барәдә башгаларына хәбәрдарлыг етмәји тапшырыр? Хејр. Аллаһ Нуһла бир нечә дәфә сөһбәт едиб. Мәсәлән, 13-ҹү ајәдә бу сөһбәтләрин бири һаггында охујуруг: «Аллаһ Нуһа деди: “Өнүмдә олан бүтүн бәшәрин сону чатыб, чүнки јер үзү онларын зоракылығы илә долуб”». Нөвбәти илләр әрзиндә Нуһ ҝәми тикмәк кими бөјүк тапшырығы һәјата кечирди вә о заман «Рәбб Нуһа деди: “Сән бүтүн аиләнлә бирҝә ҝәмијә ҝир”» (Јар. 6:13; 7:1). Диҝәр һалларда да Јеһова Нуһа мүхтәлиф мәлуматлар вә ҝөстәришләр верирди (Јар. 8:15; 9:1, 8, 17).
Лакин Јарадылыш 6:3 ајәси башга ҹүр сәсләнир. Орада нә Нуһун ады чәкилир, нә дә ки Јеһованын она мүраҹиәт етдији дејилир. Бу ајәдә Аллаһ садәҹә олараг Өз нијјәтини вә ја гәрарыны ачыглајыр. (Јарадылыш 8:21 ајәси илә мүгајисә един.) Ону да гејд етмәк лазымдыр ки, Адәмин јарадылмасындан габагкы јарадылыш ҝүнләри тәсвир олунан Мүгәддәс Китаб парчасында дәфәләрлә «сонра Аллаһ деди» ифадәси истифадә олунур (Јар. 1:6, 9, 14, 20, 24). Ајдындыр ки, Јеһова һеч бир инсана мүраҹиәт етмирди, чүнки һәлә јер үзүндә инсан јарадылмамышды.
Буна ҝөрә дә белә бир нәтиҹәјә ҝәлмәк мәнтигәујғундур ки, Јарадылыш 6:3 ајәсиндә Аллаһ пис дүнјаны мәһв етмәк гәрары барәдә дејир. Јеһова гәрар верди ки, буну 120 илә етсин. Лакин о заман Нуһун бундан хәбәри јох иди. Бәс нәјә ҝөрә Јеһова вахт тәјин етди? Бу гәдәр ҝөзләмәјин мәнасы нә иди?
Һәвари Петер бунун сәбәбини изаһ едир: ‘Нуһун ҝүнләриндә ҝәми тикилиб гуртаранаҹан Аллаһ сәбирлә ҝөзләјирди. Һәмин ҝәмидә бир нечә адам, јәни сәккиз нәфәр судан сағ-саламат чыхмышды’ (1 Пет. 3:20). Бәли, Јеһова Јарадылыш 6:3 ајәсиндәки гәрары верәндә ҝөрүләси ишләр һәлә чох иди. Бундан тәхминән 20 ил сонра Нуһун өвладлары анадан олмаға башлады. Мүгәддәс Китабда дејилир: «Нуһун беш јүз јашы олду. Сонра онун Сам, Һам вә Јафәс адында оғуллары дүнјаја ҝәлди» (Јар. 5:32, ЈД; 7:6). Онлар бөјүјүб боја-баша чатдылар, аилә гурдулар вә беләликлә Нуһун аилә үзвләринин сајы «сәккиз нәфәр»ә чатды. Сонра онлар бирликдә ҝәми тикмәли идиләр; ҝәминин өлчүләрини вә Нуһун аилә үзвләринин сајыны нәзәрә алсаг, бу, бир ҝүнүн иши дејилди. Бәли, Аллаһын 120 ил сәбир етмәсинин сајәсиндә бу ишләрин һәјата кечирилмәси вә сәккиз нәфәр садиг инсанын ‘судан сағ-саламат чыхмасы’ мүмкүн олду.
Јеһова Нуһа Дашгынын олаҹағыны нечәнҹи илдә хәбәр верди? Мүгәддәс Китабда бу һагда һеч нә дејилмир. Нуһун оғулларынын доғулдуғуну вә бөјүјүб аилә гурдугларыны нәзәрә алсаг, чох еһтимал ки, Дашгына һәлә 40—50 ил галырды. Бундан сонра Аллаһ Нуһа деди: «Өнүмдә олан бүтүн бәшәрин сону чатыб». Һәмчинин Аллаһ Нуһа бөјүк ҝәми тикиб аиләси илә бирҝә ичинә ҝирмәји әмр етди (Јар. 6:13—18). Галан онилликләр әрзиндә Нуһ нәинки салеһ һәјат тәрзи сүрәрәк нүмунә гојмалы иди, һәмчинин «салеһлик тәблиғчиси» кими, Аллаһын позғун инсанлары мәһв етмәк гәрарыны бәјан етмәли иди. Нуһ Дашгынын нә вахт ҝәләҹәјини габагҹадан билмирди, лакин о, бунун баш верәҹәјинә зәррә гәдәр дә олсун шүбһә етмирди. Билдијимиз кими, Дашгынын сулары, һәгигәтән дә, јер үзүнү бүрүдү (2 Пет. 2:5).