Охуҹуларымыз сорушур...
Ҹәннәтдә әбәди һәјат дарыхдырыҹы олаҹагмы?
▪ Мүгәддәс Китабда јерүзү Ҹәннәтдә әбәди јашамаг үмидиндән бәһс олунур (Мәзмур 37:29; Лука 23:43). Бәс мүкәммәл мүһитдә сонсуз һәјат дарыхдырыҹы олаҹагмы?
Бу, диггәтәлајиг суалдыр. Арашдырмалар ҝөстәриб ки, һәјат узун мүддәт дарыхдырыҹы оларса, бу, нараһатчылыға вә депрессијаја сәбәб ола биләр, һәтта инсаны һәјатыны рискә атмаға тәһрик едә биләр. Һәјатда һеч бир мәгсәди олмајан вә һәр ҝүн ејни ишләри ҝөрмәкдән тәнҝә ҝәлән инсанлар үчүн һәјат дарыхдырыҹы олмаға башлаја биләр. Ҹәннәтдә һәјат мәнасыз вә ҹансыхыҹы олаҹагмы?
Илк нөвбәдә, диггәт јетирин ки, әбәди һәјаты тәклиф едән Мүгәддәс Китабын мүәллифи Јеһова Аллаһдыр (Јәһја 3:16; 2 Тимотејә 3:16). Аллаһын әсас хүсусијјәти мәһәббәтдир (1 Јәһја 4:8). Јеһова бизи чох севир вә һәјатда малик олдуғумуз јахшы шејләрин һамысы Онун һәдијјәсидир (Јагуб 1:17).
Јараданымыз билир ки, хошбәхт олмағымыз үчүн биз зөвг верән бир ишлә мәшғул олмалыјыг (Мәзмур 139:14—16; Ваиз 3:12). Ҹәннәтдә һеч ким өзүнүн лазымсыз вә ҝөрдүјү ишин әһәмијјәтсиз олдуғуну дүшүнмәјәҹәк. Һәр кәсин ҝөрдүјү иш һәм өзүнә, һәм дә башгаларына фајда ҝәтирәҹәк (Јешаја 65:22—24). Әҝәр һәр ҝүн севинҹ ҝәтирән вә мараглы бир ишлә мәшғул олсајдыныз, һәјат сизә дарыхдырыҹы ҝәләрдими?
Еләҹә дә, Јеһова Аллаһ Ҹәннәтдә һәр кәсин јашамасына јол вермәјәҹәк. О, әбәди һәјат әнамыны јалныз Онун Оғлу Иса Мәсиһин изләри илә ҝедәнләрә бәхш едәҹәк (Јәһја 17:3). Иса јер үзүндә оланда Атасынын ирадәсини јеринә јетирмәкдән зөвг алырды. О, сөзләри вә әмәлләри илә давамчыларына өјрәдирди ки, вермәк алмагдан даһа чох хошбәхтлик ҝәтирир (Һәвариләрин ишләри 20:35). Бәрпа олунмуш Ҹәннәтдә бүтүн инсанлар Мүгәддәс Китабын ики ән бөјүк әмринә — «Аллаһы вә јахыныны сев» әмринә ујғун јашајаҹаг (Матта 22:36—40). Өзүнүзү сизи вә өз ишләрини севән инсанларын арасында тәсәввүр един! Белә инсанларын әһатәсиндә адам һеч дарыхар?!
Бәс Ҹәннәтдә даһа нәләр олаҹаг? Јараданымыз һаггында һәр ҝүн јени шејләр өјрәнәҹәјик. Алимләр Јеһованын јаратдыглары һаггында артыг бир чох мараглы шејләр өјрәнмишләр (Ромалылара 1:20). Анҹаг бу кәшфләр өјрәнәҹәјимиз шејләрлә мүгајисәјә ҝәлмәз. Мин илләр өнҹә јашамыш Аллаһын садиг хидмәтчиси Әјјуб Јеһованын јаратдыглары барәдә билдикләри үзәриндә дүшүнүб, дүзҝүн олараг белә нәтиҹәјә ҝәлмишди: «Бунлар јалныз Онун [Аллаһын] етдикләринин бир зәррәсидир, Ондан ешитдијимиз чох зәиф бир пычылтыдыр. Ахы гүдрәтли ҝурултусуну ким дәрк едә биләр?» (Әјјуб 26:14).
Нә гәдәр чох јашамағымыздан асылы олмајараг, биз һеч вахт Јеһова Аллаһ вә Онун ишләри барәдә һәр шеји ахыра гәдәр дәрк едә билмәрик. Мүгәддәс Китабда јазылыб ки, Аллаһ бизим үрәјимизә әбәдијјәти гојуб. Анҹаг һәмчинин орада дејилир ки, «инсан Аллаһын етдији иши әввәлдән ахыра гәдәр анлаја билмәз» (Ваиз 3:10, 11). Сизҹә, Јараданымыз һагда јени шејләр өјрәнмәк дарыхдырыҹы ола биләрми?
Һәтта бу ҝүн башгаларына фајда ҝәтирән вә Аллаһы иззәтләндирән ишлә мәшғул олан инсанлар үчүн һәјат, демәк олар ки, дарыхдырыҹы дејил. Әмин ола биләрик ки, белә бир ишлә мәшғул олсаг, әбәди јашасаг белә, һеч вахт дарыхмајаҹағыг.
[32–ҹи сәһифәдәки шәкил]
Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)