«Елә гачын ки, мүкафаты аласыныз»

«Елә гачын ки, мүкафаты аласыныз» (1 КОР. 9:24).

1, 2. а) Павел ибрани мәсиһчиләри руһландырмаг үчүн нә етди? б) Павелин сөзләринә әсасән, Аллаһын хидмәтчиләри нә етмәлидирләр?

ҺӘВАРИ ПАВЕЛ ибраниләрдән олан һәмиманлыларыны руһландырмаг үчүн онлара үнванладығы мәктубунда тәсирли бир нүмунә чәкди. О, бу мәсиһчиләрә хатырлатды ки, һәјат уғрунда ҝедән гачышда онлар тәк дејилләр — онларын әһатәсиндә јарышы уғурла баша вуран «бөјүк шаһидләр булуду» вар. Гәдим заманларда јарышда иштирак едән Аллаһын садиг хидмәтчиләринин әмәлләрини вә онларын ҝөстәрдикләри сәји мөһкәм јадда сахламаг бу мәсиһчиләрә вар ҝүҹләри илә гачмаг вә тәслим олмамаг үчүн стимул верәҹәкди.

² Бундан әввәлки мәгаләдә биз «шаһидләр булуду»на дахил олан бәзи садиг хидмәтчиләрин сүрдүјү һәјат тәрзини арашдырдыг. Онларын һамысы ҝөстәрди ки, јарышы уғурла баша вурмаг үчүн инсан ҝәрәк сарсылмаз имана малик олсун вә Аллаһа садиг галсын. Биз онларын нүмунәсиндән өзүмүз үчүн ибрәт дәрси ҝөтүрә биләрик. Һәмин мәгаләдә гејд олундуғу кими, Павел, биз дә дахил олмагла, өз һәмиманлыларына белә бир нәсиһәт верди: «Ҝәлин бизә ағырлыг едән һәр шеји вә ајагларымыза долашан ҝүнаһы әјнимиздән чыхараг вә дөзүмлә гачараг гаршымыздакы мәсафәни гәт едәк» (Ибр. 12:1).

3. Павелин јунан идман јарышларындан нүмунә ҝәтирәрәк вердији мәсләһәтин мәғзи нә иди?

³ О вахтлар мәшһур олан гачыш үзрә јарышлар барәдә бир китабда гејд олунур ки, «јунанлар чылпаг шәкилдә һәм мәшг едирдиләр, һәм дә гачырдылар»a («Backgrounds of Early Christianity»). Јәни јарышда иштирак едән идманчылар сүрәтләрини азалда биләҹәк артыг шејләри әјинләриндән чыхарыб атырдылар. Бу, әдәб-әркан гајдаларына зидд олса да, онлар буну јарышда галиб ҝәлиб мүкафаты газанмаг мәгсәдилә едирдиләр. Павелин сөзләринин мәғзи ондан ибарәт иди ки, һәјат уғрунда ҝедән гачышда мүкафаты газанмаг үчүн мәсиһчиләр мүхтәлиф нөв манеәләри кәнар етмәлидирләр. Бу мәсләһәт о вахтлар јашајан мәсиһчиләр үчүн актуал олдуғу кими, бизим үчүн дә актуалдыр. Һәјат уғрунда ҝедән јарышда мүкафат алмағымыза нә мане ола биләр?

«Ағырлыг едән һәр шеји... чыхараг»

4. Нуһун ҝүнләриндәки инсанларын башы нәјә гарышмышды?

⁴ Павел «ағырлыг едән һәр шеји» чыхармағы мәсләһәт ҝөрмүшдү. Бу ифадә алтында о, диггәтимизи там ҹәмләмәјимизә, еләҹә дә вар ҝүҹүмүзлә гачмағымыза мане олан һәр шеји нәзәрдә тутурду. Бу, нә ола биләр? Исанын сөзләри бизә буну баша дүшмәјә көмәк едир. О, Павелин имана саһиб олан инсанлар сырасында адыны чәкдији Нуһун ҝүнләриндән данышараг демишди: «Нуһун ҝүнләриндә олдуғу кими, инсан Оғлунун ҝүнләриндә дә елә олаҹаг» (Лука 17:26). Иса, әсас етибарилә, бәшәр тарихиндә һәлә һеч вахт олмамыш үзүмүзә ҝәлән мәһви јох, инсанларын һәјат тәрзини нәзәрдә тутурду. (Матта 24:37—39 ајәләрини оху.) Нуһун дөврүндә инсанларын әксәријјәти, Аллаһы разы салмаг бир кәнара дурсун, Онунла һеч марагланмырдылар да. Онлары јајындыран шејләр һеч дә гејри-ади дејилди. Мәсәлән, бу, јејиб-ичмәк, аилә гурмаг, бир сөзлә, һәјатын ади гајғылары иди. Исанын дедији кими, проблемин көкү бу инсанларын «һеч нәји [фикирләшмәмәләриндә]» иди.

5. Јарышы уғурла баша вурмагда бизә нә көмәк едәҹәк?

⁵ Нуһ вә аиләси кими, бизим дә ҝүндәлик ишләримиз аз дејил. Биз ишләјиб пул газанмалы, еләҹә дә өзүмүзүн вә аилә үзвләримизин гајғысына галмалыјыг. Бу, вахтымызын, ҝүҹүмүзүн вә вәсаитләримизин бөјүк һиссәсини ала биләр. Хүсусилә дә малијјә проблемләри илә үзләшдикдә биз чох асанлыгла тәләбатларымыза ҝөрә нараһатчылыг кечирә биләрик. Аллаһа һәср олунмуш мәсиһчиләр кими, һамымызын ваҹиб теократик мәсулијјәтләри вар. Биз тәблиғ етмәли, јығынҹаг ҝөрүшләринә һазырлашмалы, онларда иштирак етмәли, руһани ҹәһәтдән мөһкәм галмаг үчүн шәхси өјрәнмә вә аиләви ибадәт кечирмәлијик. Нуһун да Аллаһа хидмәтлә бағлы ишләри чох иди, лакин о, һәр шеји Аллаһ неҹә әмр етмишдисә, «еләҹә јеринә јетирди» (Јар. 6:22). Бәли, јарышы уғурла баша вурмаг үчүн биз јүкүмүзү минимума ендирмәли, еләҹә дә һеч бир лазымсыз јүкү үзәримизә ҝөтүрмәмәлијик.

6, 7. Биз Исанын һансы мәсләһәтләрини јадда сахламалыјыг?

⁶ Павел «ағырлыг едән һәр шеји» әјнимиздән чыхармағы дејәндә нәји нәзәрдә тутурду? Әлбәттә ки, бүтүн мәсулијјәтләримизи үзәримиздән атмаг гејри-мүмкүндүр. Бунунла әлагәдар Исанын дедији сөзләри јадымыза салаг: «“Нә јејәҹәјик?”, “нә ичәҹәјик?” вә ја “нә ҝејәҹәјик?” — дејә һеч вахт нараһат олмајын. Чүнки бүтүн бунларын далынҹа башга милләтләр гачыр. Сизин сәмави Атаныз исә бүтүн бунлара еһтијаҹ дујдуғунузу билир» (Мат. 6:31, 32). Иса демәк истәјирди ки, гида вә палтар кими зәрури олан шејләр белә һәјатымызда әсас јери тутса, бизә ағырлыг едә вә ја бүдрәдә биләр.

⁷ Исанын бу сөзләринә диггәт јетирәк: «Сизин сәмави Атаныз... бүтүн бунлара еһтијаҹ дујдуғунузу билир». Бу сөзләр ҝөстәрир ки, сәмави Атамыз Јеһова еһтијаҹларымызы өдәмәк үчүн Онун үзәринә дүшән иши ҝөрәҹәк. Лакин «бүтүн бунлар» дејилдикдә, Јеһованын хошладығымыз вә ја үрәјимизин истәдији һәр шејлә бизи тәмин едәҹәји нәзәрдә тутулмур. Бунунла белә, Иса дејир ки, биз башга милләтләрин архасынҹа гачдығы шејләрә ҝөрә нараһат олмамалыјыг. Нәјә ҝөрә? Иса демишди: «Өзүнүзә фикир верин, үрәјинизи гарынгулулуг, сәрхошлуг вә һәјатын гајғылары илә јүкләмәјин ки, о ҝүн үстүнүзә тор кими гәфләтән, бир ан ичиндә ҝәлмәсин» (Лука 21:34, 35).

8. Нәјә ҝөрә инди «ағырлыг едән һәр шеји» әјнимиздән чыхармағын әсил вахтыдыр?

⁸ Артыг «финиш хәтти» ҝөрүнүр. Сона бу гәдәр јахын олдуғумуз бир вахтда лазымсыз олараг үзәримизә әлавә јүк ҝөтүрәрәк сүрәтимизи азалтмаг неҹә дә бөјүк сәһв оларды! Бунунла әлагәдар Павелин вердији мәсләһәт неҹә дә јеринә дүшүр: «Нәји варса, онунла гане олмағы баҹаран инсан үчүн Аллаһа сәдагәт, доғрудан да, бөјүк газанҹ мәнбәјидир» (1 Тим. 6:6). Әҝәр Павелин сөзләринә ҹидди јанашсаг, мүкафаты алмаг шансымыз бирә-беш артаҹаг.

«Ајагларымыза долашан ҝүнаһы»

9, 10. а) «Ајагларымыза долашан ҝүнаһ» ифадәси һансы мәнаны верир? б) Ҝүнаһ бизим ајагларымыза неҹә долаша биләр?

⁹ «Бизә ағырлыг едән» һәр шејлә јанашы, Павел «ајагларымыза долашан ҝүнаһы» да әјнимиздән чыхармағы мәсләһәт ҝөрүр. Бу, нә ола биләр? Јунан дилиндән «ајағымыза долашан» кими тәрҹүмә едилән ифадә Мүгәддәс Китабда јалныз бир дәфә бу ајәдә раст ҝәлинир. Алим Алберт Барнз гејд едир: «Гачыш үзрә јарышларда иштирак едән идманчы ајагларына долашан вә гачмаға әнҝәл төрәдән пал-палтары әјниндән чыхартдығы кими, мәсиһчи дә гачмағына мане олан буна бәнзәр шејләри кәнара гојмалыдыр». Јәни мәсиһчи јол вермәмәлидир ки, нә исә онун иманыны зәифләтсин. Бәс бу, неҹә баш верә биләр?

¹⁰ Мәсиһчи иманыны бирдән-бирә итирмир. Бу, тәдриҹән вә нәзәрә чарпмадан баш верә биләр. «Ибраниләрә мәктуб»ун әввәлиндә Павел «башга сәмтә» апарылмаг вә «Аллаһдан узаглашараг корланыб имансыз» олмаг тәһлүкәсинин мөвҹуд олдуғу барәдә хәбәрдарлыг етмишди (Ибр. 2:1; 3:12). Палтар гачышда иштирак едән идманчынын ајағына долашарса, о јыхыла биләр. Әҝәр идманчы мүәјјән ҝејимләри ҝејинмәмәк хәбәрдарлыгларына мәһәл гојмурса, бу тәһлүкә даһа да артыр. Идманчыны тәһлүкәјә хор бахмаға нә вадар едә биләр? Бу, етинасызлыг ја да архајынлыг ола биләр, јахуд да нә исә онун фикрини јајындыра биләр. Павелин мәсләһәтиндән һансы ибрәт дәрси ҝөтүрә биләрик?

11. Иманымызы итирмәјимизә нәләр сәбәб ола биләр?

¹¹ Биз јадда сахламалыјыг ки, әҝәр мәсиһчи иманыны итирибсә, буна сәбәб иманыны итирмәздән әввәл етдији шејләр олуб. Диҝәр бир алим јазыр ки, «ајагларымыза долашан ҝүнаһ» дејилдикдә «дүшдүјүмүз вәзијјәт, гурулушумуз вә әһатә даирәмиз уҹбатындан бизә гаршы ән бөјүк тәсир гүввәсинә малик олан ҝүнаһ» нәзәрдә тутулур. Башга сөзлә десәк, мүһит, зәиф ҹәһәтләримиз вә үнсијјәтдә олдуғумуз адамлар бизә бөјүк тәсир ҝөстәрә биләр. Бу исә иманымызын зәифләмәсинә вә ја ону бүсбүтүн итирмәјимизә ҝәтириб чыхара биләр (Мат. 13:3—9).

12. Иманымызы итирмәмәк үчүн биз һансы хәбәрдарлыглара диггәт јетирмәлијик?

¹² Артыг нечә илләрдир ки, садиг вә ағыллы нөкәр бизә хатырладыр ки, нәјә бахдығымыза вә гулаг асдығымыза фикир вермәлијик, чүнки үрәјимизә вә зеһнимизә дахил оланлар дүшүнҹә вә арзуларымыза тәсир ҝөстәрир. Биз даһа чох пул газанмаг вә даһа чох әшјалара саһиб олмаг истәјинин нә гәдәр тәһлүкәли олдуғу барәдә дә хәбәрдарлыглар алмышыг. Шоу-бизнес аләминин ҝөзгамашдыран парылтысы вә ја арды-арасы кәсилмәјән техники јениликләр бизи јајындыра биләр. Садиг вә ағыллы нөкәрин вердији мәсләһәтләрин һәддиндән артыг сәрт олдуғуну, онларын бизә јох, башгаларына аид олдуғуну вә ја бизим бүтүн тәһлүкәләрдән сығорталандығымызы дүшүнмәјимиз бөјүк сәһв оларды. Шејтан бу дүнјанын дүшүнҹә тәрзиндән вә арзуларындан истифадә едәрәк әлиндән ҝәләни едир ки, бу хәбәрдарлыглара лагејд јанашаг. Етинасызлыг, өзүнәархајынлыг һисси вә мүхтәлиф јајындырыҹы шејләр артыг бәзиләринин ахырына чыхыб вә бу кими шејләр бизим дә һәјат мүкафатыны алмағымыза манечилик төрәдә биләр (1 Јәһ. 2:15—17).

13. Биз өзүмүзү зәрәрли тәсирләрдән неҹә горуја биләрик?

¹³ Биз һәр ҝүн бу дүнјанын мәгсәдләрини, мәнәви дәјәрләрини вә дүшүнҹә тәрзини әкс етдирән инсанларын тәсиринә мәруз галырыг. (Ефеслиләрә 2:1, 2 ајәләрини оху.) Лакин онларын бизә нә дәрәҹә тәсир етмәси, әсас етибарилә, өзүмүздән — бизим бу тәсирләрә неҹә мүнасибәт ҝөстәрмәјимиздән асылыдыр. Павелин һаггында данышдығы «һава» зәһәрлидир. Биз даима ајыг-сајыг олмалыјыг ки, бу һава бизи боғмасын, әкс һалда, гаршымыздакы мәсафәни баша вура билмәјәҹәјик. Јолумуза давам етмәјә бизә нә көмәк едә биләр? Иса Мәсиһин нүмунәси. О, сонадәк гачмагда бизә ән мүкәммәл нүмунә гојуб (Ибр. 12:2). Павелин нүмунәси дә бизим үчүн фајдалыдыр, чүнки о, өзүнү һәјат уғрунда ҝедән гачышын иштиракчысы адландырмышды вә һәмиманлыларыны ондан нүмунә ҝөтүрмәјә тәшвиг етмишди (1 Кор. 11:1; Филип. 3:14).

«Мүкафаты» неҹә ала биләрик?

14. Павел үчүн јарышы баша вурмаг нә дәрәҹәдә ваҹиб иди?

¹⁴ Павел үчүн јарышы баша вурмаг нә дәрәҹәдә ваҹиб иди? Онун ефесли ағсаггаллара дедији јекун сөзләринә фикир верәк: «Мән гәтијјән өзүмү дүшүнмүрәм, тәки Ағамыз Исанын мәнә һәвалә етдији хидмәти јеринә јетирим,.. јолуму баша чатдырым» (Һәв. иш. 20:24). Павел јолуну баша вурмаг үчүн һәр шејиндән, һәтта һәјатындан белә кечмәјә һазыр иди. О баша дүшүрдү ки, нә исә ону јолундан аздырса, хош хәбәрлә әлагәдар ҝөрдүјү бүтүн ишләри һәдәр ҝедәҹәк. Буна ҝөрә дә онда өзүнәархајынлыг һисси јох иди. Јолун ортасында о артыг мүкафатыны алдығыны дүшүнмүрдү. (Филипилиләрә 3:12, 13 ајәләрини оху.) Јалныз һәјатынын сонуна аз галмыш о, мүәјјән бир әминликлә нөвбәти сөзләри деди: «Мән ҹәсарәтлә вурушдум, гаршымдакы мәсафәни ахырадәк гачдым вә иман јолундан кәнара чыхмадым» (2 Тим. 4:7).

15. Павел онунла бирҝә гачанлары неҹә руһландырырды?

¹⁵ Үстәлик, Павел үрәкдән истәјирди ки, һәмиманлылары да јарышы уғурла баша вурсунлар. Мәсәлән, о, Филипидәки мәсиһчиләри хилас олмаг үчүн сәјлә чалышмаға тәшвиг едирди. Онлар «һәјат сөзүндән икиәлли» јапышмалы идиләр. Сонра Павел нөвбәти сөзләри деди: «О заман бу јолда әбәс јерә гачмадығым вә һәдәр јерә әлләшмәдијим бәлли олаҹаг, Мәсиһин ҝүнүндә севинҹим ашыб-дашаҹаг» (Филип. 2:16). Коринфдәки мәсиһчиләри дә о тәшвиг едирди: «Сиз дә елә гачын ки, мүкафаты аласыныз» (1 Кор. 9:24).

16. Нәјә ҝөрә диггәтимизи мәгсәдимизә, јәни мүкафатымыза ҹәмләмәлијик?

¹⁶ Марафон кими узун мәсафәјә гачышда финиш хәтти илк әввәл ҝөрүнмүр. Бунунла белә, бүтүн јол боју јарыш иштиракчыларынын диггәти финиш хәттиндә олур. Онлар мәгсәдләринә јахын олдугларыны биләндә даһа әзмли олурлар. Бизим иштирак етдијимиз јарыш да беләдир. Мәгсәд, јәни мүкафат бизим үчүн ҝерчәк олмалыдыр. Бу, бизә мүкафаты алмаға көмәк едәҹәк.

17. Иман бизә ҝөзүмүзү мүкафатда сахламаға неҹә көмәк едир?

¹⁷ Павел јазмышды: «Иман үмид едилән шејләрин мүтләг јеринә јетәҹәјинә олан әминлик, ҝөзлә ҝөрүнмәјән шејләрин әслиндә мөвҹуд олдуғунун сүбутудур» (Ибр. 11:1). Ибраһимлә Сара раһат шәраитләрини ҝеридә гојуб Аллаһын дедији јердә «гәриб вә мүвәггәти сакин» кими јашамаға һазыр идиләр. Онлара буну етмәјә нә көмәк етди? Ибраһимлә Сара Аллаһын нијјәтләринин јеринә јетмәсини «узагдан ҝөрдүләр». Муса «Мисирин бүтүн хәзинәләриндән» вә «ҝүнаһдан мүвәггәти һәзз [алмагдан]» имтина етди. Буну етмәк үчүн онда олан иман вә ҝүҹ һарадан иди? Мүгәддәс Китаб ҹаваб верир: «[О,] ҝөзүнү алаҹағы мүкафатдан чәкмирди» (Ибр. 11:8—13, 24—26). Буна ҝөрә дә тәәҹҹүблү дејил ки, Павел онларын һәр бири һаггында данышаркән сөһбәтинә «иман сајәсиндә» сөзү илә башламышды. Иман сајәсиндә онлар диггәтләрини һәмин ан үзләшдији сынаг вә чәтинликләрә јох, Аллаһын онлар үчүн етдикләринә вә ҝәләҹәкдә едәҹәк шејләрә јөнәлтмишдиләр.

18. «Ајагларымыза долашан ҝүнаһы» чыхарыб атмаг үчүн биз һансы аддымлары атмалыјыг?

¹⁸ Әҝәр «Ибраниләрә мәктуб»ун 11-ҹи фәслиндә адлары чәкилән бөјүк иман саһиби олан киши вә гадынларын нүмунәси үзәриндә дүшүнсәк, иман инкишаф етдирә вә «ајагларымыза долашан ҝүнаһы» чыхарыб ата биләрик (Ибр. 12:1). Бундан әлавә, биз үрәкләриндә ејни иман јетишдирән инсанларла бир арада олмагла «бир-биримизи мәһәббәтә вә хејирхаһ ишләрә» тәшвиг едә биләрик (Ибр. 10:24).

19. Нәјә ҝөрә гачмаға давам етмәк ваҹибдир?

¹⁹ Биз јолун сонуна јахынлашырыг. Финиш хәтти артыг ајдын ҝөрүнүр. Иманымыз вә Јеһованын көмәји сајәсиндә «бизә ағырлыг едән һәр шеји вә ајагларымыза долашан ҝүнаһы әјнимиздән» чыхара биләрик. Бәли, јолумузу давам етдирәрәк сонда мүкафаты, јәни Атамыз Јеһова Аллаһын вәд етдији хејир-дуалары алмаг мүмкүндүр.

[Һашијә]

Јадыныздадырмы?

• Бизә ағырлыг едән «һәр шеји» әјнимиздән чыхармаг нә демәкдир?

• Мәсиһчинин иманыны итирмәсинә нә сәбәб ола биләр?

• Нәјә ҝөрә диггәтимизи мүкафата ҹәмләмәлијик?

[23-ҹү сәһифәдәки шәкил]

«Ајагларымыза долашан» ҝүнаһ нәдир вә о, бизим ајагларымыза неҹә долаша биләр?