«Ојаг галын». Бу, нәјә ҝөрә ваҹибдир?

«СӘНИН иштиракынын вә дөврүн јекунунун әламәти нә олаҹаг?» (Мат. 24:3). Бу суала ҹаваб олараг Иса ајдын, әтрафлы вә конкрет әламәт сөјләди. Һәмин әламәт барәдә «Матта» китабынын 24-ҹү, «Марк» китабынын 13-ҹү вә «Лука» китабынын 21-ҹи фәслиндә охумаг олар. Даһа сонра әлавә етди: «Ојаг галын» (Мат. 24:42).

Әҝәр әламәт ајдын ҝөрүнәҹәкдисә, нәјә ҝөрә о, давамчыларыны ојаг галмаға тәшвиг етди? Ики еһтимала нәзәр салаг. Биринҹиси, јајындырыҹы шејләр бәзиләрини әламәтә мәһәл гојмамаға тәһрик едә биләр. Бу исә, өз нөвбәсиндә, онларын иманларыны вә сајыглыгларыны итирмәләринә ҝәтириб чыхардар. Икинҹиси, әҝәр әламәтин мүәјјән мәгамлары мәсиһчинин јашадығы әразидә јеринә јетмирсә, ола билсин, о дүшүнәҹәк ки, бунун она һеч бир аидијјәти јохдур. О, белә бир гәнаәтә ҝәлә биләр ки, Исанын сөјләдији пејғәмбәрлијин зирвәси олан «бөјүк мүсибәт»ә һәлә чох вар вә «ојаг» галмаға еһтијаҹ јохдур (Мат. 24:21).

«Һеч нәји фикирләшмирдиләр»

Иса давамчыларына Нуһун мүасирләри барәдә хатырлатды. Онлар Нуһун тәблиғ етдијини, нәһәнҝ ҝәми тикдијини вә зоракылығын баш алыб ҝетдијини өз ҝөзләри илә ҝөрүрдүләр. Лакин бу адамларын әксәријјәти «һеч нәји [фикирләшмирди]» (Мат. 24:37—39). Верилән хәбәрдарлыглара даир ејни мүнасибәт бизим ҝүнләрдәки әксәр инсанларда да мүшаһидә олунур. Мәсәлән, јолун кәнарында сүрәт һәддинин мәһдудлашдырылмасы барәдә ајдын нишанларын гојулмасына бахмајараг, бир чох сүрүҹүләр онлара мәһәл гојмурлар. Буна ҝөрә дә һакимијјәт даирәләри сүрүҹүләри сүрәти азалтмаға мәҹбур етмәк үчүн бәзән шәһәр күчәләриндә траплин гурашдырыр. Ејнилә, мәсиһчи сон ҝүнләрин әламәтини ҝөрсә дә, бунун онун һәјат тәрзинә тәсир ҝөстәрмәсинә јол вермәјә биләр. Гәрби Африкада јашајан Ариел адында јенијетмә бир гызын нүмунәси буну ачыг-ајдын ҝөстәрир.

Ариел телевизорда гадынлар арасында һәндбол јарышларына бахмағы хошлајырды. Тәһсил алдығы мәктәбдә һәндбол командасы тәшкил едиләндә о, гапычы кими командаја јазылды. Ојнамаг һәвәси онун ҝөзүнү о гәдәр бағламышды ки, Јеһова илә мүнасибәтләри үчүн тәһлүкә јарада биләҹәк шејләрә фикир вермәди. Сонра нә баш верди? О нәгл едир: «Команда јолдашларымдан бәзиләри сигарет чәкән вә наркотик гәбул едән оғланларла ҝөрүшүрдүләр. Онлардан фәргләндијим үчүн мәни әлә салырдылар, лакин бунун өһдәсиндән асанлыгла ҝәлә биләҹәјими дүшүнүрдүм. Анҹаг ојуна олан һәвәсим руһанилијими мәһв етмәјә башлајанда бу, мәним үчүн тамамилә ҝөзләнилмәз олду. Һәндбол үрәјимә вә зеһнимә һаким кәсилмишди. Падшаһлыг Залында отураркән чох вахт фикирләрим һәндбол мејданчасында галырды. Бу һәтта мәсиһчи хүсусијјәтләримә дә өз мәнфи тәсирини ҝөстәрмишди. Һәндбола олан севҝим сонрадан галиб ҝәлмәк һәвәси илә әвәз олунду. Буна ҝөрә дә о ки вар мәшг едирдим. Ҝәрҝинлик ҝет-ҝедә артырды. Һәндбола ҝөрә һәтта достларымы да атдым.

Ојунларын бириндә, бизим гапыја ҹәримә зәрбәси тәјин олунан заман баш верән бир һадисә мәни ҹидди дүшүнмәјә вадар етди. Зәрбәни дәф етмәјә һазырлашырдым. Јеһоваја дуа етдим ки, топу гајтармаға мәнә көмәк етсин. Бирдән нә етдијими баша дүшдүм. Јалныз бундан сонра руһанилијимә нә дәрәҹәдә ҹидди зәрәр дәјдијини анладым. Вәзијјәти дүзәлтмәк үчүн нә етдим?

Әввәлләр мән “Ҝәнҹләрин суаллары. Һәјатымы нәјә һәср едим?”a филминә (рус.) бахсам да, она јенидән бахмаг, лакин бу дәфә орада дејиләнләрә ҹидди јанашмаг гәрарына ҝәлдим. Мән дә, драмдакы ҝәнҹ Андре кими, ејни вәзијјәтдә идим. Ағсаггал гардашын она вердији мәсләһәтә — Филипилиләрә 3:8 ајәсини охујуб үзәриндә дүшүнмәк мәсләһәтинә хүсуси диггәт јетирдим. Һәмин мәсләһәти ҝөтүр-гој етдикдән сонра командадан чыхдым.

Бундан сонра һәр шеј дәјишди! Рәгабәт руһундан вә онун ајрылмаз һиссәси олан стрессдән азад олдум. Өзүмү даһа хошбәхт һисс едирдим вә мәсиһчи достларымла мүнасибәтләрим дүзәлди. Һәјатымда ваҹиб јери руһани мәшғулијјәтләр тутмаға башлады. Артыг јығынҹаг ҝөрүшләриндә диггәтим јајынмырды вә онлардан даһа чох севинҹ әлдә едирдим. Хидмәтим дә јахшылашды. Инди мән мүнтәзәм олараг көмәкчи пионер кими хидмәт едирәм».

Јајындырыҹы шејләр сәни Исанын сөјләдији әламәтә мәһәл гојмамаға вадар едирсә, Ариел кими ҹидди аддымлар ат. Нөвбәти мәсләһәтләр сәнә буну етмәкдә көмәк едәҹәк. Ҝизли хәзинәләр хәритәси адландырылан «Ҝөзәтчи Гүлләси нәшрләринин индекси»нә (рус.) мүраҹиәт ет. Бурада сән ҝөзәл мәсләһәтләрин вә сәнин үзләшдијин сынагларла үзләшән инсанларын нүмунәсини һарадан тапаҹағыны өјрәнәҹәксән. Мәсиһчи ҝөрүшләринин һамысына јахшы һазырлаш вә гејдләр апар. Онда бу ҝөрүшләрдән там фајда әлдә едәҹәксән. Бәзиләри фикир вермишләр ки, јығынҹагда габаг ҹәрҝәләрдә отурмағын бөјүк хејри вар. Динләјиҹиләрин иштиракы нәзәрдә тутулан бәндләрдә мүмкүн гәдәр тез ҹаваб вермәјә чалыш. Хәбәрләрдә ешитдијин һадисәләри ахыр ҝүнләрин әламәти илә мүгајисә едәрәк руһани сајыглығыны гору (2 Тим. 3:1—5; 2 Пет. 3:3, 4; Вәһј 6:1—8).

«Һазыр олун»

Ахыр ҝүнләрин әламәти барәдә пејғәмбәрликләр дүнја мигјасында — «бүтүн јер үзүндә» јеринә јетир (Мат. 24:7, 14). Милјонларла инсанлар епидемијаларын, гида чатышмазлығынын түғјан етдији, зәлзәләләрин вә бу кими диҝәр һадисәләрин баш вердији әразиләрдә јашајырлар. Лакин бир чох башга әразиләрдә инсанлар нисбәтән сакит јашајырлар. Әҝәр сон ҝүнләрин әламәтини тәшкил едән һадисәләрин бәзиләри илә өз һәјатында үзләшмирсәнсә, бөјүк мүсибәтә һәлә чох галдығыны дүшүнмәлисәнми? Бу ҹүр гәнаәтә ҝәлмәк һеч дә мүдриклик олмазды.

Нүмунә үчүн Исанын «епидемијалар вә гытлыглар» барәдә дедикләри үзәриндә фикирләш (Лука 21:11). Биринҹиси, о демәди ки, бу бәдбәхтликләр һәр јердә ејни вахтда вә ејни дәрәҹәдә баш верәҹәк. Әксинә, о, бу һадисәләрин «бир чох јерләрдә» олаҹағыны деди. Демәли, биз бу һадисәләрин һәр јердә вә ејни вахтда баш верәҹәјини ҝөзләмәмәлијик. Икинҹиси, гытлыгларын олаҹағыны сөјләдикдән бир гәдәр сонра Иса бәзи давамчыларынын өзләрини гарынгулулуг тәләсиндән ҝөзләмәли олаҹагларыны деди: «Өзүнүзә фикир верин, үрәјинизи гарынгулулуг... илә јүкләмәјин» (Лука 21:34). Бурадан ајдын ҝөрүрүк ки, әламәтин һәр бир һиссәсини бүтүн мәсиһчиләр өз үзәриндә һисс етмәјәҹәкди. Иса демишди: «Бүтүн бунларын баш вердијини ҝөрәндә билин ки, Аллаһын падшаһлығы јахындадыр» (Лука 21:31). Әламәтин мүәјјән ҹәһәтләри јашадығымыз әразидә јеринә јетмәсә дә вә ја онлары үзәримиздә һисс етмәсәк дә, мүасир күтләви информасија васитәләри сајәсиндә әламәтин бүтүн тәркиб һиссәләринин неҹә һәјата кечдијини ҝөрмәк олар.

Һәмчинин унутма ки, Јеһова бөјүк мүсибәтин ҝүнүнү вә саатыны артыг тәјин едиб (Мат. 24:36). Јер үзүндә баш верән һеч бир һадисә Јеһованы бу тарихи дәјишмәјә мәҹбур едә билмәз.

Һарада јашамаларындан асылы олмајараг, Иса мәсиһчиләрин һамысына демишди: «Һазыр олун» (Мат. 24:44). Биз һәр ан һазыр олмалыјыг. Дүздүр, сәһәрдән ахшама гәдәр теократик ишләрлә мәшғул олмаг гејри-мүмкүндүр. Үстәлик, биз бөјүк мүсибәтин башлајаҹағы ан һарада олаҹағымызы билмирик. Ола билсин, бәзиләримиз ишдә олаҹағыг вә ја ев ишләрини ҝөрәҹәјик (Мат. 24:40, 41). Бәс һәмин ҝүнә һазыр олмаг үчүн нә етмәлијик?

Еммануеллә Викторина вә онларын алты гызы Африканын елә бир јериндә јашајырлар ки, сон ҝүнләрин әламәтини тәшкил едән һадисәләрин һамысы орада баш вермир. Буна ҝөрә дә онлар өзләрини һазыр вәзијјәтдә сахламаг үчүн һәр ҝүн руһани мөвзулар үзрә мүзакирәләр апармаг гәрарына ҝәлибләр. Еммануел дејир: «Һәр кәс үчүн мүнасиб олан вахт тапмаг чәтин иди. Нәһајәт, биз сәһәр саат алтыдан једдинин јарысына гәдәр олан вахты сечдик. Ҝүндәлик ајәни арашдырдыгдан сонра һәмин һәфтә ҝөрүшләрдә мүзакирә олунаҹаг нәшрдән бир нечә абзаса һазырлашырыг». Бу, онлара ојаг галмаға көмәк едирми? Әлбәттә! Еммануел өз јығынҹағында ағсаггаллар шурасынын координаторудур. Викторина тез-тез көмәкчи пионер кими хидмәт едир вә онун көмәји сајәсиндә бир чох инсанлар һәгигәтә ҝәлиб. Онларын гызларынын алтысы да руһән инкишаф едир.

Иса бизә хәбәрдарлыг едир: «Диггәтли олун, ојаг галын» (Марк 13:33). Гој һеч нә сәнин руһән ајыг-сајыг галмағына мане олмасын. Ариел кими, нәшрләримиз вә јығынҹаг ҝөрүшләримиз васитәсилә верилән ҝөзәл мәсләһәтләрә диггәт јетир. Еммануелин аиләсиндән нүмунә ҝөтүрәрәк һазыр олмаг вә ојаг галмаг үчүн һәр ҝүн нә исә етмәјә чалыш.

[Һашијә]

[4–ҹү сәһифәдәки шәкил]

Мүгәддәс Китабы һәр ҝүн мүзакирә етмәләри сајәсиндә Еммануел вә аиләси өзләрини һазыр вәзијјәтдә сахлајырлар