Јеһова Аллаһ ҝөзләрими ачды

Нәгл етди Патрис Ојека

Ахшамүстү иди. Гаты зүлмәт ичиндә кечирдијим бир ҝүнү дә тәк-тәнһа, радионун зәһләтөкән сәсинә гулаг аса-аса баша вурурдум. Јашамагдан безмишдим, һәјатыма сон гојмаг истәјирдим. Бир финҹан суја зәһәр төкүб гаршымдакы масанын үстүнә гојдум. Анҹаг ҹаныма гәсд етмәздән габаг истәјирдим ки, сонунҹу дәфә һамама ҝириб чимим. Сонра гәшәнҝ ҝејиниб зәһәри башыма чәким. Јәгин сизә мараглыдыр, нијә мән интиһар етмәк истәјирдим вә неҹә олду ки, инди сағ-саламат сизә өз һекајәтими нәгл едирәм.

МӘН 1958-ҹи ил февралын икисиндә Конго Демократик Республикасынын Шәрги Касаи вилајәтиндә анадан олмушам. Доггуз јашым оланда атамы итирдим, бундан сонра бөјүк гардашым мәни сахлады.

Мәктәби битирәндән сонра каучук плантасијасында ишләмәјә башладым. 1989-ҹу ил иди. Бир сәһәр офисимдә һесабат һазырлајырдым, бирдән ҝөзүмә зүлмәт чөкдү. Әввәлҹә елә билдим ишыг сөнүб, амма сонра ҝенераторун сәсини ешитдим. Һәм дә ки сәһәр иди. Мәни дәһшәт бүрүдү. Мән һеч нә ҝөрмүрдүм, һәтта гаршымдакы гејдләри дә!

Дәрһал ишчиләримдән бирини чағырдым ки, мәни һәкимә апарсын. Вәзијјәт ҹидди иди, һәр ики ҝөзүмүн тор гишасы јыртылмышды. Буна ҝөрә һәким мәсләһәт ҝөрдү ки, пајтахт Киншаса шәһәринә ҝедиб даһа тәҹрүбәли һәкимә мүраҹиәт едим.

Киншаса шәһәриндә

Киншасада нә гәдәр ҝөз һәкиминин јанына ҝетдимсә дә, һеч бири дәрдимә чарә гыла билмәди. Гырх үч ҝүн хәстәханада јатандан сонра һәкимләр дедиләр ки, һәмишәлик кор галаҹағам. Онда евдәкиләр мәни апарыб бир-бир килсәләри ҝәздирдиләр ки, бәлкә ҝөзүмү ачан олар. Амма һеч ким көмәк едә билмәди.

Ахырда үмидим үзүлдү. Гара ҝүнләрим башлады. Кор олмағым азмыш кими, ишими итирдим, һәлә үстәлик арвадым да мәни атыб ҝетди. Чыхыб ҝедәндә исә евдә олан һәр шеји јығыб апарды. Өзүмә гапаныб ҝүнләрими дөрд дивар арасында кечирирдим. Адам арасына чыхмаға утанырдым. Өзүмү лазымсыз әшја кими һисс едирдим.

Дүз ики дәфә ҹаныма гәсд етмәк истәмишәм. Һекајәтимин әввәлиндә данышдығым һадисә икинҹи ҹәһд иди. Бу ҹәһдин боша чыхмасына ҝөрә гоһумумун ушағына борҹлујам. Мән һамамда чимән вахт ушаг финҹандакы зәһәри јерә төкмүшдү, јахшы ки, өзү ичмәмишди. Чыханда нә гәдәр ахтардым, финҹаны тапа билмәдим, лап дилхор олмушдум. Ахырда мәҹбур олуб интиһар етмәк истәдијими евдәкиләрә ачыб данышдым.

Мән ҝөјдә Аллаһа, јердә аиләмә миннәтдарам. Онлар һәмишә мәнә ҝөз олублар. Онлар олмасајды, инди мән һәјатда јох идим.

Јенә севинҹли ҝүнләр

1992-ҹи ил иди. Базар ҝүнү евдә отуруб сигарет чәкирдим. Евдән-евә тәблиғ едән Јеһованын Шаһидләри гапымызы дөјдүләр. Кор олдуғуму ҝөрүб мәнә Јешаја 35:5 ајәсиндән бу сөзләри охудулар: «О вахт корларын ҝөзләри, карларын гулаглары ачылаҹаг». Гәлбим севинҹлә долду. Ҝетдијим килсәләрдән фәргли олараг Јеһованын Шаһидләри мөҹүзәви шәкилдә шәфа тапаҹағымы вәд етмәдиләр. Онлар мәнә үрәкачан үмид верәрәк дедиләр ки, әҝәр Аллаһ һаггында өјрәнсәм, Онун бәхш едәҹәји јени дүнјада ҝөзләрим ачылаҹаг (Јәһја 17:3). Вахт итирмәдән Јеһованын Шаһидләри илә «Јер үзүндәки Ҹәннәтдә әбәдијјән јашаја биләрсиниз» китабыны арашдырмаға вә јығынҹаглара ҝетмәјә башладым. Һәјатымда дәјишикликләр етдим, сигарети атдым.

Ҝөзүмүн ҝөрмәмәји мәни руһани аддымлар атмагдан сахлајырды. Буна ҝөрә дә корлар мәктәбинә ҝедиб Брајл әлифбасыны өјрәндим. Бунун сајәсиндә јығынҹагларда верилән тәлимләри мәнимсәјә билдим. Тезликлә гонум-гоншуја тәблиғ етмәјә башладым. Бәли, јенә севинҹли ҝүнләр јетишди. Мән Јеһова Аллаһын јолунда ирәлиләдим вә һәјатымы Она һәср етдим. 1994-ҹү ил мајын једдисиндә вәфтиз олундум.

Јеһованы вә инсанлары севдикҹә Аллаһа хидмәт етмәк истәјим артырды. Беләҹә, 1995-ҹи ил декабрын бириндән етибарән таммүддәтли мүждәчи олараг вахтымын чох һиссәсини хидмәтә һәср етмәјә башладым. Һәмчинин 2004-ҹү илин февралындан јығынҹагда ағсаггал кими хидмәт едирәм. Һәрдәнбир Мүгәддәс Китаб әсасында чыхыш етмәк үчүн башга јығынҹаглара да дәвәт алырам. Мәним үчүн бүтүн бунлар Јеһованын һәдијјәсидир. Һәјатыма севинҹ гатан бу шејләр мәни әмин едир ки, әҝәр инсан Јеһоваја хидмәт етмәк истәјирсә, һеч бир физики гүсур онун гаршысында чәпәр ола билмәз.

Јеһова мәнә «ҝөз» верди

Дедијим кими, кор олдуғума ҝөрә арвадым мәни атыб ҝетмишди. Амма Јеһова мәнә һәдијјә верди, нуруну итирмиш ҝөзүмә бир нөв ишыг верди. Әлил олсам да, Ени Мавамбу евләнмәк тәклифими гәбул етди вә мәним ҝөрән ҝөзүм олду. О да таммүддәтли хидмәтчи олдуғу үчүн хидмәт вахты һәмишә мәнимлә олур. Һәмчинин чыхышларым үчүн мәлуматлары мәнә охујур, мән дә Брајл әлифбасы илә лазым олан гејдләри апарырам. Онун тимсалында Сүлејманын мәсәлләри 19:14 ајәсинин доғру олдуғуну анлајырам: «Инсана ев, вар-дөвләт аталардан мирас галар, ағыллы арвады исә Рәбб нәсиб едәр». Бәли, Ени Аллаһдан мәнә пајдыр!

Јеһова Ени илә мәнә ики өвлад — бир гыз, бир оғлан нәсиб едиб. Онларын үзүнү ҝөрәҹәјим ҝүнү һәсрәтлә ҝөзләјирәм! Аллаһ мәнә башга бир һәдијјә дә верди: бизә өз мүлкүндә јашамаға јер верән бөјүк гардашым Мүгәддәс Китабы өјрәниб вәфтиз олунду! Биз һамымыз ејни јығынҹагда хидмәт едирик.

Мәнә бол-бол немәтләр бәхш едән Аллаһа нә гәдәр шүкүр етсәм аздыр! Әлил олсам да, Онун јолунда әлимдән ҝәләни етмәјә һазырам (Малаки 3:10). Һәр ҝүн дуаларымда Аллаһдан диләјирәм ки, Онун Падшаһлығы тез ҝәлсин вә дүнјадан дәрд-бәланы ҝөтүрсүн. Јеһова Аллаһы таныдыгдан сонра әминликлә дејә биләрәм ки, «[Онун] хејир-дуасы инсана сәрвәт ҝәтирәр, даһа она гүссә вермәз» (Сүлејманын мәсәлләри 10:22).

[23–ҹү сәһифәдәки шәкил]

Јығынҹагда чыхыш едирәм; аиләм вә гардашымла