Алтмыш иллик достлуг — бу бир башланғыҹдыр

1951-ҹи илин бир јај ахшамы 20 јашларында олан дөрд ҝәнҹ оғлан Итакада (Нју-Јорк штаты, АБШ) бир-бирләринә јанашы телефон көшкләринә ҝириб Мичигана, Ајоваја вә Калифорнијаја зәнҝ сифариш едирди. Онларын достлары вә аилә үзвләри илә бөлүшәси хош хәбәрләри вар иди!

ЕЛӘ һәмин илин феврал ајында Ҝилеад Мәктәбинин 17-ҹи синфинә дәвәт алан 122 пионер Нју-Јоркун Саут-Лансинг шәһәринә ахышмышды. Ҝәләҹәк хүсуси тәјинатлы мүждәчиләр арасында Лоуелл Төрнер, Уиллиам (Билл) Кастен, Ричард Келси вә Рамон Темплтон да варды. Лоуелл вә Билл Мичигандан, Ричард Ајовадан, Рамон исә Калифорнијадан иди. Чох кечмәмиш онлар јахын дост олдулар.

Тәхминән беш ај сонра баш идарәдән олан Нејтан Норр гардашын тәләбәләрлә сөһбәт етмәјә ҝәләҹәји мәлум оланда онлары һәјәҹан бүрүдү. Бу дөрд гардаш хаһиш етди ки, әҝәр мүмкүндүрсә, онлары ејни јерә тәјин етсинләр. Бәс, ҝөрәсән, онлары һара тәјин едәҹәкләр?!

Нејтан гардаш мәзунларын тәјинатларыны елан етмәјә башлајанда һәјәҹанлары даһа да артды. Сәһнәјә дәвәт едилән илк мәзунлар бу дөрд ҝәнҹ олду. Онлар чох һәјәҹанлы идиләр, анҹаг хидмәти бирликдә давам етдирәҹәкләрини биләндә раһат нәфәс алдылар! Онларын Алманијаја тәјин олундуглары елан едиләндә тәәҹҹүб ичиндә олан синиф јолдашларындан ҝурултулу алгышлар гопду.

Бүтүн дүнјадакы Јеһованын Шаһидләри Һитлер Алманијасындакы һәмиманлыларынын 1933-ҹү илдән үзләшдикләри шиддәтли сынаглара рәғмән садиг галдыглары барәдә ешидәндә һејрәтә ҝәлирдиләр. Бир чох тәләбәләр хатырлајырлар ки, Икинҹи Дүнја мүһарибәсинин нәтиҹәләриндән әзијјәт чәкән авропалы гардашлар үчүн ичиндә пал-палтар олан, еләҹә дә үзәриндә «ҸАРЕ» («Ҹооперативе фор Америҹан Ремиттанҹес то Еуропе») јазылмыш бағламалар һазырлајырдылар. Јеһованын Алманијадакы халгы иман, әзмкарлыг, ҹәсарәт вә Јеһоваја етибар тәзаһүр етдирмәкдә бөјүк нүмунә иди. Лоуелл гардаш һәмин ан ағлындан кечдији фикри хатырлајыр: «Инди биз бу әзиз баҹы-гардашларла шәхсән таныш олаҹағыг». Тәәҹҹүблү дејил ки, һәмин ахшам бу севиндириҹи хәбәри гоһум-әгрәбаларына вә достларына чатдырмаг үчүн онлар телефон көшкләринә гачдылар!»

АЛМАНИЈАЈА ЈОЛА ДҮШҮРЛӘР

1951-ҹи илин ијулун 27-дә дөрд дост Нју-Јоркун Ист-Ривер чајынын лиманындан «Һомеланд» (азәрбајҹанҹа «Вәтән» демәкдир) ҝәмиси илә Алманијаја јола дүшдү. Ҝилеад Мәктәбинин тәлиматчыларындан бири вә сонрадан Рәһбәрлик Шурасынын үзвү олан Алберт Шрөдер онлара алманҹа бир нечә ҹүмлә өјрәтмишди. Гардашлар үмид едирдиләр ки, ҝәмидә онларла ҝедән бир нечә алман сәрнишинин көмәји илә алманҹа даһа чох өјрәнәҹәкләр. Лакин достлар онларын мүхтәлиф ләһҹәләрдә данышдыгларыны биләндә мәјус олдулар!

Он бир ҝүн сүрән сәјаһәтдән сонра, августун 7-си чәршәнбә ахшамы сәһәр тездән дәниз хәстәлијинә таб ҝәтирән гардашлар, нәһајәт ки, Алманијанын Һамбург шәһәринә ајаг басдылар. Һәр јердә алты ил әввәл баша чатан мүһарибәнин изләри ҝөрүнүрдү. Ҝөрдүкләриндән мүтәәссир олан гардашлар ҝеҹә гатары илә о вахтлар офисимизин јерләшдији Висбаден шәһәринә јола дүшдүләр.

Чәршәнбә ҝүнү сүбһ тездән онларын Алманијада гаршылашдыглары илк Шаһид ади алман ады дашыјан Һанс адлы бир гардаш олду. Гардаш онлары вағзалда гаршылајыб Бет-Елә ҝәтирди вә инҝилисҹә бир кәлмә билмәјән чох әзмкар јашлы баҹынын јанында гојуб ҝетди. Ҝөрүнүр, баҹы дүшүнүрдү ки, уҹадан данышарса, дил сәрһәди арадан ҝөтүрүләҹәк. Лакин баҹынын ҝетдикҹә сәсини галдырмасына бахмајараг, һәм онун өзү, һәм дә гардашлар даһа чох мәјус олурдулар. Филиал хидмәтчиси Ерик Фрост ҝәләндә вә онлары сәмимијјәтлә инҝилисҹә саламлајанда вәзијјәт дүзәлди.

Августун сонларына јахын илк дәфә гардашлар алман дилиндә кечирилән конгресдә иштирак етдиләр. «Тәмиз ибадәт» адланан бу конгрес Франкфут-Мајн шәһәриндә кечирилмишди. Иштиракчыларын ән јүксәк сајы 47 432 нәфәр иди вә 2373 нәфәр вәфтиз олунмушду. Бу, гардашларын тәблиғ етмәк арзусуну даһа да аловландырды. Анҹаг бир нечә ҝүндән сонра Норр гардаш онларын Бет-Елдә хидмәт етмәјә тәјин едилдикләрини деди.

Рамон, һәгигәтән дә, хүсуси тәјинатлы мүждәчи олмаг истәјирди вә һәтта буна ҝөрә бир дәфә АБШ-дакы Бет-Елдә хидмәт етмәк тәклифиндән имтина етмишди. Нә Ричард, нә дә ки Билл һеч вахт Бет-Ел хидмәти барәдә фикирләшмирди. Лакин сонрадан тәјинатларындан алдыглары севинҹ онлары там әмин етди ки, Јеһова һәмишә нәјин ән јахшы олдуғуну билир. Өз арзуларымызын архасынҹа ҝетмәкдәнсә, Онун рәһбәрлијинә табе олмаг јахшыдыр! Бу дәрси мәнимсәјәнләр Јеһоваја һәр јердә вә истәнилән тәјинатда хидмәт етмәјә шад олаҹаглар.

ВЕРБОТЕН!

Алманијадакы Бет-Ел аиләсинин бир чох үзвләри Америкадан гардашларын ҝәлдијини биләндә чох севинмишдиләр. Чүнки дүшүнүрдүләр ки, нәһајәт, инҝилис дилләрини тәкмилләшдирәҹәкләр. Ҝүнләрин бир ҝүнү јемәкханада оларкән онларын бу үмидләри ҝөзләнилмәдән алт-үст олду. Фрост гардаш һәмишәки кими шөвглә алман дилиндә ҹидди бир мәсәлә барәдә данышмаға башлады. Јемәкханаја сәссизлик чөкмүшдү вә чоху башыны ашағы салмышды. Јени ҝәләнләр гардашын нә һагда данышдығыны анламасалар да, јаваш-јаваш бунун онларла бағлы олдуғуну дәрк етмәјә башладылар. Фрост гардаш уҹадан вә бир нечә дәфә вурғулајараг «ВЕРБОТЕН!» («Гадағандыр!») дејәндә онлар пәрт олдулар. Мараглыдыр, ҝөрәсән, онлар нә иш ҝөрмүшдүләр ки, гардаш белә сәрт реаксија ҝөстәрди?

Һамы өз отағына дағылышды. Сонра гардашлардан бири изаһ етди: «Сиз бизә көмәк едә биләсиниз дејә алман дилини өјрәнмәлисиниз. Мәһз буна ҝөрә Фрост гардаш деди ки, дили өјрәнәнә гәдәр сизинлә инҝилисҹә данышмаг “ВЕРБОТЕН”дир».

Бет-Ел аиләси бу ҝөстәришә дәрһал әмәл етмәјә башлады. Бу, тәзә ҝәләнләрә алман дилини өјрәнмәјә көмәк етмәклә јанашы, һәм дә онлара өјрәтмишди ки, севән гардашын вердији мәсләһәтләри илк башдан тәтбиг етмәк чәтин олса да, бу, чох вахт онларын хејринәдир. Фрост гардашын вердији мәсләһәтләр Јеһованын тәшкилатынын рифаһыны дүшүндүјүндән вә гардашларына бәсләдији мәһәббәтиндән ирәли ҝәлирдиa. Һеч дә тәәҹҹүблү дејил ки, дөрд дост ону гардаш кими севмәјә башлады!

ДОСТЛАРЫМЫЗДАН ӨЈРӘНИРИК

Үрәкләриндә Аллаһ хофу олан достларымыздан дәјәрли дәрсләр өјрәнә биләрик. Бу исә бизим Јеһова илә достлуғумузу даһа да мөһкәмләндирәҹәк. Бу дөрд дост садиг алман баҹы-гардашларындан, — онларын сајы о гәдәр чохдур ки, адбаад садаламаг мүмкүн дејил — еләҹә дә бир-бирләриндән чох шеј өјрәниб. Ричард дејир: «Лоуелл алман дилини бир аз билирди; биз бу дили ҝүҹ-бәла илә өјрәндијимиз һалда, о, демәк олар ки, әзијјәт чәкмирди. Үстәлик, о, биздән јашҹа бөјүк олдуғундан диллә вә диҝәр мәсәләләрлә бағлы мәсләһәт алмаг үчүн она үз тутурдуг». Рамон хатырлајыр: «Алманијада бир ил хидмәт етдикдән сонра исвечрәли бир гардаш илк мәзунијјәтимизи Исвечрәдәки кәнд евиндә кечирмәји тәклиф едәндә севинҹим јерә-ҝөјә сығмырды! Бу заман фикирләшдим ки, нәһајәт, ики һәфтә алман дилиндән истираһәт едәҹәјәм! Лакин Лоуелли тамамилә унутмушдум. О исрар етди ки, биз һәр сәһәр ҝүндәлик ајәни охујуб мүзакирә едәндә буну алманҹа едәк! Онун гәрарында гәти олдуғуну ҝөрәндә ганым јаман гаралды. Лакин биз чох ваҹиб дәрс — бәзән разы олмасаг да, јахшылығымызы дүшүнәнләрин рәһбәрлијинә табе олмағы өјрәндик. Илләр бојунҹа бу, бизә хејир ҝәтирмәклә јанашы, теократик ҝөстәришләрә риајәт етмәјимизи дә асанлашдырды».

Дөрд дост, Филипилиләрә 2:3 ајәсиндә дејилдији кими, һәм дә бир-бирләринин сәҹијјәви хүсусијјәтләрини гијмәтләндирмәји өјрәндиләр: «Тәвазөкар олуб башгаларыны өзүнүздән үстүн сајын». Бу сәбәбдән Лоуелл, Ричард вә Рамон онлардан даһа јахшы өһдәсиндән ҝәләҹәјини дүшүндүкләри мәсәләләрдә Билә үз тутурдулар. Лоуелл хатырлајыр: «Чәтин мәсәләнин һәлли үчүн ваҹиб вә хошаҝәлмәз аддым атмаг лазым ҝәләндә һәмишә Билә мүраҹиәт едәрдик. О, белә вәзијјәтләрин өһдәсиндән јахшы ҝәлирди. Буна ҝөрә дә һәмин иши ҝөрмәк үчүн ҹәсарәтимиз вә ја ҝүҹүмүз чатмајанда көмәји ондан истәјәрдик».

АИЛӘ СӘАДӘТИ

Гардашлар бир-бир евләндиләр. Онларын достлуғу Јеһоваја вә таммүддәтли хидмәтә олан мәһәббәтә әсасланырды, буна ҝөрә дә онлар Јеһованы һәјатларында биринҹи јерә гојмаға һазыр олан баҹыларла аилә гурмаға гәрарлы идиләр. Таммүддәтли хидмәт сајәсиндә онлар өјрәндиләр ки, вермәк алмагдан даһа јахшыдыр вә шәхси истәкләр лазыми јердә — Падшаһлығын мараглары илә мүгајисәдә, икинҹи јердә дурмалыдыр. Бу сәбәбдән онлар өз тәшәббүсләри илә таммүддәтли хидмәтә башлајан баҹыларла аилә гурдулар. Нәтиҹәдә, һәр бири хошбәхт вә мөһкәм аиләјә саһиб олду.

Достлуг вә ја никаһ мөһкәм олсун дејә мүнасибәтләрдә Јеһова да иштирак етмәлидир (Ваиз 4:12). Билл вә Рамонун һәјат јолдашлары сонрадан вәфат етдиләр. Лакин онлар сағ икән әрләринә дајаг олмуш вә бирҝә хошбәхт јашамышлар. Садиг һәјат јолдашын өз әринә верә биләҹәји дәстәкдән Лоуелл вә Ричард бу ҝүнә кими фајдаланырлар. Билл икинҹи дәфә аилә гурду; мүдрик сечим етмәси сајәсиндә о, таммүддәтли хидмәтини давам етдирди.

Сонракы илләрдә бу достларын һәрәсини тәјинатлары илә әлагәдар мүхтәлиф јерләрә, әсасән, Алманијаја, Австријаја, Лүксембурга, Канадаја вә Америка Бирләшмиш Штатларына ҝөндәрмишдиләр. Онлар әввәлки кими бирҝә истәдикләри гәдәр вахт кечирә билмирдиләр. Онлары бөјүк мәсафәләр ајырса да, һәмишә бир-бирләри илә әлагә сахлајырдылар: бирҝә ҝүлүб, бирҝә ағлајырдылар (Ром. 12:15). Бу кими достларын гәдрини билмәк лазымдыр вә онлара ади јанашылмамалыдыр. Онлар Јеһованын гијмәтли һәдијјәсидир (Сүл. мәс. 17:17). Индики дөврдә әсил достлара чох надир һалларда раст ҝәлинир! Лакин һәр бир һәгиги мәсиһчинин чохлу әсил достлары ола биләр. Јеһованын Шаһидләри олан бизләрин һәм дүнјадакы һәмиманлыларымыз, һәм дә, ән әсасы, Јеһова Аллаһ вә Иса Мәсиһ кими достларымыз вар.

Һәр биримиздә олдуғу кими, бу дөрд достун да һәјаты чәтинликләрсиз өтүшмәјиб: араларында һәјат јолдашыны итирмәјин аҹысыны чәкән, ҹидди хәстәлијин ҝәрҝинлијини јашајан, јашлы валидејнләринә бахаркән нараһатчылыг кечирән, таммүддәтли хидмәтдә ола-ола өвлад бөјүтмәјин әзијјәтинә гатлашан, јени теократик тәјинат аларкән ҝүҹлү һәјәҹан һисси кечирән олуб. Инди исә онлар гоҹалығын ҝәтирдији чәтинликләрлә үзләширләр. Анҹаг онлар өз тәҹрүбәләриндән ҝөрмүшләр ки, һәм јахында, һәм дә узагда олан достлар Јеһованы севәнләрә һәр бир проблемин өһдәсиндән мүвәффәгијјәтлә ҝәлмәјә көмәк едирләр.

ӘБӘДИЈЈӘН ДАВАМ ЕДӘҸӘК ДОСТЛУГ

Неҹә дә хошдур ки, Лоуелл 18, Рамон 12, Билл 11, Ричард исә 10 јашында өзләрини Јеһоваја һәср етмишдиләр вә 17—21 јаш арасында онларын һамысы таммүддәтли хидмәтә башламышдыр. Онлар Ваиз 12:1 ајәсинин тәшвиг етдији кими даврандылар: «Ҹаванлыг ҝүнләриндә сәни Јараданы хатырла».

Әҝәр сән ҝәнҹ мәсиһчи гардашсанса, мүмкүндүрсә, Јеһованын таммүддәтли хидмәтә башламаг чағырышына һај вер. Јеһованын лүтфү сајәсиндә сән дә, бу дөрд дост кими, хидмәтин мүхтәлиф нөвләриндә иштирак етмәјин ҝәтирдији севинҹи дада биләрсән. Сән рајон вә вилајәт нәзарәтчиси, ја да филиаллар үзрә нәзарәтчи, бет-елли, филиалын комитә үзвү, Падшаһлыг вә ја Пионер Хидмәти Мәктәбләриндә тәлиматчы ола, еләҹә дә бөјүк вә кичик конгресләрдә натиг кими чыхыш едә биләрсән. Дөрд дост неҹә дә хошбәхт иди ки, онларын фәалијјәти он минләрлә инсана фајда ҝәтириб! Бүтүн бунларын һамысы онларын ҝәнҹ икән Јеһованын Она бүтүн үрәклә хидмәт етмәк чағырышына һај вермәләри сајәсиндә мүмкүн олуб (Колос. 3:23).

Лоуелл, Ричард вә Рамон јенидән бирҝә Зелтерсдә, Алманија филиалында хидмәт едирләр. Әфсуслар олсун ки, Билл 2010-ҹу илдә вәфат етди. Һәмин вахт о, Америка Бирләшмиш Штатларында хүсуси пионер кими хидмәт едирди. Дөрд гардашын 60 иллик достлуғуна өлүм гысамүддәтли ара верди! Анҹаг Аллаһымыз Јеһова һеч вахт достларыны унутмур! Биз әмин ола биләрик ки, өлүмүн ајырдығы достлар Онун Падшаһлығынын рәһбәрлији алтында бир-бирләринә јенидән говушаҹаглар.

Өлүмүндән бир гәдәр әввәл Билл јазмышды: «Јадымда дејил ки, достлуг етдијимиз 60 ил әрзиндә арамызда хошаҝәлмәз бир һадисә баш версин. Мүнасибәтләримиз мәним үчүн һәмишә хүсуси мәна кәсб едиб». Јени дүнјада достлугларыны давам етдирәҹәкләринә зәррә гәдәр дә шүбһә етмәјән үч дост бир ағыздан: «Бу садәҹә бир башланғыҹдыр», — дедиләр.

[Һашијә]

[18–ҹи сәһифәдәки јазы]

Тәјинатларындан алдыглары севинҹ онлары там әмин етди ки, Јеһова һәмишә нәјин ән јахшы олдуғуну билир

[21–ҹи сәһифәдәки јазы]

«Јадымда дејил ки, достлуг етдијимиз 60 ил әрзиндә арамызда хошаҝәлмәз бир һадисә баш версин»

[17–ҹи сәһифәдәки шәкил]

Солдан саға: Ричард, Лоуелл, Рамон вә Билин достлуғу Ҝилеад Мәктәбиндән башламышды

[18–ҹи сәһифәдәки шәкилләр]

Үстдә: Рамон Падшаһлыг Хидмәти Мәктәбини апарыр; сағда: Ричард Висбадендәки Бет-Елдә адресографда ишләјир

[19–ҹу сәһифәдәки шәкилләр]

Үстдә: Фрост гардаш (сағда) вә башгалары Норр гардашын (солда) башчәкмәси заманы; сағда: 1952-ҹи илдә Исвечрәдә мәзунијјәтдә оларкән

[20–ҹи сәһифәдәки шәкил]

Солдан саға: Ричард, Билл, Лоуелл вә Рамон Зелтерсдә јени филиалын һәср едилмә мәрасиминдә, 1984-ҹү ил

[21–ҹи сәһифәдәки шәкил]

Солдан саға: Рамон, Ричард вә Лоуелл