«Һөрмәт һасил едән итаәтсизлик»
АЛМАНИЈАНЫН рәһбәри олдуғу дөврдә Адолф Һитлер он минләрлә мәктуб алмышды. Совет ордусу 1945-ҹи илдә Берлини әлә кечирәндә бу мәктубларын әксәријјәти Москваја апарылмыш вә узун мүддәт архивләрдә сахланылмышдыр. Һитлерә кимин вә нә мәгсәдлә јаздығыны мүәјјән етмәк үчүн тарихчи Һенрик Еберле Москва архивиндә јерләшән минләрлә мәктублары арашдырмышды. О, арашдырмаларынын нәтиҹәләрини «Һитлерә мәктублар» адлы китабында нәшр етди («Briefe an Hitler»).
«Һитлерә јазанларын арасында мүәллимләр вә тәләбәләр, раһибәләр вә кешишләр, ишсизләр вә уғурлу иш адамлары, адмираллар вә әсҝәрләр вар иди. Бәзиләри ону дүнјаја ҝәлмиш хиласкар, диҝәрләри исә залым бир инсан һесаб едирди», — дејә доктор Еберле гејд едир. Насистләрин өзбашыналығына етираз олараг Һитлерә ҝөндәрилән мәктубларын арасында дин рәһбәрләринин дә мәктублары вар идими? Вар иди, анҹаг бу, тәк-түк мәктублар иди.
Лакин Москва архивләриндә Еберле насистләрин һәрәкәтләринә гаршы етираз олараг Алманијанын мүхтәлиф јерләриндән Јеһованын Шаһидләринин Һитлерә ҝөндәрдикләри мәктублар топлусуну ашкар етди. Үмуми ҝөтүрдүкдә, тәхминән 50 ајры-ајры өлкәдән олан Јеһованын Шаһидләри Һитлерә һәмиманлылары илә пис рәфтары мүһакимә едән 20 000-ә јахын етираз мәктубу вә телеграм ҝөндәрмишләр. Минләрлә Јеһованын Шаһиди һәбс едилмиш, јүзләрлә исә ја едам олунмуш, ја да насистләрин ишҝәнҹәләринә мәруз галараг һәјатларыны итирмишләр. «Насист режиминин милјонларла гурбанлары илә мүгајисәдә бу рәгәм [Јеһованын Шаһидләриндән олан гурбанлар] чох аздыр. Амма бу, һөрмәт һасил едән коллектив вә сарсылмаз итаәтсизликдән шаһидлик едир», — дејә доктор Еберле јекун вурур.