Һәјатда әсил мүвәффәгијјәтә наил ол
«Јолун уғурлу олаҹаг вә мүвәффәгијјәт газанаҹагсан» (ЈЕШУА 1:8).
НЕҸӘ ҸАВАБ ВЕРӘРДИН?
Сүлејманы нә дәрәҹәдә уғурлу инсан һесаб етмәк олар?
Павел әсил мүвәффәгијјәтә неҹә наил олмушду?
Газандығын мүвәффәгијјәтин узунөмүрлү олмасы үчүн нә едә биләрсән?
1, 2. а) Бир чохлары мүвәффәгијјәт барәдә нә дүшүнүрләр? б) Мүвәффәгијјәтә олан бахышыны неҹә мүәјјән едә биләрсән?
ҺӘЈАТДА мүвәффәгијјәт газанмаг нә демәкдир? Бу суалла инсанлара мүраҹиәт етсән, онлардан фәргли ҹаваблар ешидәҹәксән. Мәсәлән, чохлары мүвәффәгијјәти маддијјатла, иш вә ја тәһсил саһәсиндә әлдә етдикләри наилијјәтләрлә өлчүрләр. Диҝәрләри аилә үзвләри, достлары вә иш јолдашлары илә јахшы мүнасибәтләринин олмасыны мүвәффәгијјәт һесаб едирләр. Аллаһын хидмәтчиләриндән бәзиләри исә мүвәффәгијјәти јығынҹагда тутдуглары мөвгедә вә ја газандыглары наилијјәтләрдә ҝөрә биләрләр.
2 Бәс сәнин мүвәффәгијјәтә олан бахышларын неҹәдир? Буну мүәјјән етмәк үчүн һәјатда уғурлу һесаб етдијин — ән чох һејран олдуғун вә һөрмәт бәсләдијин бир нечә нәфәрин адыны јаз. Онлар һансы ҝөзәл хүсусијјәтләрә маликдирләр? Варлы вә мәшһурдурлар? Бәлкә, ҝөркәмли шәхсләрдир? Ҹаваблар үрәјиндәкиләри ашкара чыхара биләр; бу да, өз нөвбәсиндә, сәнин гәрарларына вә мәгсәдләринә ҝүҹлү тәсир едә биләр (Лука 6:45).
3. а) Мүвәффәгијјәт әлдә етмәк үчүн Јешуа нә етди? б) Биз нәји мүзакирә едәҹәјик?
3 Ән ваҹиби Јеһованын мүвәффәгијјәтә олан нөгтеји-нәзәридир, чүнки биз Онун сајәсиндә мөвҹудуг. Јеһова Јешуаја исраиллиләри Вәд едилмиш дијара апармагла бағлы ҹидди тапшырыг верәндә она Мусанын ганунуну «ҝеҹә-ҝүндүз» охумағы вә орада јазыланлара әмәл етмәји тапшырмышды. Аллаһ ону әмин етмишди: «Онда јолун уғурлу олаҹаг вә мүвәффәгијјәт газанаҹагсан» (Јешуа 1:7, 8). Билдијимиз кими, Јешуа һәјатда мүвәффәгијјәт газанды. Бәс бизим һаггымызда нә демәк олар? Биз өз нөгтеји-нәзәримизин Јеһованын нөгтеји-нәзәри илә үст-үстә дүшдүјүнү неҹә мүәјјән едә биләрик? Инди исә ҝәлин Мүгәддәс Китабда адлары чәкилән ики нәфәрин һәјатына нәзәр салаг.
СҮЛЕЈМАН ҺӘЈАТДА УҒУР ГАЗАНМЫШДЫМЫ?
4. Нәјә ҝөрә дејә биләрик ки, Сүлејман һәјатда уғур газанмышды?
4 Сүлејман падшаһ бир чох саһәләрдә уғур газанмышды. Нәјә ҝөрә? Чүнки падшаһ она бол-бол хејир-дуа верән Јеһова Аллаһа илләр әрзиндә итаәт едир вә Ондан горхурду. Јеһова Сүлејманын Ондан нәсә диләмәсинә имкан верәндә о, халгы идарә етмәк үчүн мүдриклик истәди. Аллаһ да она һәм мүдриклик, һәм дә вар-дөвләт верди. (1 Падшаһлар 3:10—14 ајәләрини оху.) Онун мүдриклији «бүтүн шәрг халгларынын вә Мисирлиләрин һикмәтиндән үстүн иди». Сүлејманын шөһрәти «бүтүн әтраф милләтләр арасында» јајылмышды (1 Пад. 4:30, 31). Вар-дөвләти исә башындан ашырды, бир илдә она ҝәлән гызылын чәкиси тәхминән 25 тон иди! (2 Салн. 9:13). О, дипломатија, тикинти вә тиҹарәт саһәләриндә әсил пешәкар иди. Бәли, Аллаһын ҝөзүндә доғру оланы етдији мүддәтдә Сүлејман уғур газанырды (2 Салн. 9:22—24).
5. Аллаһын гаршысында кимин мүвәффәгијјәтли олдуғуна даир Сүлејман һансы гәнаәтә ҝәлмишди?
5 Сүлејманын «Ваиз» китабында јаздығы сөзләрдән ҝөрүнүр ки, бир чохлары кими, о, јалныз зәнҝин вә ја шан-шөһрәт саһиби олан инсанларын наилијјәт вә севинҹ газандыгларыны дүшүнмүрдү. О, фикрини белә ифадә етмишди: «Мән билирәм ки, инсан үчүн шадлыг етмәкдән вә өмрү боју хејирхаһлыг етмәкдән јахшы шеј јохдур. Һәм дә һәр кәсин јејиб-ичмәји вә ҝөрдүјү ишдән зөвг алмағы Аллаһын бәхшишидир» (Ваиз 3:12, 13). Сүлејман баша дүшүрдү ки, јалныз Аллаһын рәғбәтини газанан, Онунла јахшы мүнасибәти олан инсан мәналы һәјат сүрә биләр. Бу сәбәбдән Сүлејман һаглы олараг демишди: «Һәр шеј ашкар олду, нәтиҹә бундан ибарәтдир: Аллаһдан горх, Онун әмрләрини јеринә јетир. Бәли, инсанын әсас вәзифәси будур» (Ваиз 12:13).
6. Сүлејманын нүмунәси бизә әсил мүвәффәгијјәтин нә илә өлчүлдүјүнү баша дүшмәјә неҹә көмәк едир?
6 Узун илләр Сүлејман Аллаһ горхусу илә јеримишди. Мүгәддәс Китабдан охујуруг ки, о, «атасы Давудун ганунларына әмәл едәрәк Рәбби севирди» (1 Пад. 3:3). Сәнҹә бу, әсил мүвәффәгијјәт дејилди? Аллаһын ҝөстәришилә Сүлејман һәгиги ибадәт үчүн мөһтәшәм мәбәд тикмиш вә Мүгәддәс Јазылара дахил олан үч китаб јазмышды. Биздән ејни шејләри етмәк тәләб олунмаса да, Сүлејманын Аллаһа садиг галдығы вахтларда гојдуғу нүмунә бизә әсил мүвәффәгијјәтин нәдә олдуғуну баша дүшмәјә вә она наил олмаға көмәк едәҹәк. Сүлејман Аллаһдан илһам алараг бу ҝүн инсанларын әксәријјәтинин уғур кими гәләмә вердији шејләрин — вар-дөвләтин, мүдриклијин, шан-шөһрәтин вә истедадын пуч олдуғуну јазмышды. Бу кими шејләр, һәгигәтән дә, бошдур, «күләк далынҹа гачмаға» бәнзәјир. Мәҝәр вар-дөвләт һәриси олан инсанларын ҝетдикҹә даһа чох газанмаг истәдикләрини ҝөрмүрүк? Бундан әлавә, онлар вар-дөвләтләринә ҝөрә чох нараһат олурлар. Үстәлик, онларын вар-дөвләти нә вахтса башгаларына галаҹаг. (Ваиз 2:8—11, 17; 5:10—12 ајәләрини оху.)
7, 8. Сүлејманын дөнүк чыхмасына нә сәбәб олду вә бу нә илә нәтиҹәләнди?
7 Билдијимиз кими, Сүлејман сонрадан салеһлик јолундан узаглашды. Аллаһын Кәламында гејд олунур: «Гоҹалыг чағында [арвадлары] онун үрәјини башга аллаһлара тәрәф аздырдылар вә онун үрәји, атасы Давуддан фәргли олараг, Аллаһы Рәббә садиг дејилди... Сүлејман Рәббин ҝөзүндә пис олан ишләр етди» (1 Пад. 11:4—6).
8 Буна ҝөрә дә Јеһова һаглы олараг Сүлејмана гәзәбләниб деди: «Сәнә әмр етдијим әһдимә вә гајдаларыма әмәл етмәдијин үчүн Мән һөкмән падшаһлығыны әлиндән чәкиб алаҹағам вә ону сәнин гулуна верәҹәјәм» (1 Пад. 11:11). Неҹә дә аҹынаҹаглы һалдыр! Сүлејман һәјатынын бир чох саһәләриндә уғур газанса да, сонда Јеһованы мәјус етди. О, һәјатда ән ваҹиб олан шеји — Јеһоваја садиглијини итирди. Һәр биримиз өзүмүздән сорушмалыјыг: «Һәјатда уғур газанмаг үчүн Сүлејманын нүмунәсиндән өјрәндикләрими тәтбиг едәҹәјәмми?»
ӘСИЛ МҮВӘФФӘГИЈЈӘТ
9. Дүнјанын нөгтеји-нәзәринҹә Павел һәјатда уғур газанмышдымы? Изаһ един.
9 Һәвари Павелин һәјаты Сүлејман падшаһын һәјатындан тамамилә фәргли иди. Мисал үчүн, Павелин нә фил сүмүјүндән тахты варды, нә дә о, падшаһларла бир зијафәтдә отурурду. Әксинә, онун аҹ-сусуз вә сојугда чылпаг галдығы вахтлар олмушду (2 Кор. 11:24—27). Исаны Мәсиһ кими гәбул етдикдән сонра Павел Јәһуди дининдә һеч бир шәрәфли мөвгејә малик дејилди. Үстәлик, Јәһуди дининин рәһбәрләри она нифрәт едирдиләр. О һәбс олунмуш, шаллагланмыш, чубугла дөјүлмүш вә даш-галаг едилмишди. Павел өзүнүн вә һәмиманлыларынын тәһгир вә тәгиб олундуғуну, еләҹә дә онлара бөһтан атылдығыны гејд едәрәк јазмышды: «Индијәдәк дүнјанын ҝөзүндә зир-зибил вә тулланты кимијик» (1 Кор. 4:11—13).
10. Нәјә ҝөрә демәк олар ки, Павел мүвәффәгијјәтә етинасызлыг ҝөстәрәрәк ону рәдд етди?
10 Ҝөрүнүр, һәвари Павел кими танынан Шаул адлы ҝәнҹин гаршысында ҝениш имканлар ачыг иди. Еһтимал ки, бу ҝәнҹ зијалы аиләсиндә доғулмуш, еләҹә дә һөрмәтли мүәллим Гамалиелдән тәһсил алмышды. Сонралар о, өзү һагда белә демишди: «Јәһудиликдә бир чох һәмјашыдымдан хејли габаға ҝетмишдим» (Галат. 1:14). Ибрани вә јунан дилләрини мүкәммәл билән Шаул Рома вәтәндашлығы сајәсиндә бир чохларынын наил олмаг истәдикләри имтијаз вә һүгуглара малик иди. Әҝәр о, дүнјада уғур газанмағы сечсәјди, чох еһтимал ки, јүксәк мөвге газанар вә мадди фираванлыг әлдә едәрди. О исә әксинә, чохларынын, һәтта бәзи гоһумларынын ҝөзүндә әсил ағылсызлыг кими ҝөрүнән бир јолу сечди. Нәјә ҝөрә?
11. Павел һансы мәгсәдләрә дәјәр верирди вә нәјә ҝөрә?
11 Павел Јеһованы севир вә Онун рәғбәтини газанмағы вар-дөвләтдән вә шан-шөһрәтдән үстүн тутурду. Һәгигәт һаггында дәгиг билијә јијәләндикдән сонра Павел дүнјанын рәдд етдији фидјә гурбанлығыны, тәблиғ хидмәтини вә ҝөјләр һәјатына олан үмиди гијмәтләндирмәјә башлады. О, Шејтанын галдырдығы мүбаһисәли мәсәләдән аҝаһ иди. Шејтан белә бир иддиа ирәли сүрмүшдү ки, инсанлары Аллаһа ибадәтдән узаглашдыраҹаг (Әјј. 1:9—11; 2:3—5). Гаршылашдығы сынаглардан асылы олмајараг, Павел Аллаһа садиг галмаға вә Онун јолунда һәр шејә таб ҝәтирмәјә гәти гәрарлы иди. Бу, дүнјанын мүвәффәгијјәтә олан бахышынын там әкси иди.
12. Сән нәјә ҝөрә үмидини Аллаһа бағлајырсан?
12 Сән дә, Павел кими, Аллаһа садиг галмаға гәтијјәтлисәнми? Дүздүр, садиглији горумаг һеч дә асан дејил, анҹаг бунун сајәсиндә Јеһованын хејир-дуасыны вә рәғбәтини газанмаг мүмкүндүр. Бу исә инсан үчүн әсил уғурдур (Сүл. мәс. 10:22). Биз артыг индидән фајда әлдә едирик, ҝәләҹәкдә исә даһа чох хејир-дуалар алаҹағымыза әмин ола биләрик. (Марк 10:29, 30 ајәләрини оху.) Беләликлә, үмидимизи «ҝәлди-ҝедәр вар-дөвләтә јох, һәјатдан һәзз алмағымыз үчүн бизи һәр шејлә бол-бол тәмин едән Аллаһа» бағламаға там әсасымыз вар. Биз өзүмүз үчүн саламат галаҹаг хәзинә јығмалы, јәни әсил һәјатдан бәрк-бәрк јапышмагдан өтрү ҝәләҹәк үчүн мөһкәм тәмәл гојмалыјыг (1 Тим. 6:17—19). Бәли, тамамилә әмин ола биләрик ки, индики дөврдән јүз илләр, мин илләр, һәтта даһа чох вахт кечсә белә, ҝеријә бахдыгда: «Мән, һәгигәтән дә, әсил мүвәффәгијјәт јолуну сечмишәм!» — дејә биләҹәјик.
ХӘЗИНӘН ҺАРАДАДЫР?
13. Хәзинә јығмагла бағлы Иса һансы мәсләһәти вериб?
13 Иса хәзинә јығмаг барәдә демишди: «Өзүнүзә јердә хәзинә топламаға сон гојун. Бурада ону ҝүвә јејир вә пас хараб едир, оғрулар да ҝириб оғурлајыр. Әвәзиндә хәзинәнизи ҝөјдә топлајын. Орада ону нә ҝүвә јејир, нә пас хараб едир, нә дә оғрулар ҝириб оғурлајыр. Чүнки хәзинән һарададырса, үрәјин дә орада олаҹаг» (Мат. 6:19—21).
14. Нәјә ҝөрә јер үзүндә хәзинә топламаг ағылсызлыгдыр?
14 Инсанын јер үзүндә јыға биләҹәји хәзинә јалныз пулдан ибарәт дејил. Мисал үчүн, бура Сүлејманын һаггында јаздығы вә инсан ҝөзүндә мүвәффәгијјәт сајылан шејләрә — нүфузу, шан-шөһрәти вә ја һакимијјәти аид етмәк олар. Сүлејманын «Ваиз» китабында јаздығы кими, Иса да гејд етмишди ки, јер үзүндә јығылан хәзинә әбәди дејил. Јәгин, сән өзүн дә бу кими хәзинәләрин мүвәггәти олдуғунун вә асанлыгла итирилдијинин шаһиди олмусан. Профессор Дејл Брунер бу нөв хәзинә һаггында јазырды: «Јахшы мәлумдур ки, шан-шөһрәт фанидир. Кечән шәнбәнин гәһрәманы ҝәлән мөвсүм өз мәшһурлуғуну итирә биләр. Бу ил мадди ҹәһәтдән уғур газанан инсан ҝәлән ил мүфлис ола биләр... [Иса] инсанлары севдији үчүн онлары мүвәггәти иззәтин ҝәтирдији гачылмаз мәјуслугдан чәкиндирирди. Белә мүвәффәгијјәтин өмрү аз олур. Иса шаҝирдләринин мәјус олмаларыны истәмирди. “Һәр ҝүн башда отуранлардан кимин үчүнсә дүнја алт-үст олур”». Дүздүр, бир чохлары бу сөзләрлә разылашырлар, бәс нә гәдәр инсан бу ҝерчәклијин һәјатына тәсир етмәсинә јол верир? Сән неҹә, јол верәҹәксән?
15. Биз нә ҹүр мүвәффәгијјәтә ҹан атмалыјыг?
15 Бәзи дин хадимләри тәблиғ едирләр ки, мүвәффәгијјәтә ҹан атмаг дүзҝүн дејил. Лакин Иса уғура ҹан атмағын тамамилә јанлыш олдуғуну өјрәтмирди. Әксинә, о, шаҝирдләрини ҝөјдә әбәди хәзинә јығмаға тәшвиг етмәклә бүтүн ҝүҹләрини мәһз буна јөнәлтмәји мәсләһәт ҝөрүрдү. Бизим ән бөјүк истәјимиз Јеһованын ҝөзүндә уғур газанмаг олмалыдыр. Исанын сөзләри ҝөстәрир ки, бизим јердә вә ја ҝөјдә хәзинә јығмаг сечимимиз вар. Анҹаг ајдын мәсәләдир ки, һәр бир инсан үрәјиндә олан, јәни онун үчүн дәјәрли олан мәгсәдләрә ҹан атаҹаг.
16. Биз нәјә там әмин ола биләрик?
16 Әҝәр биз Јеһованы разы салан мәгсәдләрә ҹан атырыгса, әмин ола биләрик ки, О, бизим нәләрә еһтијаҹ дујдуғумузу ҝөрәҹәк. О, һәвари Павел кими, бизим дә мүвәггәти олараг аҹ-сусуз галмағымыза јол верә биләр (1 Кор. 4:11). Бунунла белә, биз Исанын нөвбәти мәсләһәтинә әмәл етмәлијик: «“Нә јејәҹәјик?”, “нә ичәҹәјик?” вә ја “нә ҝејәҹәјик?”, — дејә һеч вахт нараһат олмајын. Чүнки бүтүн бунларын далынҹа башга милләтләр гачыр. Сизин сәмави Атаныз исә бүтүн бунлара еһтијаҹ дујдуғунузу билир. Беләликлә, падшаһлығы вә Аллаһын салеһлијини һәјатынызда һәмишә биринҹи јерә гојун, онда бүтүн бунлар да сизә вериләҹәк» (Мат. 6:31—33).
АЛЛАҺЫН ҜӨЗҮНДӘ УҒУР ГАЗАН
17, 18. а) Әсил мүвәффәгијјәт нәдән асылыдыр? б) Бәс нәдән асылы дејил?
17 Ҝәлиб чатдыг мәсәләнин мәғзинә: сөзүн әсил мәнасында уғурлу олмағымыз дүнјанын ҝөзүндә әлдә етдијимиз наилијјәтләрдән вә тутдуғумуз мөвгедән асылы дејил. Үстәлик, әсил мүвәффәгијјәт мәсиһчи јығынҹағында мүәјјән мәсулијјәтләрин олуб-олмамасы илә дә өлчүлмүр. Анҹаг бу ҹүр хејир-дуалара әсил мүвәффәгијјәтин әсасыны тәшкил едән Аллаһа итаәткарлығын вә садиглијин сајәсиндә саһиб ола биләрик. Чүнки Аллаһын Кәламында дејилир: «Нөкәрбашыдан... сәдагәт тәләб олунур» (1 Кор. 4:2). Вә биз даима сәдагәтли олмалыјыг. Иса демишди: «Мәним адыма ҝөрә һамы сизә нифрәт едәҹәк. Анҹаг ахыра кими дөзән хилас олаҹаг» (Мат. 10:22). Јәгин, разылашаҹагсыныз ки, хилас мүвәффәгијјәтин данылмаз сүбутудур.
18 Јухарыда дејиләнләрин үзәриндә дүшүнмәклә ҝөрәҹәксән ки, Аллаһа садиглијин шан-шөһрәтлә, тәһсиллә, мадди фираванлыгла вә ја ҹәмијјәтдәки мөвге илә һеч бир әлагәси јохдур. Ејни заманда, садиглик ағылдан, баҹарыг вә габилијјәтдән асылы дејил. Дүшдүјүмүз бүтүн вәзијјәтләрдә Аллаһа садиглијимизи сүбута јетирә биләрик. Аллаһын биринҹи әсрдәки халгы арасында зәнҝин оланлары да варды, касыб оланлары да. Павел зәнҝин мәсиһчиләрә белә бир мәсләһәт вермишди: «Јахшылыг етсинләр, хејирли ишләрлә зәнҝин олсунлар, сәхавәтли вә әл тутмаға һазыр олсунлар». Бәли, зәнҝинләр дә, јохсуллар да әсил һәјатдан бәрк-бәрк јапышмалы идиләр (1 Тим. 6:17—19). Бүтүн бунлар бу ҝүн дә актуалдыр. Һәр биримиз ејни имкана вә мәсулијјәтә маликик: биз садиг галмалы вә «хејирли ишләрлә зәнҝин» олмалыјыг. Әҝәр белә едириксә, биз Јараданымызын ҝөзүндә уғур газанаҹаг вә Ону разы салдығымыз үчүн севинҹ әлдә едәҹәјик (Сүл. мәс. 27:11).
19. Мүвәффәгијјәт әлдә етмәк үчүн нә етмәк әзминдәсән?
19 Бүтүн вәзијјәтләри нәзарәт алтында сахламаг сәнин әлиндә олмаја биләр, анҹаг мүхтәлиф вәзијјәтләрлә үзләшәндә онлара неҹә реаксија ҝөстәрәҹәјинә нәзарәт едә биләрсән. Шәраитиндән асылы олмајараг, чалыш, Аллаһа садиглијини горујасан. Буна ҝөрә сәј ҝөстәрмәјә дәјәр. Әмин ол ки, инди вә әбәдијјәт бојунҹа Јеһова сәни бол-бол хејир-дуаландыраҹаг. Исанын мәсһ олунмуш мәсиһчиләрә үнванладығы сөзләри һеч вахт унутма: «Һәтта өлмәк лазым ҝәлсә дә, садиг гал вә мән сәнә һәјат таҹыны верәҹәјәм» (Вәһј 2:10). Бах бу әсил мүвәффәгијјәтдир!
[6–ҹы сәһифәдәки шәкил]
Дүнјанын нөгтеји-нәзәринҹә, Павел мүвәффәгијјәтә наил олмушду
[7–ҹи сәһифәдәки шәкил]
Павел әсил мүвәффәгијјәтә наил олмушду