Мүгәддәс Китабдан мөвһуми мәгсәдләрлә истифадә етмәјин
«АЛЛАҺЫН сөзү ҹанлы вә гүдрәтлидир» (Ибр. 4:12). Бунунла һәвари Павел Аллаһын сөзүнүн үрәкләрә тәсир едән вә һәјатлары дәјишән гүдрәтә малик олдуғуну вурғулајыр.
Лакин габагҹадан пејғәмбәрлик едилдији кими, һәвариләрин өлүмүндән сонра дөнүклүк көк саланда артыг Мүгәддәс Китабын чатдырдығы хәбәрин ҝүҹүнә даир мүхтәлиф фикирләр јаранды (2 Пет. 2:1—3). Бир мүддәтдән сонра килсә башчылары Аллаһын Кәламынын сеһирли гүввәјә малик олдуғуну иддиа етмәјә башладылар. Профессор Һарри Гамбл «Јунанҹа Мүгәддәс Јазылардан мөҹүзәви шәкилдә истифадә» едилдији барәдә јазырды. О гејд едирди ки, үчүнҹү әсрдә килсә атасы Ориҝен белә бир фикир ирәли сүрмүшдү: «Мүгәддәс сөзләри садәҹә ешитмәк белә артыг инсана мүсбәт тәсир ҝөстәрир. Әҝәр бүтпәрәстләрин сеһрбазлыг сөзләри һәр һансы ҝүҹә маликдирсә, онда ҝөр мүгәддәс јазылардакы әсил илаһи сөзләр нә гәдәр бөјүк гүввәјә малик олмалыдыр». Дөрдүнҹү әсрдә Јоһаннес Хрисостомос јазмышды ки, «иблис Инҹилин олдуғу евә јахынлашмаға ҹәсарәт едә билмәз». О, бәзиләринин Инҹилин мүәјјән һиссәләрини ҝүҹлү талисман кими бојунларындан асдыгларыны да гејд етмишди. Даһа сонра профессор Гамбл әлавә етмишди ки, католик илаһијјатчысы Августин «башағрылары оланда Јәһјанын Мүждәсини јастығын алтына гојуб јатмаға нормал бахырды». Беләликлә, Мүгәддәс Китаб ајәләриндән сеһирбазлыг етмәк мәгсәдилә истифадә олунурду. Бәс Мүгәддәс Китабдан талисман вә ја уғур ҝәтирән һәмаил кими истифадә етмәјиниздән асылы олмајараг, о, сизи писликләрдән горујаҹагмы?
Еһтимал ки, Мүгәддәс Китабдан јанлыш тәрздә истифадә етмәјин ән ҝениш јајылмыш үсулларындан бири онунла фала бахмагдыр. Бу нә демәкдир? Бу, еһтијаҹ дујдуғу рәһбәрлији алаҹағына үмид едәрәк истәнилән китабы, әксәр һалларда Мүгәддәс Китабы ҝөзәјары ачыб гаршысына чыхан илк мәлуматы охумаг демәкдир. Мисал үчүн, профессор Гамблын сөзләринә ҝөрә, бир дәфә Августин гоншу евдән: «Ҝөтүр оху, ҝөтүр оху», — дејән ушағын сәсини ешидәндә буну илаһи бир ҝөстәриш кими гәбул едәрәк Мүгәддәс Китабы ачыб ҝөзүнә саташан илк ајәни охумушду.
Јәгин, чәтинликлә үзләшәндә Аллаһа дуа едән, сонра да проблемләрини һәлл етмәкдә онлара көмәк едәҹәјинә инанараг Мүгәддәс Китабы бәхтәбәхт ачыб ҝөзләринә саташан илк ајәни охујан инсанлар һагда ешитмисиниз. Ола билсин, онлар буну јахшы нијјәтдән ирәли ҝәләрәк едирләр, анҹаг мәсиһчиләр Мүгәддәс Китабын рәһбәрлијини бу ҹүр ахтармалы дејилләр.
Иса шаҝирдләрини әмин етмишди ки, онлара «көмәкчи, јәни... мүгәддәс руһ» ҝөндәрәҹәк. О әлавә етмишди: «Мүгәддәс руһ һәр шеји сизә өјрәдәҹәк вә сизә дедијим бүтүн сөзләри јадыныза салаҹаг» (Јәһ. 14:26). Бахыҹылыгда исә Мүгәддәс Китаб биликләринә јијәләнмәк тәләб олунмур.
Дүздүр, Мүгәддәс Китабдан бахыҹылыг вә диҝәр мөвһуми мәгсәдләр үчүн ҝениш истифадә олунур. Һалбуки Аллаһын Кәламы фалчылығы мүһакимә едир (Лев. 19:26; Ганун. т. 18:9—12; Һәв. иш. 19:19). Сөзсүз ки, «Аллаһын сөзү ҹанлы вә гүдрәтлидир», буна бахмајараг, биз ондан мәһарәтлә истифадә етмәји баҹармалыјыг. Мүгәддәс Китабдан мөвһуми шәкилдә истифадә етмәк јох, ондан дәгиг биликләр әлдә етмәк инсанларын һәјатыны јахшылашдырыр. Бу ҹүр билијә јијәләнмәк чохларына јүксәк әхлаг нормаларына саһиб олмаға, зәрәрли һәјат тәрзиндән имтина етмәјә, аилә һәјатыны мөһкәмләндирмәјә вә Мүгәддәс Китабын Мүәллифи илә јахын мүнасибәтләр гурмаға көмәк едир.