«Онлар истәјирдиләр ки, өјрәндикләримин һәгигәт олдуғуна өзүм әмин олум»

АВТОБИОГРАФИЈА.

Доминикан Республикасынын Санто-Доминго шәһәриндә дүнјаја ҝөз ачмышам. Аиләдә үч гардаш бир баҹы олмушуг, ушаглардан ән балаҹасы мән идим. Валидејнләрим зијалы инсанлар иди вә бизи сағлам мүһитдә бөјүтмәк истәјирдиләр. Мән доғулмамышдан дөрд ил әввәл валидејнләрим ҝәнҹ мормон миссионерләри илә растлашмышдылар. Онларын сәлигәли ҝејими вә нәзакәтлилији валидејнләримә бөјүк тәсир бағышлады, буна ҝөрә дә онлар Иса Мәсиһин Ахыр Заман Мүгәддәсләринин Килсәсинә, јәни Мормон килсәсинә гошулмаг гәрарына ҝәлдиләр. Беләликлә, аиләмиз бу өлкәдә һәмин дини гәбул едән илк аиләләрдән бири олду.

Ушаглыгдан килсәдә кечирилән әјләнҹә тәдбирләриндә иштирак етмәк хошума ҝәлирди. Аилә вә әхлаг дәјәрләринә гијмәт вердији үчүн килсәјә һөрмәтлә јанашырдым. Мормон олмағымла фәхр едирдим вә истәјирдим ки, миссионер олум.

18 јашым оланда аиләмиз јахшы университетдә тәһсил алым дејә АБШ-а көчдү. Тәхминән бир ил сонра Јеһованын Шаһидләри олан халам вә һәјат јолдашы бизә, Флоридаја гонаг ҝәлдиләр. Онлар бизә өзләри илә бирликдә Мүгәддәс Јазыларын мүзакирә едиләҹәји конгресә ҝетмәји тәклиф етдиләр. Орада јығышан инсанларын Мүгәддәс Китабдан ајәләри ачыб охумалары, гејдләр апармалары мәнә дәрин тәсир бағышлады. Онлардан гәләм-кағыз истәјиб, мән дә гејдләр апармаға башладым.

Халамла әри миссионер олмаг истәјими билирдиләр. Конгресдән сонра онлар дедиләр ки, Мүгәддәс Китабдан мәнә бәзи шејләри өјрәнмәјә көмәк едә биләрләр. Бу фикир хошума ҝәлди, чүнки о вахт Мүгәддәс Китабдан чох Мормонун Китабындан мәлуматым варды.

МҮГӘДДӘС КИТАБ ҺӘЈАТЫМЫ ДӘЈИШДИ.

Һәр дәфә телефон васитәсилә Мүгәддәс Јазылары арашдыранда халамла әри мәни тәшвиг едирдиләр ки, етигадларымы Мүгәддәс Китаб тәлимләри илә мүгајисә едим. Онлар истәјирдиләр ки, өјрәндикләримин һәгигәт олдуғуна өзүм әмин олум.

Мормонларын бәзи тәлимләринә кор-коранә инанырдым вә онларын Мүгәддәс Јазылара ујғун олуб-олмадығыны билмирдим. Халам мәнә Јеһованын Шаһидләри тәрәфиндән дәрҹ едилән «Ојанын!» журналынын 1995-ҹи ил 8 нојабр сајыны ҝөндәрди. Һәмин журналда мормонларын етигад вә тәлимләри барәдә мәгаләләр варды. Баша дүшәндә ки, мормонларын бир чох тәлимләриндән бихәбәрәм, лап мәәттәл галдым. Журналда јазыланларын нә гәдәр доғру олуб-олмадығыны дәгигләшдирмәк үчүн мормонларын рәсми веб-сајтына дахил олдум. Журналда охудугларым дүз чыхды. Мормонларын Јута штатындакы музејләринә баш чәкәндән сонра исә әминлијим даһа да артды.

Мән һәмишә инанмышдым ки, Мүгәддәс Китабла Мормонун Китабы бир-бирини тамамлајыр. Анҹаг Мүгәддәс Китабы даһа диггәтлә охумаға башлајанда мормонларын тәлимләринин Мүгәддәс Китаба зидд ҝетдијини ашкарладым. Мәсәлән, Мүгәддәс Китабда дејилир ки, өлүмдән сонра һәјат јохдур (Ваиз 9:5, 10). Лакин Мормон Китабынын Алма 42:9 ајәсиндә бунун әкси дејилир.

Тәлимләрдәки зиддијјәтләрдән башга, мормонларын милләтпәрәст идејалары да мәни нараһат едирди. Мәсәлән, мормонлар өјрәдирләр ки, Еден бағы АБШ-ын Миссури штатынын Ҹексон даирәсиндә јерләширди. Килсә пејғәмбәрләри дејирләр ки, «Аллаһын Падшаһлығы дүнјаны идарә етмәјә башлајанда азадлыг вә бәрабәрлик дирәјиндә Америка Бирләшмиш Штатларынын ләкәсиз бајрағы вүгарла далғаланаҹаг».

Мән фикирләширдим: «Мәним доғулдуғум өлкә дә ичиндә олмагла, бүтүн өлкәләрин агибәти неҹә олаҹаг?» Ҝүнләрин бир ҝүнү миссионер олмаг үчүн тәлим алан бир ҝәнҹ мормон мәнә зәнҝ едәндә бу һагда онунла ачыг сөһбәт етдим. Ондан сорушдум: «Әҝәр сәнин өлкән һәр һансы бир өлкә илә мүһарибә етсә, орадакы диндашларына гаршы вурушаҹагсан?» О, «бәли» дејәндә чох тәәҹҹүбләндим! Мәнсуб олдуғум динин тәлимләрини даһа дәриндән арашдырдым вә Мормон килсәсинин мөтәбәр рәһбәрләринә суаллар вердим. Ҹавабында онлар дејирдиләр ки, суалларым мүәјјән сирләрлә бағлыдыр вә нур артанда бу сирләр ҝүн ишығына чыхаҹаг.

Онларын вердији изаһат мәни мәјус етди. Бу, мәни өзүмү јохламаға вә мормон миссионери олмаг истәјими тәһлил етмәјә тәшвиг етди. Баша дүшдүм ки, бу, хејријјәчиликлә мәшғул олмаг истәјимдән ирәли ҝәлирди. Һәмчинин ҹәмијјәтдә һөрмәт газанмаг истәјирдим. Аллаһа ҝәлдикдә исә, Онун һаггында, демәк олар ки, һеч нә билмирдим. Әввәлләр тез-тез Мүгәддәс Китабы әлимә ҝөтүрүб вәрәгләсәм дә, онун әсил дәјәрини дәрк етмирдим. Аллаһын Јер күрәси вә бәшәријјәт үчүн нијјәти барәдә һеч бир мәлуматым јох иди.

МӘНӘ ФАЈДАСЫ.

Јеһованын Шаһидләри илә Мүгәддәс Китабы арашдырмағын сајәсиндә чох шеј өјрәндим: Аллаһын адыны, өлүмдән сонра инсанла нә баш вердијини, Иса пејғәмбәрин Аллаһын нијјәтиндәки ролуну билдим. Нәһајәт ки, бу һејрәтамиз китабла јахындан таныш олдум. Өјрәндијим һәгигәтләри башгалары илә бөлүшмәк мәним хошума ҝәлирди. Аллаһын варлығына һеч вахт шүбһә етмирдим, лакин инди ән јахын дост кими дуада Она үрәјими ачырам. 2004-ҹү ил ијул ајынын 12-и вәфтиз олуб Јеһованын Шаһиди олдум. Алты ајдан сонра исә таммүддәтли хидмәтә башладым.

Мән беш ил Јеһованын Шаһидләринин Бруклиндәки (Нју–Јорк) мәркәзи идарәсиндә хидмәт етдим. Чох шадам ки, бүтүн дүнјада милјонларла инсанлара фајда ҝәтирән Мүгәддәс Китабын вә она әсасланан нәшрләрин чап едилмәсиндә иштирак етмәк имканым олуб. Һал-һазырда исә инсанлара Аллаһ һаггында өјрәнмәјә көмәк етмәјә давам едирәм.