Јеһованы севәнләр «һеч нә илә бүдрәмәзләр»

1.. Гәтијјәтли идманчынын нүмунәси тәслим олмамаг әзмимизи неҹә мөһкәмләндирир?

МЕРИ ДЕКЕР еркән јашларындан гачыш үзрә дүнја сәвијјәли идманчы иди. О, 1984-ҹү илин Јај Олимпија ојунларында 3000 метр мәсафәјә гачыш үзрә јарышда гызыл медал газанмаға иддиалы иди. Лакин финиш хәттини кечмәк она нәсиб олмады. О, идманчылардан биринин ајағына илишиб јарыјолда јыхылды вә јарышы тәрк етмәли олду. Ҝөз јашлары ичиндә вә јаралы һалда ону јарыш мејданындан апардылар. Бунунла белә, Мери тәслим олмады. Бир илдән сонра, 1985-ҹи илдә о, гачыш үзрә јарышлара јенидән гошулду вә гадынлар арасында јени дүнја рекордуна имза атды.

2. Һансы мәнада һәгиги мәсиһчиләр јарышда иштирак едир вә биз диггәтимизи нәјә јөнәлтмәлијик?

² Бир мәсиһчи кими, биз дә мәҹази мәнада гачыш үзрә јарышда иштирак едирик. Диггәтимизи гачышда галиб ҝәлмәјә јөнәлтмәлијик. Бизим иштирак етдијимиз јарыш сүрәтин әсас рол ојнадығы јахын мәсафәјә гачыш дејил. Һеч јаваш-јаваш гачараг һәрдән фасилә етмәјә дә бәнзәмир. Әксинә, бу, гәләбә газанмаг үчүн дөзүмлүлүк тәләб едән марафон јарышларына бәнзәјир. Һәвари Павел идман јарышлары илә мәшһур олан Коринф шәһәриндәки баҹы-гардашлара мәктубунда мәсиһчи һәјатыны гачышла мүгајисә едәрәк јазмышды: «Мәҝәр билмирсиниз ки, јарышда иштирак едән гачышчыларын һамысы гачыр, анҹаг јалныз бири мүкафата лајиг ҝөрүлүр? Сиз дә елә гачын ки, мүкафаты аласыныз» (1 Кор. 9:24).

3. Әбәди һәјат уғрунда јарышда иштирак едәнләрин һамысынын мүкафат алмасы неҹә мүмкүндүр?

³ Мүгәддәс Китаб бизи символик јарышда иштирак етмәјә тәшвиг едир. (1 Коринфлиләрә 9:25—27 ајәләрини оху.) Бу јарышын мүкафаты мәсһ олунмушлар үчүн ҝөјдә, диҝәр иштиракчылар үчүн исә јер үзүндә әбәди һәјатдыр. Бир чох атлетик јарышлардан фәргли олараг, бу јарышда иштирак едәнләрин вә сона гәдәр гачанларын һамысы мүкафат алыр (Мат. 24:13). Јалныз гајдалары позан вә ја финиш хәттинә чатмајан удузур. Бундан әлавә, јалныз бу јарышын мүкафаты әбәди һәјатдыр.

4. Әбәди һәјат уғрунда јарышда һансы чәтинликләрлә үзләшә биләрик?

⁴ Финиш хәттини кечмәк елә дә асан дејил. Бунун үчүн низам-интизам гајдаларына риајәт етмәк вә мәгсәдјөнлү олмаг тәләб олунур. Финиш хәттини бир дәфә дә олсун бүдрәмәдән кечмәјә мүвәффәг олан јеҝанә шәхс Иса Мәсиһ олуб. Анҹаг онун шаҝирди Јагуб јазмышды ки, Мәсиһин давамчыларынын һәр бири дәфәләрлә сәһвә јол верир (Јаг. 3:2). Бу, һәгигәтән дә, беләдир. Һәр биримиз һәм өзүмүзүн, һәм дә башгаларынын гејри-камиллијиндән әзијјәт чәкирик. Буна ҝөрә бәзән бүдрәјиб мүвазинәтимизи итиририк. Һәтта јыхылырыг, амма ајаға галхыб гачмаға давам едирик. Бәзиләри елә мөһкәм јыхылыр ки, ајаға галхмаг вә финиш хәттинә доғру мәсафәни гәт етмәк үчүн башгаларынын көмәјинә еһтијаҹ дујур. Бу, дәфәләрлә бүдрәмәјимизин вә ја јыхылмағымызын гачылмаз олдуғуну ҝөстәрир (1 Пад. 8:46).

БҮДРӘСӘН ДӘ, ЈАРЫШЫ ТӘРК ЕТМӘ

5, 6. а) Нә үчүн мәсиһчи «һеч нә илә бүдрәмәз» вә она ајаға галхмаға нә көмәк едәр? б) Нәјә ҝөрә бәзиләри бүдрәдикдән сонра ајаға галха билмирләр?

⁵ Јәгин, сиз киминсә сәһвә јол вердијини, јахуд Јеһова илә мүнасибәтләринин зәифләдијини ҝөстәрмәк үчүн «бүдрәмәк» вә «јыхылмаг» сөзләрини ишләтмисиниз. Мүгәддәс Китабдан олан бу сөзләр һәмишә ејни мәнада ишләнмир. Мисал үчүн, Сүлејманын мәсәлләри 24:16 ајәсиндә јазылан сөзләри гејд етмәк олар: «Салеһ једди дәфә јыхылса белә, јенә галхар, шәр инсан бүдрәсә, бәлаја дүчар олар».

⁶ Јеһова јол вермәз ки, Она үрәкдән етибар едәнләр елә бүдрәсинләр, јахуд јыхылсынлар ки, бир даһа галха билмәсинләр. Әминик ки, Јеһова бизә галхмаға вә јенидән вар ҝүҹүмүзлә Она хидмәт етмәјә мүтләг көмәк едәҹәк. Јеһованы бүтөв үрәклә севән инсанлар үчүн бу неҹә дә тәсәлливериҹидир. Адәтән, пис инсанларын галхмаг истәкләри олмур. Онлар Аллаһын мүгәддәс руһунун вә Онун халгынын көмәјини ахтармыр, көмәк әли узадыланда да рәдд едирләр. Бунун там әксинә олараг, Јеһованын ганунуну севәнләри һеч нә бүдрәдиб һәјат уғрунда јарышдан мәһрум едә билмәз. (Мәзмур 119:165 ајәсини оху.)

7, 8. Инсанын јыхылмасына нә сәбәб ола биләр вә буна бахмајаг, о, Аллаһын лүтфүндә неҹә гала биләр?

⁷ Бәзиләри һансыса зәиф ҹәһәтләри уҹбатындан һәтта дөнә-дөнә кичик ҝүнаһлара јол верирләр. Буна бахмајараг, әҝәр онлар һәр дәфә галхырса, јәни сәмими-гәлбдән төвбә едиб, сәдагәтлә хидмәтини давам етдирирсә, јенә дә Јеһованын ҝөзүндә салеһ сајылыр. Биз Аллаһын гәдим исраиллиләрлә неҹә даврандығына диггәт јетирә биләрик (Јешаја 41:9, 10). Јухарыда ситат ҝәтирилән Сүлејманын мәсәлләри 24:16 ајәси диггәти мәнфи ҹәһәтә, инсанын јыхылмасына јох, мүсбәт ҹәһәтә, јәни онун дәфәләрлә галхмасында тәзаһүр олунан Јеһованын мәрһәмәтинә јөнәлдир. (Јешаја 55:7 ајәсини оху.) Јеһова Аллаһ вә Иса Мәсиһ бизә инаныр вә гајғыкешликлә ајаға галхмаға тәшвиг едирләр (Мәз. 86:5; Јәһ. 5:19).

⁸ Һәтта марафон јарышында гачан бүдрәјиб јыхылса да, ҹәлд тәрпәнәрәк галхыб јенидән јарышы давам етдирә биләр. Биз әбәди һәјат уғрунда јарышымызын битәҹәји «ҝүнү вә сааты» билмирик (Мат. 24:36). Анҹаг нә гәдәр аз бүдрәсәк, бир о гәдәр сабит галаҹаг, јарышы тәрк етмәјәҹәк вә мәсафәни уғурла гачаҹағыг. Бәс бүдрәмәмәк үчүн нә едә биләрик?

ИНКИШАФА МАНЕ ОЛАН ӘНҜӘЛЛӘР

9.Бизи бүдрәдә биләҹәк һансы манеәләри мүзакирә едәҹәјик?

⁹ Ҝәлин бизи бүдрәдә биләҹәк беш саһәјә нәзәр салаг. Бунлара шәхси зәифликләримиз, ҹисмани еһтираслар, һәмиманлыларымызын һагсыз давранышы, чәтинликләр вә ја тәгибләр, еләҹә дә башгаларынын гејри-камиллији дахилдир. Амма бүдрәсәк дә, унутмајаг ки, Јеһова чох сәбирли Аллаһдыр. О, дәрһал бизә сатгын дамғасы вурмајаҹаг.

10, 11. Давуд һансы шәхси зәифлији илә мүбаризә апарырды?

¹⁰ Шәхси зәифликләримиз гачыш јолунда гаршымыза чыхан дашлара бәнзәјир. Падшаһ Давудун вә һәвари Петерин һәјатында баш вермиш һадисәләрә нәзәр саланда өзүнә һаким олмамаг вә инсан горхусу кими ики зәифлији ҝөрмәк олар.

¹¹ Бат-Шева илә давранышындан ҝөрүндүјү кими Давуд падшаһын өзүнә һаким олмагла бағлы проблеми варды. Даһа сонра Навал ону тәһгир едәндә Давуд кәскин реаксија ҝөстәрмишди. Бәли, өзүнә һаким олмаг Давуда чәтин олса да, о, һеч вахт тәслим олмур, Јеһованы разы салмаг үчүн һәмишә әлиндән ҝәләни едирди. Башгаларынын көмәји сајәсиндә о, руһани таразлығыны бәрпа едә билди (1 Шам. 25:5—13, 32, 33; 2 Шам. 12:1—13).

12. Бүдрәмәсинә бахмајараг, Петерә јарышда галмаға нә көмәк етди?

¹² Петердә инсан горхусу варды, буна бахмајараг, о, Јеһоваја вә Исаја садиг галды. Мәсәлән, Петер дүз үч дәфә Исаны инсанлар гаршысында инкар етмишди (Лука 22:54—62). Сонралар Петер мәсиһчијә јарашмајан тәрздә давранараг сүннәт олунмуш јәһуди мәсиһчиләри гејри-јәһуди һәмиманлыларындан үстүн тутдуғуну ҝөстәрмишди. Лакин һәвари Павел јығынҹагда синфи ајры-сечкилијә јер олмадығыны ајдын шәкилдә анлајырды. Петерин дүшүнҹә тәрзи исә јанлыш иди. Петерин мүнасибәти гардашлар арасында ҹидди проблемләрә ҝәтириб чыхармамыш Павел она бирбаша мәсләһәт верди (Галат. 2:11—14). Петер онун мәсләһәтиндән инҹијәрәк һәјат уғрунда ҝедән јарышы дајандырдымы? Хејр, о, Павелин вердији мәсләһәтә ҹидди јанашды вә ону тәтбиг едәрәк јарыша давам етди.

13. Сағламлығымызла бағлы зәифликләримиз бүдрәмәјимизә неҹә сәбәб ола биләр?

¹³ Бәзән инсанын шәхси зәифликләри онун сәһһәтиндә јаранан проблемләр ола биләр. Бу да бүдрәмәјимизә ҝәтириб чыхара вә руһани аддымларымызы зәифләдәрәк бизи әлдән сала биләр. Мәсәлән, вәфтиз олундугдан 17 ил сонра јапонијалы бир баҹынын сағламлығы илә бағлы ҹидди проблемләри јаранды. Онун башы сағламлығына о гәдәр гарышды ки, бу, онун руһән зәифләмәсинә сәбәб олду. Бир мүддәтдән сонра о, гејри-фәал тәблиғчи олду. Ики ағсаггал она баш чәкиб хош сөзләрлә ону руһландырды. Беләҹә о, јенидән јығынҹаглара ҝәлмәјә башлады. О, кечирдији һиссләри бөлүшәрәк дејир: «Јығынҹаға ҝәләндә гардашлар мәни елә сәмими гаршыладылар ки, ҝөз јашларымы сахлаја билмәдим». Инди баҹымыз јенидән јарыша гатылыб.

14, 15. Јанлыш арзулар јарананда һансы ҹидди тәдбирләр ҝөрмәк лазымдыр? Нүмунә чәк.

¹⁴ Ҹисмани еһтирас чохларынын бүдрәмәсинә сәбәб олуб. Үрәјимиздән Јеһованын сөзүндән чыхмаг истәји кечәндә биз әгли, әхлаги вә руһани ҹәһәтдән тәмиз галмаг үчүн гәти аддымлар атмалыјыг. Иса бизи бүдрәдән һәр шејдән азад олмаға, һәтта мәҹази мәнада ҝөзүмүзү чыхармаға вә әлимизи кәсиб атмаға чағырыр. Әхлагсыз фикирләр вә һәрәкәтләр бизим јарышы дајандырмағымыза сәбәб ола биләр. (Матта 5:29, 30 ајәләрини оху.)

¹⁵ Мәсиһчи аиләсиндә бөјүјән бир гардаш јазыр ки, ушаглыгдан бәри һомосексуал арзуларла мүбаризә апармалы олуб. О гејд едир: «Һәмишә өзүмү нараһат һисс едирдим вә мәнә елә ҝәлирди ки, өзүмә һеч һарада јер тапа билмирәм». Тәхминән 20 јашы оланда о, даими пионер хидмәтинә башлады вә хидмәти көмәкчи олду. Сонрадан бу гардаш ҹидди ҝүнаһа јол верди вә төһмәт алды, анҹаг ағсаггаллар она көмәк әли узатдылар. Дуа етмәјин, Мүгәддәс Китабы арашдырмағын вә диггәтини башгаларына көмәк етмәјә ҹәмләмәјин сајәсиндә о ајаға галхды вә руһани мүвазинәтини јенидән бәрпа етди. Илләр өтдүкдән сонра о етираф едир: «Һәмин һиссләр мәндә вахташыры олараг һәлә дә баш галдырыр, анҹаг бу һиссләрин мәнә галиб ҝәлмәсинә имкан вермирәм. Мән Јеһованын ҝүҹүмүздән артыг сынаға чәкилмәјимизә јол вермәдијини анладым. Әминәм ки, Аллаһ бунун өһдәсиндән ҝәлә биләҹәјимә инаныр». О, сөзүнә белә јекун вурур: «Инди чәкдијим әзијјәтин әвәзи јени дүнјада артыгламасы илә өдәниләҹәк. Мән буну үрәкдән арзулајырам! Һәмин вахтадәк мүбаризә апармаға давам едәҹәјәм». Бәли, бу гардаш јарышда галмаға гәтијјәтлидир.

16, 17. а) Әдаләтсизлијин гурбаны олдуғуну дүшүнән бир гардаша нә көмәк етди? б) Бүдрәмәмәк үчүн јығынҹагла бағлы нәји јадда сахламалыјыг?

¹⁶ Һәмиманлыларымызын һагсыз давранышы да бизим бүдрәмәјимизә сәбәб ола биләр. Франсадан олан вә әввәлләр ағсаггал кими хидмәт едән бир гардаш әдаләтсизлијин гурбаны олдуғуну дүшүндүјүндән үрәјиндә гәзәб һисси јаранмаға башлады. Нәтиҹәдә, о, јығынҹагла әлагәсини кәсди вә гејри-фәал тәблиғчи олду. Ики ағсаггал она баш чәкди, анлајышла, сөзүнү кәсмәдән она гулаг асды. Онлар гардашы бүтүн јүкүнү Јеһованын үзәринә гојмаға тәшвиг етдиләр вә илк нөвбәдә, Аллаһы разы салмағын ваҹиблијини хатырлатдылар. О, дүшүнҹә тәрзини дәјишди вә тезликлә јарыша гајыдыб јенидән јығынҹағын ишләри илә фәал сурәтдә мәшғул олмаға башлады.

¹⁷ Бүтүн мәсиһчиләр диггәтләрини гејри-камил инсанлара јох, јығынҹағын Башы Иса Мәсиһә ҹәмләмәлидирләр. Ҝөзләри «алов сачан» Иса јығынҹагда баш верәнләри һәртәрәфли ҝөрүр вә һәр шеји биздән даһа јахшы баша дүшүр (Вәһј 1:13—16). Мисал үчүн, о, баша дүшүр ки, бизә әдаләтсизлик кими ҝөрүнән шејләри, әслиндә, биз јанлыш јоза вә ја јанлыш анлаја биләрик. Иса исә јығынҹағын проблемләрини мүкәммәл шәкилдә вә там вахтында һәлл едәҹәк. Беләликлә, һәмиманлыларымызын һәрәкәтләринин вә гәрарларынын бизи бүдрәтмәсинә јол вермәмәлијик.

18. Сынаглар вә чәтинликләр заманы неҹә таб ҝәтирә биләрик?

¹⁸ Бүдрәмәјимизә сәбәб олан диҝәр ики амил чәтинликләр вә ја тәгибләр, еләҹә дә башгаларынын гејри-камиллији ола биләр. Әкинчи мәсәлиндә Иса демишди ки, «сөзә ҝөрә чәтинлик, тәгиб башлајанда» бу, бәзиләринин бүдрәмәсинә сәбәб олаҹаг. Хүсусилә дә һәгигәтдә көк салмајан, јәни иманы зәиф олан инсан аилә үзвләри, гоншулары, јахуд һөкумәт даирәләри тәрәфиндән тәгибләрә мәруз галанда тез бүдрәјир (Мат. 13:21). Лакин әҝәр биз үрәјимизин дүзҝүн вәзијјәтини горусаг, Падшаһлыг хәбәри бизә иманда дәрин вә мөһкәм көк салмаға көмәк едәҹәк. Сынагларла үзләшәндә дуа етмәли вә тәрифәлајиг шејләр барәдә дүшүнмәлијик. (Филипилиләрә 4:6—9 ајәләрини оху.) Јеһованын ҝүҹү сајәсиндә биз сынаглара таб ҝәтирәҹәк вә чәтинликләрин бизи бүдрәтмәсинә јол вермәјәҹәјик.

19.. Башгалары хәтримизә дәјәндә бүдрәмәмәк үчүн нә едә биләрик?

¹⁹ Тәәссүф ки, бәзиләри илләрлә Јеһоваја хидмәт етсәләр дә, башгаларынын гејри-камиллији уҹбатындан әбәди һәјат уғрунда ҝедән јарышы дајандырырлар. Онлар өз виҹданларынын јол вермәдији шејләри башгаларынын етдијини ҝөрәндә бүдрәјирләр (1 Кор. 8:12, 13). Әҝәр кимсә хәтримизә дәјәрсә, биз ону бөјүк мәсәләјә чевирәҹәјикми? Мүгәддәс Китаб мәсиһчиләрә мүһакимә етмәмәји, башгаларыны бағышламағы вә инад едәрәк өз һүгугларыны тәләб етмәмәји бујурур (Лука 6:37). Сәни бүдрәдәҹәк манеәләрлә үзләшәркән өзүнә белә суаллар верә биләрсән: «Башгаларыны өз аршынымла өлчмүрәм ки? Гардашларымын гејри-камиллијинин мәни јарышдан узаглашдырмасына имкан верәҹәјәмми?» Јеһоваја мәһәббәт көмәк едәҹәк ки, башгаларынын һеч бир һәрәкәтинин финиш хәттини кечмәјимизә мане олмасына јол вермәјәк.

БҮДРӘМӘДӘН ДӨЗҮМЛӘ ГАЧ

20, 21. Һәјат уғрунда ҝедән јарышда нә етмәјә гәти гәрарлысан?

²⁰ Гаршындакы мәсафәни ахырадәк гачмаға гәтијјәтлисәнми? (2 Тим. 4:7, 8). О заман шәхси өјрәнмә мүтләгдир. Мүгәддәс Китабын вә нәшрләримизин көмәји илә арашдырмалар апар, охудугларын үзәриндә дүшүн вә сәни бүдрәдәҹәк шејләри мүәјјән ет. Еһтијаҹ дујдуғун руһани гүввәни алмаг үчүн Аллаһдан мүгәддәс руһ дилә. Јадда сахла ки, һәјат уғрунда ҝедән гачышда иштирак едән идманчынын бүдрәмәси вә ја јыхылмасы һеч дә онун мүтләг удузаҹағына дәлаләт етмир. О галхыб јенидән јарышы давам етдирә биләр. Һәтта иманы уғрунда гаршылашдығы сынаглардан јахшы ибрәт дәрси ҝөтүрә биләр.

²¹ Мүгәддәс Китаб әбәди һәјат уғрунда ҝедән гачышы пассив јох, актив бир јарыш кими тәсвир едир. Бу, садәҹә гәләбәјә доғру апаран автобуса минмәјә бәнзәмир. Һәјат уғрунда ҝедән јарышда өзүмүз гачмалыјыг. Белә етмәклә Јеһова бизә «бөјүк әмин-аманлыг» бәхш едәҹәк (Мәз. 119:165). Әмин ола биләрик ки, О, инди дә бизә хејир-дуа верир, үстәлик, финиш хәттини кечәнләрин һамысына да әбәди хејир-дуалар верәҹәк (Јаг. 1:12).