Охуҹуларын суаллары

Дашгындан әввәл јашамыш вә Јарадылыш 6:2, 4 ајәләриндә хатырланан «Аллаһ оғуллары» кимләрдир?

Бурада Аллаһын руһани оғулларындан бәһс олундуғуна инанмаг үчүн әсаслы сәбәбләримиз вар. Һансы сәбәбләр?

Јарадылыш 6:2 ајәсиндә охујуруг: «Аллаһ оғуллары ҝөрдүләр ки, инсан гызлары чох ҝөзәлдир вә бәјәндикләри һәр гызы өзләринә арвад етдиләр».

Ибраниҹә Мүгәддәс Јазыларын орижинал мәтниндә Јарадылыш 6:2, 4; Әјјуб 1:6; 2:1; 38:7 вә Мәзмур 89:6 ајәләриндә «Аллаһ оғуллары» ифадәсинә раст ҝәлинир. Азәрбајҹанҹа Мүгәддәс Китабда исә бу ифадә јалныз Јарадылыш 6:2, 4 ајәләриндә истифадә олунур. Бу ајәләрдән «Аллаһ оғуллары» барәдә нә өјрәнирик?

Әјјуб 1:6 ајәсиндән ајдын ҝөрүрүк ки, «илаһи варлыглар», јәни орижинал мәтнә әсасән, «Аллаһ оғуллары» Аллаһын һүзуруна топлашмышдылар. Онларын арасында дүнјаны ҝәзиб-долашан Шејтан да варды (Әјј. 1:7; 2:1, 2). Ејнилә, Әјјуб 38:4—7 ајәләриндә охујуруг ки, Аллаһ јерин ҝушәдашыны гојаркән «илаһи варлыглар», јәни «Аллаһ оғуллары» севинҹдән һарај салырдылар. Һәмин вахт инсанлар һәлә јарадылмамышды. Буна ҝөрә дә белә гәнаәтә ҝәлмәк олар ки, онлар Аллаһын сәмави оғуллары идиләр. Мәзмур 89:6 ајәсиндә хатырланан «илаһи варлыглар» да, шүбһәсиз, инсанлар јох, Аллаһын һүзурундакы мәләкләрдир.

Јарадылыш 6:2, 4 ајәләриндә гәләмә алынан мәлуматда хатырланан «Аллаһ оғуллары» кимләрдир? Бундан әввәлки Мүгәддәс Китаб фактларына әсасән, бу мәлуматда јер үзүнә ҝәлән Аллаһын руһани оғулларындан данышылдығы гәнаәтинә ҝәлмәк мәнтиглидир.

Бәзи инсанлар үчүн мәләкләрдә ҹинси истәкләрин олмасы фикрини гәбул етмәк чәтиндир. Исанын Матта 22:30 ајәсиндә гејд олунан сөзләри ҝөстәрир ки, ҝөјдә никаһ вә ҹинси мүнасибәтләр мөвҹуд дејил. Лакин елә вәзијјәтләр олуб ки, мәләкләр ҝөркәмләрини дәјишәрәк инсан ҹилдинә ҝириб, һәтта инсанларла отуруб јејиб-ичибләр (Јар. 18:1—8; 19:1—3). Буна ҝөрә дә мәнтигәујғундур ки, инсан ҹилдинә ҝирән мәләкләрин гадынларла ҹинси әлагәдә олмасы мүмкүндүр.

Мүгәддәс Китаба әсасән, бәзи мәләкләрин мәһз белә даврандығыны дүшүнмәјә әсаслы сәбәбләримиз вар. Јәһуда 6, 7 ајәләриндә бәдәнин гејри-тәбии истәкләринин далынҹа дүшән содомлуларын ҝүнаһлары «әзәл мөвгеләрини горумајыб, онлара мүнасиб мәканы тәрк едән» мәләкләрин ҝүнаһы илә мүгајисә едилир. Бу мәләкләрин содомлуларла охшар ҹәһәти ондан ибарәтдир ки, онлар «аҹҝөзлүклә ҹинси әхлагсызлыг едиб бәдәнин гејри-тәбии истәкләринин далынҹа» дүшмүшдүләр. 1 Петер 3:19, 20 ајәләриндә гејд олунан охшар ифадә «Нуһун ҝүнләриндә»ки итаәтсиз мәләкләрлә әлагәлидир (2 Пет. 2:4, 5). Нәтиҹә етибарилә, Нуһун ҝүнләриндәки мәләкләрин итаәтсизлији Содом вә Һоморранын ҝүнаһлары илә ејни сәвијјәдәдир.

Беләҹә, Јарадылыш 6:2, 4 ајәләриндәки «Аллаһ оғуллары»нын инсан ҹилдинә ҝирмиш вә гадынларла әхлагсызлыг етмиш мәләкләр олдуғуну баша дүшәндә бу фикир мәнтигли ҝөрүнүр.

Мүгәддәс Китабда дејилир ки, Иса «зинданда олан руһани варлыглара тәблиғ етди» (1 Пет. 3:19). Бу нә демәкдир?

Һәвари Петер бу руһани варлыгларын «Нуһун ҝүнләриндә... Аллаһын сәбирлә ҝөзләдији вахт итаәтсизлик етмиш» мәләкләр олдуғуну ҝөстәрир (1 Пет. 3:20). Ајдындыр ки, Петер Шејтана гошулуб үсјан галдыран мәләкләри нәзәрдә тутурду. Јәһуда «әзәл мөвгеләрини горумајыб, онлара мүнасиб мәканы тәрк едән мәләкләри» хатырладараг дејир ки, Аллаһ онлары «бөјүк ҝүнүн мәһкәмәси үчүн гаты зүлмәт ичиндә әбәди буховларда сахлајыр» (Јәһуда 6).

Нуһун ҝүнләриндә руһани варлыглар Јеһоваја гаршы неҹә итаәтсизлик етдиләр? Дашгындан әввәл бу пис руһани варлыглар Аллаһын әмри олмадан инсан ҹилдинә ҝирдиләр (Јар. 6:2, 4). Бундан әлавә, бу мәләкләр гадынларла ҹинси әлагәјә ҝирәрәк Аллаһын ҝөзүндә ијрәнҹ иш ҝөрдүләр. Аллаһ онлары гадынларла ҹинси әлагәјә ҝирмәләри үчүн јаратмамышды (Јар. 5:2). Бу пис, итаәтсиз мәләкләр Аллаһын тәјин етдији вахтда мәһв едиләҹәкләр. Јәһуданын гејд етдији кими, һал-һазырда онлар «гаты зүлмәт»дә, белә десәк, руһани зиндандадырлар.

Бәс Иса «зинданда олан руһани варлыглара» неҹә вә нә вахт тәблиғ етмишди? Петер јазыр ки, бу, Иса «руһани варлыг кими дирилди»ләндән сонра баш вермишди (1 Пет. 3:18, 19). Һәмчинин диггәт јетирдинизсә, Петер һадисәни кечмиш заманда нәгл едир. Бундан ајдын олур ки, бу һадисә о, биринҹи мәктубуну јазмамышдан габаг баш вериб. Ҝөрүнүр, Иса дирилдикдән бир мүддәт сонра тамамилә һаглы олараг ҝүнаһлы мәләкләрә лајиг олдуглары ҹәзаны бәјан етди. Иса онлара үмид хәбәрини јох, һөкм хәбәрини чатдырды (Јун. 1:1, 2). О, өмрүнүн ахырына кими иман вә сәдагәт ҝөстәрәрәк вә дирилдиләрәк Иблисин онун үзәриндә һеч бир һакимијјәти олмадығыны сүбут етди. Буна ҝөрә дә онун бу ҹүр һөкм хәбәрини чатдырмаға там әсасы вар иди (Јәһ. 14:30; 16:8—11).

Ҝәләҹәкдә Иса Шејтаны вә һәмин мәләкләри буховлајараг дибсиз үммана атаҹаг (Лука 8:30, 31; Вәһј 20:1—3). Һәмин вахта гәдәр бу итаәтсиз мәләкләр руһани зүлмәтдә галаҹаг вә сонда мүтләг мәһвә дүчар олаҹаглар (Вәһј 20:7—10).