Һикмәтли инсанларла отуруб-дурмаг мәнә хејир ҝәтирди

УЗУН илләр әввәл Ҹәнуби Дакотанын Брукингс шәһәриндә (АБШ) ачылан бир сәһәр һеч вахт јадымдан чыхмыр. Һавадакы јүнҝүл шахтадан һисс олунурду ки, гыш гапынын ағзыны кәсдириб. Һәмин ҝүн мән вә бир нечә нәфәр анбарда, мал-гаранын су ичдији чәнин јанында дуруб сојугдан тир-тир әсирдик. Чән јарыја гәдәр сојуг су илә долу иди. Јәгин сизә мараглыдыр, бу сојуг һавада биз орада нә едирдик. Ҝәлин сизә бир аз һәјатымдан данышым, онда һәр шеј ајдын олаҹаг.

УШАГЛЫГ ИЛЛӘРИМ

Мән 1936-ҹы ил март ајынын 7-дә анадан олмушам. Аиләдә дөрд ушаг идик, ән кичикләри мән идим. Биз Ҹәнуби Дакотанын шәргиндә јерләшән кичик бир фермада јашајырдыг. Аиләмиз малдарлыг вә әкинчиликлә мәшғул олурду. Ферма һәјатымызын ајрылмаз һиссәси олса да, бизим үчүн даһа бөјүк өнәм дашыјан башга бир шеј вар иди. Валидејнләрим Јеһованын Шаһиди идиләр, онлар 1934-ҹү илдә вәфтиз олмушдулар. Атамла анам һәјатларыны Јеһоваја һәср етдикләри үчүн Онун ирадәсини һәр шејдән үстүн тутурдулар. Биз Кондедәки (Ҹәнуби Дакота) кичик јығынҹаға ҝедирдик. Әввәлҹә атам Кларенс, сонра әмим Алфред јолдашлыг хидмәтчиси (һазырда ағсаггаллар шурасынын координатору адланыр) тәјин олунмушду.

Биз ибадәт ҝөрүшләриндән галмыр, мүнтәзәм олараг ев-ев тәблиғ едиб инсанлара ҝөзәл ҝәләҹәклә бағлы мүждәни чатдырырдыг. Валидејнләримизин нүмунәси вә вердикләри билик бизим бир мәсиһи кими јетишмәјимиздә бөјүк рол ојнајыб. Беләҹә, баҹым Дороти вә мән алты јашымыз оланда тәблиғчи олдуг. 1943-ҹү илдә мән јениҹә тәсис олунмуш Теократик Хидмәт Мәктәбинә јазылдым.

Топлантылар һәјатымызда ваҹиб јер тутурду. 1949-ҹу илдә Су-Фолз шәһәриндә (Ҹәнуби Дакота) кечирилән топлантыда Грант Сүтер гардашын сөјләдији «О ҝүн дүшүндүјүнүздән јахындыр!» адлы мәрузә бу ҝүнә кими јадымдадыр. Гардаш гејд етмишди ки, өзүнү Јеһоваја һәср едән һәр бир мәсиһинин һәјаты тамамилә Падшаһлыг һаггында мүждәнин тәблиғинә һәср олунмалыдыр. Бу фикир мәни һәјатымы Јеһоваја һәср етмәјә тәшвиг етди. Брукингсдә кечирилән нөвбәти топлантыда мән вә мәнимлә бирҝә үч нәфәр мәгаләнин әввәлиндә сөз ачдығым сојуг анбарда, дәмир чәнин јанында дајаныб вәфтиз олмағы ҝөзләјирдик. Беләҹә, мән 1949-ҹу ил нојабрын 12-дә вәфтиз олундум.

Топлантыдан сонра гаршыма мәгсәд гојдум ки, өнҹүл олум. Беләҹә, 1952-ҹи ил јанвар ајынын 1-и, 15 јашымда өнҹүл хидмәтинә башладым. Мүгәддәс Китабда дејилир ки, «һикмәтли илә отуруб-дуран һикмәтли олар». Аиләмдә бу ҹүр һикмәтли инсанлар чох иди, онлар бу мәгсәдә чатмаг үчүн мәнә дәстәк олурдулар (Мәс. 13:20). 60 јашлы әмим Ҹулиус мәним өнҹүл әмәкдашым иди. Арамыздакы јаш фәргинә бахмајараг, бирликдә хидмәт етмәк бизә зөвг верирди. Онун зәнҝин һәјат тәҹрүбәси мәнә һикмәтли олмағы өјрәтди. Чох кечмәмиш баҹым Дороти дә өнҹүл олду.

РАЈОН НӘЗАРӘТЧИЛӘРИНИН КӨМӘЈИ

Мән ушаг оланда валидејнләрим рајон нәзарәтчиләри илә һәјат јолдашларыны биздә галмаға дәвәт едирдиләр. Ҹеси вә Лин Кантвел ҹүтлүјүнүн мәнә чох бөјүк көмәји дәјмишди. Мәним өнҹүл хидмәтинә башламағыма, демәк олар ки, онлар сәбәбкар олмушдулар. Онларын сәмими мүнасибәти мәни хидмәтдә ирәли ҝетмәјә тәшвиг етмишди. Ҹесиҝил гоншу јығынҹаглары зијарәт едәндә һәрдән мәни өзләри илә тәблиғә чыхмаға дәвәт едирдиләр. Онларла вахт кечирәндә чох руһланырдым.

Ҹеси гардашҝилдән сонра јығынҹағымызы Бәд вә Ҹоан Миллер ҹүтлүјү зијарәт едирди. Һәмин вахт мәним артыг 18 јашым вар иди. Мәнә әсҝәрлијә чағырыш вәрәгәси ҝәлмишди. Чағырыш комиссијасынын гаршыма гојдуғу тәләби јеринә јетирмәјә виҹданым јол вермирди. Чүнки мәним фикримҹә, бу тәләб Мәсиһин сијасәтдән узаг дурмаг әмринә зидд ҝедирди. Мәним мәгсәдим Падшаһлыг һаггында мүждәни тәблиғ етмәк иди (Јәһ. 15:19). Буна ҝөрә дә чағырыш комиссијасына мәни дин хадими кими гејдә алмаг хаһиши илә мүраҹиәт етдим.

Бәд гардашын мәнимлә бирҝә һәрби комиссарлыға ҝетмәси мәнә дәрин тәсир бағышламышды. О, тәбиәтҹә чох үнсијјәтҹил вә горхмаз инсан иди, Мүгәддәс Китабы да чох јахшы билирди. Јанымда бу ҹүр инсанын олмасы мәнә ҹәсарәт верирди. Нәһајәт, 1954-ҹү илин јајында һәрби комиссарлыг мәни дин хадими кими гејдијјата алды. Бунунла да гаршымда јени хидмәт нөвләринә гапы ачылды.

Гыса мүддәт сонра мән Бејтелдә, Стејтон-Ајленддәки (Нју-Јорк) Ҝөзәтчи гүлләси фермасында хидмәт етмәјә дәвәт олундум. Мән орада үч ил хидмәт етдим. Бу илләр әрзиндә таныш олдуғум вә әмәкдашлыг етдијим һикмәтли инсанлардан чох шеј өјрәндим.

БЕЈТЕЛ ХИДМӘТИ

Ферманын әразисиндә WББР радиостансијасы фәалијјәт ҝөстәрирди. Бу радиостансија 1924—1957-ҹи илләр арасы бизим тәшкилат тәрәфиндән истифадә олунуб. Бејтел аиләсинин һарадаса 15—20 үзвү фермада ишләјирди. Әксәријјәтимиз ҹаван вә нашы идик. Амма арамызда Елдон Вудворд адлы мәсһ олунмуш јашлы гардаш да вар иди. О, чох һикмәтли инсан иди. Елдон гардаш бизә ата кими јанашыр, бизә чохлу шејләр өјрәдирди. Баҹы-гардашларла арамызда проблем јарананда о дејирди: «Јеһованын ҝөрдүјү ишләр адамы һејран гојур, бахмајараг ки, бу ишләри гејри-камил инсанлар васитәсилә едир».

Бизә Фредерик Франс гардашла чијин-чијинә хидмәт етмәк шәрәфи дә нәсиб олмушду. О, чох һикмәтли инсан иди вә Мүгәддәс Китабы дәриндән билирди. Бунун һамымыза мүсбәт тәсири олмушду. О, һәр биримизә ајры-ајрылыгда диггәт ҝөстәрирди. Ашбазымыз Һари Папарҝирополос адында бир гардаш иди. Биз ону Петерсон фамилијасы илә чағырырдыг, чүнки онун өз фамилијасыны демәк чох чәтин иди. Һари гардаш да мәсһ олунмуш иди. О, тәблиғ ишинә чох ҹан јандырырды. Һари һәм Бејтелдәки ишини јахшы ҝөрүрдү, һәм дә тәблиғдән галмырды. О, һәр ај јүзләрлә журнал пајлајырды. Һари гардаш Мүгәддәс Китабы да чох ҝөзәл билирди, нә суал версәк, ҹаваб верирди.

ҺИКМӘТЛИ БАҸЫЛАРДАН НҮМУНӘ ҜӨТҮРҮРӘМ

Биз фермада беҹәрилән мејвә-тәрәвәзи бағлајыб гыша тәдарүк ҝөрүрдүк. Һәр ил Бејтел аиләси үчүн 45 000 банка (һәрәси 900 гр.) бағланырды. Бизә бу ишдә Ета Һут адлы бир баҹы көмәк едирди. О, чох һикмәтли инсан иди. Бағладығымыз мәһсулларын ресептини бу баҹы һазырлајырды. Банка бағланан мөвсүмдә о әразидәки јығынҹаглардан баҹылар көмәјә ҝәлирди. Иши онларын арасында пајлашдырмаг Етаја тапшырылмышды. Әсас иш Етанын үзәринә дүшсә дә, о, фермаја нәзарәт едән гардашлара итаәт едирди. Онун нүмунәси мәнә мәсул гардашлара итаәткар олмағы өјрәтди.

Көмәјә ҝәлән баҹыларын арасында Анжела Романо адлы бир ҝәнҹ баҹы вар иди. Анжела һәгигәтә ҝәләндә Ета она чох дәстәк олмушду. Беләҹә, мән артыг 58 илдир ки, мәнимлә гоша аддымлајан даһа бир һикмәтли инсанла таныш олдум. 1958-ҹи илин апрел ајында Анжела илә мән евләндик. Бирликдә биз хидмәтин мүхтәлиф нөвләриндә иштирак етмишик. Бу илләр әрзиндә Анжеланын Јеһоваја сарсылмаз сәдагәти бизим аилә телләрини мөһкәмләндириб. Мән ондан чох архајынам, әминәм ки, һәр чәтинликдә о, мәнә дәстәк олаҹаг.

ХҮСУСИ ТӘЈИНАТЛЫ МҮЖДӘЧИ ИШИ ВӘ СӘЈЈАР ХИДМӘТ

1957-ҹи илдә WББР радиостансијасынын бинасы сатыландан сонра мән гыса мүддәт Бруклиндәки Бејтелдә хидмәт етдим. Анжела илә евләнәндән сонра Бејтелдән ҝетмәли олдум. Биз үч ил Стејтон-Ајленддә өнҹүл кими хидмәт етдик. Ејни вахтда мән WББР радиостансијасынын јериндә ачылан WПОW адлы јени радиостансијада ишләјирдим.

Биз садә јашајырдыг ки, фүрсәт јарананда истәнилән јердә хидмәт едә биләк. Беләҹә, 1961-ҹи илдә биз Небраска штатынын Фолс-Сити шәһәринә хүсуси өнҹүл тәјинаты алдыг. Тәјинаты аландан гыса мүддәт сонра бизи Саут-Лансингдә (Нју-Јорк) кечирилән Мәсул Гардашлар үчүн Мәктәбә дәвәт етдиләр. О вахт бу мәктәб бир ај кечирилирди. Һәмин мәктәбдә тәлим алмаг бизә зөвг верирди. Дүшүнүрдүк ки, бизи јенидән Небраскаја ҝөндәрәҹәкләр. Лакин ҝөзләдијимизин там әкси олду: бизи хүсуси тәјинатлы мүждәчи кими Камбоҹаја ҝөндәрдиләр. Ҹәнуб-Шәрги Асијада јерләшән бу ҝөзәл дијарда өмрүмүздә ҝөрмәдијимиз ҝөзохшајан мәнзәрәләр ҝөрдүк. Орадакы екзотик сәсләр вә гохулар бизим үчүн јени иди. Биз чох истәјирдик ки, орада јашајан инсанлар да хош хәбәри ешитсин.

Амма сонралар өлкәдә сијаси вәзијјәт дәјишди, буна ҝөрә дә биз Ҹәнуби Вјетнама көчмәли олдуг. Әфсуслар олсун ки, ики илдән сонра сағламлығымда јаранан ҹидди проблемләр уҹбатындан евә, АБШ-а гајытдыг. Сағламлығымы бәрпа етмәк үчүн вахт лазым иди. Мән сағалан кими јенидән өнҹүл хидмәтинә башладыг.

1965-ҹи илин март ајында мәни сәјјар нәзарәтчи тәјин етдиләр. 33 ил сәјјар вә вилајәт нәзарәтчиси кими хидмәт етмишәм, топлантылары тәшкил етмәклә мәшғул олмушам. Јеһоваја бу ҹүр хидмәт етмәк Анжела илә мәнә мәмнунлуг ҝәтирирди. Топлантылары чох севирдим, буна ҝөрә дә онларын тәшкилиндә иштирак етмәк мәнә зөвг верирди. Биз бир нечә ил Нју-Јорк шәһәриндә вә онун әтраф әразиләриндә јерләшән јығынҹаглары зијарәт етмишик. Бу илләр әрзиндә тәшкил олунан топлантыларын бир чоху «Јанки» стадионунда кечирилмишди.

ЈЕНИДӘН БЕЈТЕЛӘ ГАЈЫДЫР ВӘ ТЕОКРАТИК МӘКТӘБЛӘРДӘ ЧАЛЫШЫРАМ

Хүсуси таммүддәтли хидмәтдә олан диҝәр баҹы-гардашлар кими, бизи дә мараглы вә чәтин тәјинатлар ҝөзләјирди. Мисал үчүн, 1995-ҹи илдә мәнә Хидмәти Тәкмилләшдирмә Мәктәбиндә тәлим вермәк иши тапшырылды. Үч ил сонра бизи Бејтелә дәвәт етдиләр. Тәхминән 40 ил әввәл хүсуси таммүддәтли хидмәти башладығым јерә јенидән гајытмағыма чох севинирдим. Мән һәм хидмәт шөбәсиндә ишләјир, һәм дә теократик мәктәбләрдә дәрс дејирдим. 2007-ҹи илдә Рәһбәрлик Шурасы Теократик мәктәбләр шөбәси јаратды. Бу шөбә Бејтелдә кечирилән бүтүн мәктәбләрә нәзарәт едирди. Мән бир нечә ил шөбәнин нәзарәтчиси олмушам.

Бир нечә ил әввәл теократик мәктәбләрлә бағлы чохлу јениликләр олду. 2008-ҹи илдә Јығынҹаг Ағсаггаллары үчүн Мәктәб јаранды. Нөвбәти ики ил әрзиндә Патерсон вә Бруклиндәки Бејтелләрдә 12 000-дән чох ағсаггал бу мәктәби кечди. Мәктәб инди башга әразиләрдә дә кечирилир. 2010-ҹу илдә Хидмәти Тәкмилләшдирмә Мәктәбинин ады дәјишдирилиб Субај Гардашлар үчүн Мүгәддәс Китаб Мәктәби гојулду. Елә һәмин ил Мәсиһи Әр-арвадлар үчүн Мүгәддәс Китаб Мәктәби тәсис олунду.

2015-ҹи хидмәт илиндән башлајараг бу ики мәктәб Падшаһлыг Мүждәчиләри Мәктәби ады алтында бирләшдирилди. Орада һәм ҹүтлүкләр, һәм дә субај баҹы-гардашлар тәлим алырлар. Дүнјанын мүхтәлиф өлкәләриндә јашајан диндашларымыз бу мәктәбин башга филиалларда да кечириләҹәјини ешидәндә севинҹләринин һәдди-һүдуду јох иди. Нә хошдур ки, Јеһованын тәлиминдән даһа чох инсан фајдалана билир! Бу мәктәбләрдә охујан бәзи баҹы-гардашларла таныш олдуғум үчүн чох шадам.

Һәрдән ҝеријә, о сојуг суда вәфтиз олдуғум ҝүндән әввәлә бојланыр, о ҝүндән бу јана һәгигәт јолунда растыма чыхан һикмәтли инсанлары хатырлајыр вә онлара ҝөрә Јеһова Аллаһа шүкүр едирәм. Онларын јашы, миллијјәти мәнимкиндән фәргли иди. Амма әсас о иди ки, онларын һамысы Јеһованы чох севирди. Бу баҹы-гардашларын Јеһова Аллаһа дәрин мәһәббәти онларын әмәлләриндән, дүшүнҹә тәрзиндән ајдын ҝөрүнүрдү. Јеһованын тәшкилатында јолдашлыг етмәк үчүн нә гәдәр һикмәтли инсан вар! Мән бу ҹүр инсанларла отуруб-дурмағын хејрини ҝөрдүм.