Охуҹуларын Суаллары

Шејтан Һәвваја хејирлә шәри билмә ағаҹынын мејвәсиндән јесә, өлмәјәҹәјини дејәндә ону бу ҝүн ҝениш јајылмыш руһун өлмәзлији фикри илә таныш едирди?

Ҝөрүнүр, јох. Иблис Һәвваја демәди ки, Аллаһын гадаған етдији мејвәдән јесә, ҹисмән өләҹәк, амма ҝөзәҝөрүнмәз бир һиссәси (бу ҝүн бәзиләри буну өлмәз руһ адландырыр) һарадаса јашамаға давам едәҹәк. Шејтан илан васитәсилә Һәвваја билдирди ки, бу ағаҹын мејвәсиндән јесә, әсла өлмәјәҹәк. О, Һәвванын јашамаға давам едәҹәјини, јер үзүндә Аллаһдан асылы олмадан даһа јахшы һәјата саһиб олаҹағыны иддиа етмишди (Јар. 2:17; 3:3—5).

Әҝәр руһун өлмәзлији һагда сахта тәлим Әдәндә јаранмајыбса, бәс нә вахт јараныб? Буну дәгиг дејә билмәрик. Бир шеји билирик ки, јалан ибадәтләр Нуһ пејғәмбәрин дөврүндәки Дашгында мәһв олду. Дашгындан сонра һеч бир сахта дини тәлим галмады, чүнки јалныз Нуһ вә аиләси хилас олмушду, онлар исә пак ибадәти дәстәкләјирди.

Демәли, бу ҝүн ҝениш јајылмыш руһун өлмәзлији һагда тәлим Дашгындан сонра мејдана ҝәлиб. Аллаһ Бабилдә инсанларын дилләрини гарышдыранда вә «инсанлары бүтүн јер үзүнә» сәпәләјәндә, шүбһәсиз, онлар өзләри илә бирҝә руһун өлмәзлији тәлимини дә апардылар (Јар. 11:8, 9). Бу сахта тәлимин нә вахт јаранмасындан асылы олмајараг, әмин ола биләрик ки, онун архасында «јаланын атасы» Шејтан Иблис дуруб вә бу тәлимин неҹә ҝениш јајылдығыны ҝөрмәк она чох хош иди (Јәһ. 8:44).