Аллаһа итаәт едәнләрин алдығы немәтләр

Муса пејғәмбәр демишди ки, Аллаһын әмрләринә табе олсаг, Ондан хејир-дуа алаҹағыг (Ганунун тәкрары 10:13; 11:27). Биз Аллаһа «бирдән бизи ҹәзаландырар» дүшүнҹәси илә итаәт етмәмәлијик. Аллаһын ҝөзәл хүсусијјәтләри барәдә дүшүндүкҹә, Она мәһәббәтимиз артыр вә Ону кәдәрләндирән һәр һансы бир һәрәкәтә јол вермәк истәмирик. Мәһз бу сәбәбә ҝөрә биз Она итаәт едирик. «Аллаһы севмәк Онун әмрләринә риајәт етмәк демәкдир» (1 Јәһја 5:3).

Бәс Аллаһа итаәт едәнләр һансы немәтләри алыр? Онлардан икисинә нәзәр салаг.

1. АЛЛАҺА ИТАӘТ БИЗӘ ҺИКМӘТ ГАЗАНДЫРЫР

«Мән сәнин Аллаһын Јеһовајам, Мән сәнин хејринә сәни өјрәдирәм, сәни ҝетмәли олдуғун јолла апарырам» (ӘШИЈА 48:17).

Јараданымыз Јеһова Аллаһ бизи өзүмүздән јахшы таныјыр вә лазым олан өјүд-нәсиһәти верир. Әҝәр һәмишә һикмәтли давранмаг истәјириксә, Мүгәддәс Китабдан Онун гајда-ганунларыны өјрәниб, онлара ујғун јашамалыјыг.

2. АЛЛАҺА ИТАӘТ БИЗИ ХОШБӘХТ ЕДИР

«Аллаһын сөзүнү ешидиб она әмәл едәнләр хошбәхтдирләр!» (ЛУКА 11:28).

Бу ҝүн милјонларла инсан Аллаһын Кәламына ујғун јашајыб сөзүн әсл мәнасында хошбәхт өмүр сүрүр. Мәсәлән, Испанијада јашајан бир киши һөвсәләсиз инсан иди. Башгалары илә, еләҹә дә һәјат јолдашы илә кобуд рәфтар едирди. Бир ҝүн о, Төвратдан Јагуб пејғәмбәрин оғлу һәзрәти Јусифин һекајәсини охуду. Ҝөрдү ки, Јусифи гул кими сатсалар да, һагсыз јерә зиндана атсалар да, о, мүлајимлијини горумушду, сүлһпәрвәр давраныб гардашларыны бағышламышды (Јарадылыш 37—45 фәсилләр). Һәмин киши дејир: «Јусиф барәдә дүшүндүкҹә, мән дә мүлајим, хејирхаһ вә тәмкинли олмаг истәдим. Бунун сајәсиндә инди һәјатым хошбәхтдир».

Мүгәддәс Китабда инсанларла рәфтара даир мәсләһәтләр чохдур. Нөвбәти мәгаләдә бу барәдә даһа әтрафлы данышаҹағыг.