Јеһова илә достлуғунузу бәрпа един

ҺӘР ил Јеһоваја дәјәрли олан чохлу сајда хидмәтчиси Јеһованын Шаһиди кими јенидән бәрпа олунур. Бир тәсәввүр един, онларын һәр бири үчүн ҝөјдә неҹә бөјүк севинҹ јашаныр (Лука 15:7, 10). Әҝәр сиз јығынҹаға бәрпа олунмусунузса, әмин олун ки, Иса Мәсиһ, мәләкләр вә Јеһова сизи јенидән јығынҹагда ҝөрмәјә чох шаддыр. Амма Јеһова илә достлуғунузу бәрпа едәркән, ола билсин, мүәјјән чәтинликләриниз олсун. Бу нә кими чәтинликләрдир вә онлары неҹә аша биләрсиниз?

ЈАРАНАН ЧӘТИНЛИКЛӘР

Бәзиләри бәрпа олунандан сонра да бәдбин һиссләрлә мүбаризә апарыр. Давуд падшаһ да бу ҹүр һиссләр кечирмишди. Јеһова онун ҝүнаһларыны бағышласа да, о белә демишди: «Тәгсирләрим башымдан ашыр» (Зәб. 40:12; 65:3). Инсан јығынҹаға гајыдандан узун илләр сонра да, ола биләр ки, өзүнү ҝүнаһкар һисс етсин вә хәҹаләт чәксин. Изабелла адлы баҹы 20 илдән чох иди ки, јығынҹагдан кәнар едилмишдиa. О дејир: «Јеһованын мәни бағышладығына инанмаг чох чәтин иди». Әҝәр руһ дүшкүнлүјүнә гапылсаныз, Јеһова илә мүнасибәтләриниз јенидән зәифләјәр (Мәс. 24:10). Буна гәтијјән имкан вермәјин.

Бәзиләри исә горхур ки, Јеһова илә достлугларыны бәрпа етмәк үчүн лазым олан һәр бир шеји едә билмәјәҹәкләр. Антуан бәрпа олунандан сонра демишди: «Елә бил мәсиһи кими јашамагла бағлы һәр шеји унутмушдум». Бу кими һиссләрә ҝөрә бәзиләри руһани ишләрдә там иштирак етмәјә чәкинә биләр.

Белә бир нүмунәјә бахаг. Гасырға нәтиҹәсиндә бир нәфәрин евинә ҝүҹлү зәрәр дәјиб. Евә баханда ҝөрүр ки, ону бәрпа етмәк хејли вахт апараҹаг, чохлу иш ҝөрүлмәлидир вә бу, онун ҝөзүнү горхудур. Ејнилә ҹидди ҝүнаһ уҹбатындан Јеһова илә мүнасибәтләриниз зәдәләнибсә, бәлкә, дүшүнүрсүнүз ки, руһани ҹәһәтдән бәрпа олунмаг үчүн дәридән-габыгдан чыхмалысыныз. Амма әслиндә, сиз көмәксиз дејилсиниз.

Јеһова дејир: «Ҝәлин арамыздакы мәсәләләри һәлл едәк» (Әшј. 1:18). Сиз Јеһова илә араныздакы мәсәләләри һәлл етмәк үчүн артыг чох шеј етмисиниз, Јеһова да буна ҝөрә сизи севир. Бир дүшүнүн, бунунла сиз Јеһоваја Шејтанын иттиһамларына ҹаваб вермәк үчүн әсас вермисиниз! (Мәс. 27:11).

Јеһоваја ҝери дөнмәклә сиз артыг Она јахынлашмысыныз. Јеһова сөз верир ки, О да Өз нөвбәсиндә, сизә јахынлашаҹаг (Јаг. 4:8). Сиз артыг јенидән јығынҹагдасыныз вә баҹы-гардашлара буну ҝөрмәк чох хошдур. Амма бу, кифајәт дејил. Јеһоваја Атаныз вә Достунуз кими јанашмалы, Она севҝинизи ҝүҹләндирмәлисиниз. Бәс буну неҹә едә биләрсиниз?

ҜҮҸҮНҮЗ ЧАТАН МӘГСӘДЛӘР ГОЈУН

Гаршыныза наил ола биләҹәјиниз мәгсәдләр гојун. Шүбһәсиз ки, Јеһова вә Онун ҝәләҹәклә бағлы вәдләри барәдә әсас биликләр јадыныздадыр. Инди сизә лазымдыр ки, мәсиһи кими фәалијјәтинизи бәрпа едәсиниз, мәсәлән, мүнтәзәм тәблиғ едәсиниз, јығынҹаглара гатыласыныз вә диндашларынызла вахт кечирәсиниз. Гаршыныза нөвбәти мәгсәдләри гоја биләрсиниз.

Тез-тез Јеһова илә сөһбәт един. Јеһова билир ки, инсан өзүнү ҝүнаһкар һисс едәндә дуа етмәк она чәтиндир (Ром. 8:26). Буна бахмајараг, «даима дуа един» вә Јеһоваја дејин ки, Онунла дост олмаг истәјирсиниз (Ром. 12:12). Андреј адлы бир гардаш дејир: «Мән дәһшәтли дәрәҹәдә өзүмү ҝүнаһкар һисс едирдим, хәҹаләт чәкирдим. Амма һәр дәфә Јеһоваја дуа етдикҹә бу һиссләр сәнҝијирди, гәлб раһатлығы тапырдым». Әҝәр дуа етмәјә сөз тапа билмирсинизсә, онда ҝүнаһларындан төвбә едән Давудун Зәбур 51 вә 65-ҹи мәзмурларда јазылан дуаларына нәзәр сала биләрсиниз.

Аллаһын Кәламыны мүнтәзәм мүталиә един. Бунун сајәсиндә руһән мөһкәмләнәҹәксиниз вә Јеһоваја мәһәббәтиниз ҝетдикҹә артаҹаг (Зәб. 19:7—11). Фелипе адлы бир гардаш дејир: «Мәним руһани ҹәһәтдән зәифләмәјимә вә Јеһованы мәјус етмәјимә сәбәб мүнтәзәм мүталиә етмәмәјим олмушду. Ејни сәһви тәкрарламаг истәмирдим. Буна ҝөрә гәрара ҝәлдим ки, өзүмү руһани ҹәһәтдән горумаг үчүн мүнтәзәм фәрди мүталиә едим». Сиз дә гаршыныза бу мәгсәди гоја биләрсиниз. Әҝәр мүталиә үчүн мөвзу тапмаг сизә чәтиндирсә, јеткин достунуздан көмәк истәјә биләрсиниз.

Диндашларынызла достлуғунузу бәрпа един. Бәзиләри нараһат олур ки, баҹы-гардашлар онлара хош мүнасибәт ҝөстәрмәјәҹәк. Лариса һиссләрини бөлүшүр: «Чох утанырдым. Өзүмү елә һисс едирдим ки, санки јығынҹаға хәјанәт етмишәм. Бу фикирләр узун мүддәт мәни раһат бурахмырды». Әмин олун ки, ағсаггаллар вә јеткин мәсиһиләр сизә руһән дирчәлмәјә көмәк етмәк истәјир. («Ағсаггалларын көмәји» адлы чәрчивәјә бахын.) Сизи јенидән јығынҹагда ҝөрмәк онлар үчүн чох хошдур, онлар сизин хошбәхтлијинизи арзулајыр! (Мәс. 17:17).

Баҹы-гардашларла неҹә јахын ола биләрсиниз? Онларла бирҝә бүтүн јығынҹаг ҝөрүшләриндә иштирак един, тәблиғдә мүнтәзәм әмәкдашлыг един. Бунун сизә һансы фајдасы олаҹаг? Феликс дејир: «Јығынҹаг мәним гајыдышымы сәбирсизликлә ҝөзләјирди. Севилдијими һисс етдим. Онларын һамысы мәнә көмәк етди ки, јығынҹаға јенидән гајнајыб-гарышым, Јеһованын әфвини һисс едим вә ирәли ҝедим». («Сиз нә едә биләрсиниз?» адлы чәрчивәјә бахын.)

ТӘСЛИМ ОЛМАЈЫН!

Јеһова илә мүнасибәтләринизи бәрпа едәркән Шејтан јенә дә «гасырғалар» васитәсилә сизи зәифләтмәјә чалышаҹаг (Лука 4:13). Буна һазыр олмаг үчүн индидән руһани евинизи мөһкәмләндирин.

Јеһова гузулары барәсиндә белә вәд вериб: «Итәни ахтарыб тапаҹағам, азаны ҝери гајтараҹағам, јаралынын јарасыны сарыјаҹағам, зәиф дүшәни гүввәтләндирәҹәјәм» (Һизг. 34:16). Јеһова артыг чохлу сајда инсана Онунла мүнасибәтини бәрпа етмәјә көмәк едиб. Јеһова сизә дә көмәк етмәк истәјир ки, Онунла әввәлкиндән дә мөһкәм мүнасибәтиниз олсун.