Билирсиниз?

Нәјә ҝөрә гәдимдә исраиллиләр башлыг пулу верирдиләр?

ГӘДИМ дөврдә оғлан тәрәфлә гыз тәрәф тој разылығына ҝәләндән сонра гызын аиләсинә башлыг һаггы верилирди. Бу башлыг һаггы һансыса гијмәтли бир шеј, һејван вә ја пул гисминдә верилә биләрди. Бәзән исә бу, инсан әмәји шәклиндә өдәнилирди. Мәсәлән, Јагуб Рәһиләни алмаг үчүн атасы илә разылыға ҝәлмишди ки, онун үчүн једди ил ишләјәҹәк (Јар. 29:17, 18, 20). Бу адәтин мәгсәди нә иди?

Мүгәддәс Китаб алими Карол Мајерс гејд едир: «Башлыг пулу, бир нөв, гызын аиләсинә өдәнилән тәзминат иди, чүнки аилә гызларынын көмәјиндән мәһрум олурду, бу исә [кәнд тәсәррүфаты илә мәшғул олан] аиләләр үчүн бөјүк итки демәк иди». Башлыг пулу һәмчинин никаһ сајәсиндә јаранан јени гоһумлуг бағларыны ҝүҹләндирирди. Бу гоһумлуг бағлары сајәсиндә ҝәләҹәкдә дара дүшән тәрәф көмәксиз галмајаҹагды. Бундан әлавә, башлыг пулу ону ҝөстәрирди ки, гыз артыг нишанлыдыр; о, атасынын һимајәсиндән чыхараг әринин һимајәси алтына дүшәҹәк.

Башлыг пулунун өдәнилмәси адәти о демәк дејилди ки, гадын бир әшја кими сатылыб алына биләр. Гәдим Исраиллә бағлы бир китабда дејилир: «Гызын аиләсинә мүәјјән мәбләғдә пул, јахуд бу пулун дәјәриндә нәјинсә өдәнилмәси өһдәлији исраиллиләрин гурдуғу никаһла бағлы елә тәәссүрат ојада биләр ки, санки алвер едилир. Амма ҝөрүнүр, бу пул гызы сатын алмаг үчүн верилмирди. Бу, гызын аиләсинә тәзминат кими өдәнилирди» («Ancient Israel—Its Life and Institutions»).

Ҝүнү бу ҝүн дә бәзи өлкәләрдә башлыг пулу адәти вар. Әҝәр мәсиһи валидејнләр башлыг пулу истәјирләрсә, чалышаҹаглар ки, чох шеј тәләб етмәсинләр вә һамы онлары «дәрракәли адам кими танысын» (Филип. 4:5; 1 Кор. 10:32, 33). Бунунла да онлар ҝөстәрәҹәкләр ки, «пулпәрәст», башга сөзлә, аҹҝөз инсан дејилләр (2 Тим. 3:2). Бундан әлавә, мәсиһи валидејнләр һәддән артыг чох башлыг пулу истәмәјәндә ҝәләҹәк бәј дә мәҹбур галмајаҹаг ки, башлыг пулу газанана гәдәр тоју тәхирә салсын. Јахуд ондан тәләб олунан јүксәк мәбләғи газанмаг үчүн өнҹүл хидмәтини дајандырыб, бүтүн ҝүнү ишләсин.

Бәзи өлкәләрдә башлыг пулу бир ганун кими дөвләт тәрәфиндән тәнзимләнир. Белә һалларда мәсиһи валидејнләр дөвләтин ганунларына бојун әјмәлидир. Чүнки Аллаһын Кәламында јазылыб ки, мәсиһиләр һөкумәтә табе олмалыдырлар вә Аллаһын ганунларына зидд олмајан ганунлара итаәт етмәлидирләр (Ром. 13:1; Һәв. 5:29).