Мүһарибә вә мүнагишә ичиндә сүлһү тапанлар
Бир вахтлар һәрбчи олан Гери дејир: «Мүгәддәс Китабы өјрәнмәмишдән габаг баш ача билмирдим дүнјада нәјә ҝөрә бу гәдәр зүлм, һагсызлыг вә проблем вар. Амма инди үрәјим раһатдыр. Билирәм ки, Јеһова Аллаһ дүнјаны тәһлүкәсиз бир јерә чевирәҹәк».
Бир чох инсан да бу һиссләри кечириб. Ҝәлин ҝөрәк Мүгәддәс Китаб онлара неҹә көмәк едиб.
МҮГӘДДӘС КИТАБДА ДЕЈИЛИР: «Еј Јеһова, кәрамәтлисән, бағышлајансан» (Зәбур 86:5).
ФАЈДАСЫ. «Бу ајә мәни Јеһованын мәрһәмәтли Аллаһ олдуғуна әмин етди. Билирәм ки, О, кечмишдә мүһарибәдә төрәтдијим әмәлләрә ҝөрә мәни бағышламаға һазырдыр» (Вилмар, Колумбија).
МҮГӘДДӘС КИТАБДА ДЕЈИЛИР: «Мән јени ҝөјләр вә јени јер јарадырам, көһнә шејләр јада дүшмәјәҹәк, даһа хатырланмајаҹаг» (Әшија 65:17).
ФАЈДАСЫ. «Һәрбчи олдуғум вахт башыма ҝәлән һадисәләр мәндә посттравматик стрес позунтусу вә депрессија јаратды. Амма бу ајә мәнә хатырладыр ки, Јеһова тезликлә јаддашымдакы пис хатирәләри силәҹәк вә гарабасмалар кечиб ҝедәҹәк. Бу дүшүнҹәләрдән вә һиссләрдән бирдәфәлик јаха гуртараҹағам. Неҹә дә ҝөзәл әнамдыр!» (Зафира, Бирләшмиш Штатлар).
МҮГӘДДӘС КИТАБДА ДЕЈИЛИР: «Онун дөврүндә салеһ адам чичәкләнәҹәк, Ај дурдугҹа һәр јанда сүлһ олаҹаг» (Зәбур 72:7).
ФАЈДАСЫ. «Тез-тез бу сөзләр һагда дүшүнүрәм. Тезликлә мүһарибә кабусу сона јетәҹәк вә бир дә һеч вахт јахынларымызын һәјатына ҝөрә нараһат олмајаҹағыг» (Олександра, Украјна).
МҮГӘДДӘС КИТАБДА ДЕЈИЛИР: «Сәнин өлүләрин јашајаҹаг... Галхын, севинҹ сәдалары уҹалдын, еј торпаг алтында јатанлар!» (Әшија 26:19).
ФАЈДАСЫ. «Тутси халгына гаршы төрәдилән сојгырымда, демәк олар, бүтүн аилә үзвләрим һәлак олду. Амма бу ајә мәни әмин едир ки, онлары јенидән ҝөрәҹәјәм. Дириләндән сонра онларын севинҹ сәдаларыны ешидәҹәјим ҝүнү сәбирсизликлә ҝөзләјирәм» (Мари, Руанда).
МҮГӘДДӘС КИТАБДА ДЕЈИЛИР: «Аз галыб! Артыг пис адам олмајаҹаг... Һәлимләр јер үзүнә саһиб олаҹаг, әмин-аманлығын боллуғундан һәзз алаҹаглар» (Зәбур 37:10, 11).
ФАЈДАСЫ. «Мүһарибә баша чатса да, һагсызлыглар, пис инсанлар һәлә дә вар. Бу ајәләр дәрдимә дәрман олду. Јеһова һәр шеји ҝөрүр, вәзијјәтими баша дүшүр. О, сөз верир ки, тезликлә бүтүн әзаблар сона чатаҹаг вә бир дә хатырланмајаҹаг» (Далер, Таҹикистан).
Бу журналда мүсаһибә верән инсанлар Мүгәддәс Китаб васитәсилә сүлһү тапан милјонларла Јеһованын Шаһидләриндән садәҹә бир нечәсидир. Јеһованын Шаһидләри иргчилијә, милләтчилијә вә шәхси-гәрәзлијә галиб ҝәлмәји өјрәнибләр (Ефеслиләрә 4:31, 32). Онлар сијаси мәсәләләрдә битәрәфдирләр вә гәти шәкилдә мүнагишәләрдә иштирак етмирләр (Јәһја 18:36).
Јеһованын Шаһидләри һәм дә меһрибан бир аилә кими бир-бирләринә дајаг олурлар (Јәһја 13:35). Мәсәлән, бајаг ады чәкилән Олександра мүһарибә уҹбатындан баҹысы илә бирликдә башга өлкәјә гачыб. О дејир: «Биз сәрһәди кечән кими орада бизи гаршыламаг үчүн ҝәлән јерли баҹы-гардашлары ҝөрдүк. Онларын дәстәји сајәсиндә биз јад өлкәдә гачгын кими јашамаға ујғунлаша билдик».
Ибадәт ҝөрүшләримиздә һәм инди сүлһә неҹә наил ола биләҹәјимиздән, һәм дә Мүгәддәс Китабда вәд олундуғу кими ҝәләҹәкдә дүнјанын сүлһ ичиндә олаҹағындан бәһс едилир. Сизи сәмими-гәлбдән бизимлә бирҝә бу ибадәт ҝөрүшләриндә иштирак етмәјә дәвәт едирик. jw.org сајтына дахил олуб, сизә јахын әразидә јерләшән ибадәт евини тапа, еләҹә дә «Әбәди хошбәхт һәјат!» нәшри васитәсилә Јеһованын Шаһидләриндән бири илә Мүгәддәс Китаб дәрсинә башламаг үчүн бланкы долдура биләрсиниз.