Kasıblıq Allahın narazılığınınmı əlamətidir?

ALLAH qədim israillilərə demişdi ki, onların arasında kasıb olmamalıdır. Çünki onlara verilən Qanunda kasıbların qayğısına qalmaq, hətta onların borclarını bağışlamaqla bağlı əmrlər var idi (Qanunun təkrarı 15:1-4, 7-10). Beləliklə, israillilər arasında kasıb olmamalı idi, çünki Yehova onlara xeyir-dua verəcəyini vəd etmişdi. Lakin bu xeyir-duanı almaları Qanuna tabe olmalarından asılı idi, israillilər isə bunu etmədilər.

Ancaq bu o demək deyil ki, əgər insan kasıbdırsa, deməli, Allahı narazı salıb, yaxud da əksinə, əgər varlıdırsa, deməli, Allah onu xeyir-dualandırıb. Allahın bir çox sadiq xidmətçiləri yoxsul olmuşdur. Məsələn, Amos peyğəmbər çobanlıq edən və mövsümi işlə məşğul olan kasıb bir adam idi (Amos 1:1; 7:14). İsrailə aclıq üz verəndə İlyas peyğəmbərin həyatı yoxsul dul qadının qonaqpərvərliyindən asılı idi. Həmin dul qadının bir az unu, bir az da yağı var idi. Aclıq dövründə un və yağ möcüzəvi şəkildə tükənmək bilmirdi. Həmin vaxt nə İlyas, nə də qadın varlandı, Yehova onların yalnız ən zəruri tələbatlarını ödəyirdi (1 Padşahlar 17:8-16).

Təsadüf nəticəsində insan hər şeyindən məhrum ola bilər. Hərdən bədbəxtlik və ya xəstəlik nəticəsində insanlar müvəqqəti və ya daimi olaraq əmək qabiliyyətlərini itirirlər. Ölüm kimilərini yetim, kimilərini dul qoyur. Hətta bu cür bədbəxtliklər belə, Allahın narazılığının əlaməti deyil. Naomi ilə Rutun nümunəsi Yehovanın yoxsulların qayğısına nəvazişlə qaldığına çox gözəl nümunədir. Həyat yoldaşlarını itirdikdən sonra son dərəcə yoxsulluq içində yaşasalar da, Yehova Allah onlara xeyir-dua verdi və maddi tələbatlarının qayğısına qaldı (Rut 1:1-6; 2:2-12; 4:13-17).

Aydındır ki, yoxsulluq Allahın insandan narazı olduğunu göstərmir. Yehova Allaha sadiq qalan insanlar Davud padşahın sözlərinə inana bilərlər: «Gəncliyimdən qocalığımadək salehin tərk edildiyini, nəslinin çörək üçün diləndiyini görməmişəm» (Məzmur 37:25).

[8-ci səhifədəki şəkil]

Kasıb olmalarına baxmayaraq, Allah Naomi ilə Ruta xeyir-dua verir və məhəbbətlə onların qayğısına qalırdı