Ruhani qidanı çatdıran kiçik qutu

Əvvəlki illərlə müqayisədə indi Yehovanın Şahidləri ruhani qidanı daha çox rəqəmsal formatda alır. Amma dünyanın bir çox yerlərində dindaşlarımızın internetdən istifadə etməyə imkanı çatmır. Digərlərinin yaşadığı yerlərdə isə ya internet tez-tez kəsilir, ya sürəti zəifdir, ya da ümumiyyətlə yoxdur.

Bununla belə, bir çox dindaşımız internet şəbəkəsi olmadan da rəqəmsal nəşrləri yükləyə bilir. Bu necə mümkün olur?

İnternet problemi olan ərazidəki yığıncaqlara «JW Box» (cey-dablyu-boks) adlı kiçik cihaz göndərilir. Bu, kommersiya şirkətindən alınmış routerdən və Beytelin Kompüter şöbəsinin hazırladığı proqram təminatından ibarət qutudur. Ona jw.org saytında yerləşən rəqəmsal nəşrlər və videolar yüklənir. Hər bir qutunun qiyməti təxminən 75 ABŞ dollarıdır.

Bacı-qardaşlar ibadət evində mobil cihazları ilə «JW Box» cihazına simsiz qoşulub nəşrləri və videoları yükləyirlər. Hətta ucuz və köhnə cihazlar da buna qoşula bilir. Bəs əgər yığıncağın interneti yoxdursa, yeni nəşrlərə bu cihaza necə yüklənir? Filial vaxtaşırı jw.org saytındakı yeni materialları qiyməti təxminən 4 ABŞ dolları olan USB cihazlara yükləyib göndərir. Bu cihazlardan materiallar «JW Box»a yüklənir.

«JW Box» dindaşlarımızın karına necə çatır? Konqo Demokratik Respublikasında yaşayan Natan Adruandra adlı qardaş bölüşür: «Xeyli vaxt idi ki, “Ey Yehova, Sənə güvənirəm” və “Lutun arvadını heç vaxt yadınızdan çıxarmayın” filmlərini yükəməyə çalışırdım. Amma heç vaxt alınmırdı. Buna görə kefim pozulurdu. İndi isə həmin videoları telefonuma yükləyə bilirəm. Bunun sayəsində uşaqlarımıza daha yaxşı təlim veririk».

Nigeriyada yığıncaqlara «JW Box» cihazını quraşdırmağa kömək edən bir qardaş deyir: «Bacı-qardaşlar bu cihaza Yehovadan gözəl bir bəxşiş kimi baxırlar. Onlar çox sevinirlər ki, indi Xidmət üçün vəsaitlər bölməsindən nəşrləri və videoları asanlıqla yükləyə bilirlər».

Hal-hazırda Afrikadakı, Okeaniyadakı və Cənubi Amerikadakı dindaşlarımıza 1700-dən çox cihaz göndərilib və daha çox yığıncaqlara göndərilməsi üçün işlər görülür. Bəs bu məsrəflər nəyin sayəsində ödənilir? Ümumdünya işinə edilən ianələrin sayəsində. Bu ianələrin çoxu donate.jw.org saytı vasitəsilə edilir. Sizə səxavətinizə görə minnətdarıq.