Беренсе Тисалуникаларға

5 Ҡәрҙәштәр, һеҙгә ваҡыттар һәм осорҙар тураһында яҙыуҙың кәрәге юҡ. 2 Һеҙ үҙегеҙ ҙә беләһегеҙ: Йәһүә көнө төндә килгән ҡараҡ кеүек киләсәк. 3 Кешеләр: «Тыныслыҡ һәм хәүефһеҙлек!» — тип әйтеп йөрөгән саҡтарында ҡапыл юҡ ителәсәк. Был хәл ауырлы ҡатындың тулғаҡ тотоу ғазаптары кеүек көтөлмәгәндә булыр. Улар бер нисек тә ҡотола алмаҫ. 4 Ләкин һеҙ, ҡәрҙәштәр, ҡараңғылыҡта түгел, шуға күрә ул көн һеҙгә, көн яҡтыһы ҡараҡты ҡыуып тотҡандай, көтмәгәндә килмәҫ. 5 Һеҙ бит бөтәгеҙ ҙә яҡтылыҡ һәм көн улдары. Беҙ төндөң дә, ҡараңғылыҡтың да улдары түгел.

6 Шунлыҡтан башҡалар кеүек йоҡламайыҡ, ә уяу һәм айыҡ аҡыллы* булып ҡалайыҡ. 7 Сөнки йоҡлағандар төнөн йоҡлай һәм эскеселәр төнөн эсеп иҫерә. 8 Ләкин беҙ, көн улдары булараҡ, айыҡ аҡыллы булайыҡ, иман менән яратыуҙы — күкрәксә* итеп, ә ҡотолоуға өмөттө тимер башлыҡ итеп кейәйек. 9 Алла бит беҙҙе үҙенең асыуына дусар итеү өсөн түгел, ә Хужабыҙ Ғайса Мәсих ярҙамында ҡотҡарыу өсөн һайланы. 10 Ғайса, уяубыҙмы беҙ, йоҡлайбыҙмы*, уның менән бергә йәшәй алыуыбыҙ өсөн, беҙҙең хаҡҡа ғүмерен бирҙе. 11 Шуға күрә, әлеге һымаҡ, артабан да бер-берегеҙҙе рухландырығыҙ* һәм нығытығыҙ.

12 Үтенеп һорайбыҙ, ҡәрҙәштәр, арағыҙҙа тырышып хеҙмәт иткән, Хужабыҙҙың эшендә үҙегеҙ менән етәкселек иткән һәм һеҙгә өгөт-нәсихәт биргән кешеләрҙе хөрмәт итегеҙ. 13 Ундай кешеләрҙе ҡәҙерләгеҙ һәм башҡарған бөтә эштәре өсөн яратығыҙ. Үҙ-ара татыу йәшәгеҙ. 14 Шулай уҡ үтенәбеҙ, ҡәрҙәштәр, тыңлауһыҙҙарҙы киҫәтегеҙ*, төшөнкөлөккә бирелгәндәрҙе йыуатығыҙ, көсһөҙҙәрҙе нығытығыҙ, барлыҡ кешеләр менән түҙемле булығыҙ. 15 Берегеҙ ҙә бер кемгә лә яманлыҡҡа яманлыҡ менән ҡайтармаһын, ләкин һәр ваҡыт бер-берегеҙгә һәм бар кешеләргә изгелек ҡылырға ынтылығыҙ.

16 Һәр ваҡыт шатланығыҙ. 17 Бер туҡтауһыҙ доға ҡылығыҙ. 18 Бөтә нәмә өсөн рәхмәт әйтегеҙ. Мәсих Ғайса шәкерттәренән Алла тап шуны көтә. 19 Алла рухына үҙегеҙҙә эш итергә ҡамасауламағыҙ*. 20 Пәйғәмбәрлектәргә кәмһетеп ҡарамағыҙ. 21 Бар нәмәне тикшерегеҙ, яҡшылыҡҡа ныҡ тотоноғоҙ. 22 Һәр төр яуызлыҡтан ҡасығыҙ.

23 Тыныслыҡ Аллаһы үҙе һеҙҙе тулыһынса изге итһен, һеҙҙең рухығыҙ, йәнегеҙ* һәм тәнегеҙ Хужабыҙ Ғайса Мәсихтең килеү осоро ваҡытында һәр йәһәттән һау һәм тел тейҙергеһеҙ килеш һаҡланһын. 24 Һеҙҙе саҡырған Алла тоғро, ул быны мотлаҡ эшләйәсәк.

25 Ҡәрҙәштәр, беҙҙең өсөн доға ҡылыуҙан туҡтамағыҙ.

26 Бөтә имандаштарығыҙҙы саф күңелдән үбеп сәләмләгеҙ.

27 Хужабыҙ исеме хаҡына үтенеп һорайым: был хатты бөтә ҡәрҙәштәргә уҡығыҙ.

28 Хужабыҙ Ғайса Мәсихтең сикһеҙ игелеге һеҙҙең менән булһын.