МӘСИХСЕ ТОРМОШОБОҘ

Күңел асыуҙарҙы нисек һайларға?

Ни өсөн беҙ күңел асыуҙарҙы аҡыллы һайларға тейеш? Фильм, музыка, сайт, китап, йә уйын һайлағанда, беҙ ысынында аҡылыбыҙҙы нимә менән тултырырға икәнен хәл итәбеҙ. Һайлаған күңел асыуҙар эштәребеҙгә тәьҫир итә. Ҡыҙғанысҡа ҡаршы, бөгөн күңел асыуҙарҙың күпселеге Йәһүә нәфрәт иткән нәмәләр менән бәйле (Зәб 11:5; Гл 5:19—21). Тап шуның өсөн дә Изге Яҙма беҙҙе гел Йәһүәне данлаған нәмәләр тураһында уйланырға саҡыра (Фп 4:8).

«НИНДӘЙ КҮҢЕЛ АСЫУҘЫ ҺАЙЛАРҒА?» ТИГӘН ВИДЕОЯҘМАНЫ ҠАРА ҺӘМ ОШО ҺОРАУҘАРҒА ЯУАП БИР:

Бөгөнгө күңел асыуҙарҙың ҡайһы берҙәре нимә менән боронғо римдарҙың гладиатор уйындарын хәтерләтә?
Ағай- һәм апай-ҡәрҙәштәр йәштәргә күңел асыуҙарҙы аҡыллы һайларға нисек ярҙам итә ала?
Римдарға 12:9-ҙағы принцип күңел асыуҙар һайлауыбыҙға нисек ҡағыла?
Мәсихселәр өсөн яраҡлы булған күңел асыуҙарҙың бер нисәһен әйтеп бир.

АКТИВ ЙӘ ПАССИВ КҮҢЕЛ АСЫУҘАР?

Күпселек күңел асыуҙар кешене ваҡытты пассив рәүештә үткәрергә күнектерә. Фильмдар, китаптар һәм телетапшырыуҙар беҙгә үҙ идеяларыбыҙҙы тормошҡа ашырырға ярҙам итәһе урынға инде әҙер булған идеялар тәҡдим итә. Был пассив күңел асыуҙарҙан бөтөнләй баш тартырға кәрәк тигәнде аңлатмай. Әммә күптәр, актив күңел асыуҙар күберәк шатлыҡ килтереүен аңлаған. Мәҫәлән, кемдер рәсем төшөрөргә, ә кемдер музыка ҡоралдарында уйнарға ярата. Башҡаларға иһә ваҡытты саф һауала үткәреү оҡшай: улар спорт менән шөғөлләнә, йәйәү йөрөргә йә тәбиғәткә сығырға ярата. Ни генә һайлаһаҡ, әйҙәгеҙ «бөтөнөһөн дә Алла даны өсөн» эшләйек (1Кр 10:31).