Беренсе бүлек
Алла беҙҙең хаҡта ҡайғыртамы?
1, 2. Кешеләр Алла тураһында ниндәй һорау бирә һәм ни өсөн?
БӘЛКИ, һеҙҙең дә: «Алла булһа, бындай интегеүҙәр булмаҫ ине», — тип әйткәнегеҙ барҙыр. Был донъяла ғазап сикмәгән кеше юҡ тиерлек.
2 Бөтә тарих дауамында кешеләр һуғыштар, рәхимһеҙлек, енәйәтселек, ғәҙелһеҙлек, ярлылыҡ, ауырыуҙар һәм яҡындарының үлеме арҡаһында ауыр ҡайғы-хәсрәт кисергән. ХХ быуатта ғына һуғыштарҙа 100 миллиондан артыҡ кеше үлтерелгән, йөҙҙәрсә миллион кеше яраланған йәки йорттарын һәм бөтә мөлкәтен юғалтҡан. Беҙҙең заманда булып торған ҡот осҡос ваҡиғалар арҡаһында бик күп кеше ҡайғыра, илай һәм өмөтһөҙлөккә бирелә.
3, 4. Күптәр Алланың ғазаптарҙы рөхсәт итеүе тураһында нимә әйтә?
3 Ҡайһы берәүҙәр бәғерҙәре ҡатып: «Алла булһа ла, ул беҙҙе яратмай», — тип әйтә. Йәки улар хатта Алла юҡ тигән һөҙөмтәгә килә. Бер ир-ат Беренсе бөтә донъя һуғышында этник эҙәрлекләүҙәр арҡаһында ғаиләһен дә, дуҫтарын да юғалтҡан. «Беҙ Аллаға мохтаж булғанда, ул ҡайҙа ине?» — тип һорай ул. Ә башҡа бер кеше Икенсе бөтә донъя һуғышы ваҡытында нацистар миллионлаған кешене үлтергәндә иҫән ҡалған. Ул күп ғазап күргәнгә: «Һеҙ йөрәгемде ялай алһағыҙ, ағыуланыр инегеҙ», — ти.
4 Эйе, күп кеше: «Ни өсөн мәрхәмәтле Алла яуызлыҡҡа юл ҡуя?» — тип ғәжәпләнә. Улар хатта: «Алла бармы? Булһа, ул беҙҙе яратамы?» — тип һорай. Күптәр, кеше һәр ваҡыт ғазап сигеп йәшәйәсәк, тип уйлай.
[2, 3-сө биттәге иллюстрация]
Тиҙҙән донъя ғазаптарҙан азат ителәсәк!