4-СЕ БҮЛЕК
Кем ул Алла?
КЕШЕЛӘР күп илаһтарға табыналар. Әммә Изге Яҙмаларҙа бер генә хаҡ Алла бар тип әйтелә. Уға тиң бер кем дә юҡ. Ул иң бөйөк һәм мәңге. Алла күктә һәм ерҙә булған бөтә нәмәне барлыҡҡа килтергән һәм беҙгә тормош биргән. Шуға күрә ул ғына беҙҙең ғибәҙәт ҡылыуыбыҙға лайыҡ.
Муса пәйғәмбәргә бирелгән Ҡанун «фәрештәләр аша әйтелгән һүҙ» тип атала
Алланың күп титулдары бар, әммә исеме бер генә — ЙӘҺҮӘ. Алла Мусаға: «Исраилдарға әйт: „Раббы [Йәһүә, ЯД], һеҙгә ата-бабаларығыҙҙың Аллаһы, Ибраһим, Исхаҡ һәм Яҡуп Аллаһы, мине һеҙҙең янға ебәрҙе“. Минең исемем мәңгегә ошо булыр, һәм Мине быуындан-быуынға ошо исем менән белерҙәр!» — тип әйткән (Сығыш 3:15, иҫкәрмәне ҡара). Йәһүә тигән исем Изге Яҙмаларҙа яҡынса 7 000 тапҡыр осрай. Мәҙхиә 83:18-ҙә (ЯД) Алла тураһында: «Кешеләр һинең исемең Йәһүә икәнен, бөтөн ер өҫтөнән һин генә Аллаһы Тәғәлә икәнен белһен», — тип яҙылған.
Үле диңгеҙ янында табылған ҡулъяҙмаларҙа Алла исеме яҙылған
Алланы бер кеше лә бер ҡасан да күрмәгән. Алла Мусаға: «Һин Минең йөҙөмдө күрә алмаҫһың, сөнки Мине күргән кеше иҫән ҡала алмай», — тип әйткән (Сығыш 33:20). Алла күктә йәшәй, һәм кеше уны күрә алмай. Бот, һүрәт йәки Алланың һынын яһау, уларға доға ҡылыу дөрөҫ түгел. Йәһүә Алла Муса пәйғәмбәр аша: «Үҙегеҙгә өҫтә — күктә, ерҙә һәм аҫта — һыуҙа булған нәмәләрҙең һүрәттәренән боттар яһамағыҙ. Боттарға баш эймәгеҙ һәм табынмағыҙ, сөнки Мин — Раббы Аллағыҙ, башҡа илаһтарға түҙеп тормам», — тигән әмер биргән (Сығыш 20:2—5). Һуңыраҡ, Ишағия пәйғәмбәр аша Алла: «Мин Йәһүә. Был — минең исемем, һәм мин үҙ данымды бер кемгә лә һәм үҙемә тейешле маҡтауҙы яһалған һүрәттәргә бирмәйәсәкмен», — тип әйткән (Ишағия 42:8).
Ҡайһы бер кешеләр Аллаға ышана, ләкин уның тураһында белеп булмай һәм уға яҡынлашыу мөмкин түгел тип уйлай. Башҡалар Алланы яратыр урынына унан ҡурҡалар. Ә һеҙ нисек уйлайһығыҙ, Алла һеҙҙең менән ҡыҙыҡһынамы? Уның тураһында белем алырға, хатта уға яҡынлашырға мөмкинме? Әйҙәгеҙ, Изге Яҙмаларҙа Алланың сифаттары тураһында нимә әйтелә икәнен ҡарап сығайыҡ.