Муса Йәһүәгә хеҙмәт итеүҙе һайлай

Яҡупты́ң ғаиләһен Мысырҙа́ изра́илдәр тип атағандар. Яҡу́п, ә һуңыраҡ Йосо́ф үлгәндән һуң яңы фирғәүе́н идара итә башлаған. Ул, изра́илдәр, мысырҙарға́ ҡарағанда, көслөрәк булып китер, тип ҡурҡҡан. Шуға күрә фирғәүе́н израи́лдәрҙе ҡол иткән. Ул уларға күпләп кирбес яһарға һәм көнө-төнө баҫыуҙарҙа эшләргә ҡушҡан. Әммә күберәк эшләгән һайын, израи́лдәрҙең һаны күбәйә барған. Фирғәүенгә́ был оҡшамаған һәм ул изра́иль ғаиләләрендә яңы тыуған һәр малайҙы үлтерергә ҡушҡан. Изра́илдәрҙең ни тиклем ҡурҡҡанын күҙ алдыңа ғына килтер!

Йәһәбә́д исемле изра́иль ҡатыны матур бер малай таба. Шул малайҙы ҡотҡарыр өсөн, Йәһәбә́д уны кәрзингә һала ла Нил йылғаһы буйындағы ҡамыш араһына йәшерә. Ә малайҙың апаһы Мириә́м, нимә булыр икән, тип ситтәнерәк ҡарап торорға була.

Шул йылғаға һыу инергә фирғәүе́н ҡыҙы килә һәм кәрзинде күреп ҡала. Ҡараһа, кәрзин эсендә бер бала илап ята! Ул баланы бик йәлләй. Мириә́м фирғәүе́н ҡыҙы янына килеп: «Баланы имеҙер өсөн берәй ҡатын табып килтерәйемме?» — тип һорай. Ул ризалашҡас, Мириә́м баланың әсәһен саҡыра. Фирғәүе́н ҡыҙы уға: «Был баланы ал да, имеҙеп үҫтер, ә мин һиңә түләп торормон», — ти.

Бала үҫеп еткәс, Йәһәбә́д уны фирғәүе́н ҡыҙына алып бара. Фирғәүе́н ҡыҙы балаға Муса́ тип исем ҡушҡан һәм уны үҙенең улы итеп тәрбиәләгән. Муса́ фирғәүе́н ҡыҙының улы тип һаналған, һәм уның ни теләһә, шул булған. Әммә Муса́ Йәһүәне бер ҡасан да онотмаған. Ул үҙенең мысырлы́ түгел, ә ысын барлыҡта изра́иль кешеһе икәнен белгән. Шуға ла Муса́ Йәһүәгә хеҙмәт итеүҙе һайлаған.

Мусаға́ 40 йәш булғанда, ул үҙ халҡына ярҙам итергә булған. Шулай бер саҡ, Муса́ мысы́р кешеһенең изра́иль кешеһен туҡмағанын күреп ҡала. Ул бар көсөнә мысы́р кешеһенә һуғып ебәрә, һәм тегеһе үлә. Муса́ уны ҡомға күмеп ҡуя. Фирғәүе́н был хәлде белеп ҡалып, Мусаны́ үлтерергә ҡуша. Әммә Муса́ Мадиа́м еренә ҡаса. Унда Йәһүә уның хаҡында ҡайғырта.