«Донъялағы иң яҡшы бүләк!»

Был һүҙҙәр менән 13 йәшлек ҡыҙыҡай, уға көсөк бүләк иткәс, үҙ хистәрен белдергән. Уңышлы бер эшҡыуар ҡатындың һүҙҙәре буйынса, ул әле юғары синыфтарҙа уҡыған саҡта, уға атаһы компьютер бүләк иткән. Шул көндән алып ҡыҙҙың тормошо үҙгәргән. Ә бына бер йәш ҡатын иренә бергә йәшәүҙәренең бер йыллығы хөрмәтенә үҙ ҡулдары менән яһалған открытка бүләк иткән. Һәм иренең һүҙҙәре буйынса, был открытка уның өсөн үҙ ғүмерендәге иң яҡшы бүләк булған.

Йыл һайын кешеләр дуҫтарына йә туғандарына иҫтәлекле ваҡиға уңайынан «иң яҡшы» бүләк һайлар өсөн, күп ваҡыт һәм көс сарыф итә һәм, әлбиттә: «Был иң яҡшы бүләк!» тигән һүҙҙәрҙе ишетергә теләй. Ә һеҙҙең турала нимә әйтеп була? Һеҙ ҙә ысындан да ҡәҙерле булған бүләк бирергә йә алырға теләр инегеҙме?

Был теләк тәбиғи, сөнки бүләк, уны алған кешегә генә түгел, ә биргән кешегә лә шатлыҡ килтерә ала. Инжилдә: «Алыуға ҡарағанда биреүҙә бәхет күберәк», — тип яҙылған (Ғәмәлдәр 20:35). Әгәр беҙ кешегә уның өсөн ҡәҙерле булған нәмәне бүләк итһәк, был беҙгә лә күп шатлыҡ килтерер.

Шулай итеп, үҙегеҙ ҙә, бүләкте алған кеше лә ҡыуанһын өсөн, нимә бүләк итергә? Һәм «иң яҡшыһын» биреү мөмкин булмаһа, кеше өсөн ысындан да ҡәҙерле буласаҡ бүләкте нисек һайларға?