Изге Яҙмала аслыҡ һәм аҙыҡ-түлек етмәүе тураһында нимә әйтелә?
«Аслыҡты бөтөрөү». Донъя идарасылары үҙҙәренә шундай маҡсат ҡуйған. Улар беҙҙең көндәрҙәге иң етди проблемаларҙың береһен — аҙыҡ-түлек етмәүҙе хәл итергә һәм ерҙәге һәр кешене ризыҡ менән тәьмин итергә ниәтләйa. Был маҡсатҡа ирешеп булырмы? Изге Яҙмала был турала нимә әйтелә?
Изге Яҙмала беҙҙең көндәрҙәге аслыҡ тураһында алдан әйтелгән булған
Изге Яҙмала беҙ йәшәгән ваҡыт «һуңғы көндәр» тип атала, һәм ул ваҡытта аслыҡ булыр, тип әйтелгән булған (2 Тимофейға 3:1, ЯДТ). Алла ризыҡ етмәүе өсөн яуаплы түгел, әммә ул беҙҙе был хаҡта киҫәткән (Яҡуб 1:13). Изге Яҙмалағы ике пәйғәмбәрлеккә иғтибар итегеҙ.
«Төрлө урындарҙа аслыҡ... булыр» (Матфай 24:7). Халыҡ-ара ойошмалар әҙерләгән отчёттан күренеүенсә, «донъя аслыҡты бөтөрөү, файҙалы һәм сифатлы ризыҡ булдырыу маҡсаттарынан йыраҡлаша ғына бара»b. Тиҫтәләгән илдәрҙә йөҙәрләгән миллион кеше аслы-туҡлы йәшәй. Ҡыҙғанысҡа ҡаршы, шул арҡала уларҙың күптәре үлә.
«Ҡараным да ҡара ат күрҙем. Өҫтөндәге һыбайлы ҡулына үлсәү тотҡайны» (Асылыш 6:5). Был пәйғәмбәрлектә ат һәм һыбайлы «һуңғы көндәрҙә» булған аслыҡты символлаштыраc. Һәр кешегә әҙ генә булһа ла етһен өсөн, һыбайлы аҙыҡтың сикле һаҡламдарын үлсәй. Ул атта сабып барған саҡта, бер тауыш, аҙыҡ-түлектең хаҡтары бик юғары буласаҡ, тип иғлан итә һәм бөтә кешеләрҙе ризыҡты һаҡсыл тотонорға саҡыра (Асылыш 6:6). Был пәйғәмбәрлек бөтә донъялағы аҙыҡ-түлек кризисын бик теүәл һүрәтләй. Шул арҡала миллиардлаған кешегә файҙалы ризыҡ етешмәй.
Аслыҡ һәм аҙыҡ-түлек етмәү проблемаһы нисек хәл ителәсәк?
Белгестәр әйтеүенсә, ерҙә бөтә кешеләргә етерлек аҙыҡ-түлек бар. Улайһа, аҙыҡ-түлектең етмәүен нисек аңлатып була? Һәм Изге Яҙманан күренеүенсә, беҙҙең Барлыҡҡа килтереүсебеҙ Йәһүәd Алла аслыҡ проблемаһын һәм ризыҡ етмәүҙе нисек хәл итәсәк?
Проблема. Хөкүмәттәр аслы-туҡлы йәшәүҙең сәбәбе булып торған ярлылыҡты һәм экономик тигеҙһеҙлекте бөтөрә алмай.
Хәл итеү юлы. Етешһеҙлектәре күп булған кеше хөкүмәттәрен камил хөкүмәт алмаштырасаҡ. Изге Яҙмала ул Алла батшалығы тип атала (Данил 2:44; Матфай 6:10). Бөгөн ярлылыҡ арҡаһында күптәр үҙҙәрен ризыҡ менән тәьмин итә алмай. Әммә Алла Батшалығы был хәлде үҙгәртәсәк. Был хөкүмәттең башлығы Ғайса Мәсих тураһында Изге Яҙмала былай тип әйтелгән: «Сөнки ярҙам һорап ялбарған ярлыны, меҫкен кешене һәм ярҙамсыһы булмаған һәр кемде ул ҡотҡарыр... Ер йөҙөндә ашлыҡ мул булыр, тау баштарында ул артығы менән булыр» (Зәбур 72:12, 16).
Проблема. Һуғыштар арҡаһында бөтә нәмә емерелә һәм экономик хәл насарлана. Һөҙөмтәлә ризыҡҡа ҡытлыҡ башлана.
Хәл итеү юлы. «[Йәһүә] бөтөн ерҙә һуғыштарҙы туҡтата, йәйәне һәм һөңгөнө һындыра, хәрби арбаларҙы утта яндыра» (Зәбур 46:9). Тиҙҙән Алла һуғыш ҡоралдарын да, һуғыш башлаған кешеләрҙе лә юҡ итәсәк. Изге Яҙмала әйтелгәнсә, шул саҡта «тәҡүәләр гөрләп сәскә атыр, һәм... бөтә ер йөҙөндә тыныслыҡ хөкөм һөрөр» (Зәбур 72:7). Бының ярҙамында һәр кешенең етерлек ризығы булыр.
Проблема. Экстремаль һауа торошо һәм тәбиғәт афәттәре арҡаһында уңыш һәм мал ҡырыла.
Хәл итеү юлы. Алла тәбиғәт көстәрен контролгә аласаҡ һәм ерҙә аҙыҡ-түлек етештереү өсөн яҡшы шарттар булдырасаҡ. Изге Яҙмала былай тип вәғәҙә ителә: «[Йәһүә] дауылды тынысландыра — диңгеҙ тулҡындары тына... Ул, сүлде — ҡамышлы һыулыҡтарға, ҡоро ерҙе һыу сығанаҡтарына әйләндереп, шунда асыҡҡандарҙы йәшәтә... Улар ҡырҙарға иген сәсә һәм йөҙөм ағастары ултырта, һәм улар мул уңыш килтерә» (Зәбур 107:29, 35—37).
Проблема. Коррупция һәм ҡомһоҙлоҡ арҡаһында түбән сифатлы ризыҡ етештерелә, ә мохтаж булғандар етерлек ризыҡ ала алмай.
Хәл итеү юлы. Алла Батшалығы намыҫһыҙлыҡты һәм коррупцияны бөтөрәсәк (Зәбур 37:10, 11; Ишағыя 61:8). Изге Яҙмала Йәһүә Алла былай һүрәтләнә: «Алданғандар хаҡына ул ғәҙеллек ҡыла, астарға икмәк бирә» (Зәбур 146:7).
Проблема. Донъялағы бөтә аҙыҡ-түлектең өстән бер өлөшө йыл һайын сүплеккә ташлана йә боҙола.
Хәл итеү юлы. Алла Батшалығы идараһы аҫтында аҙыҡ-түлекте етештереү һәм таратыу аҡыллы ойошторолған буласаҡ. Ерҙә йәшәгәндә Ғайса Мәсих ризыҡтың әрәм ителмәүе хаҡында ҡайғыртҡан. Мәҫәлән, бер тапҡыр ул мөғжизәле рәүештә 5 000-дән артыҡ кешене ашатҡан һәм унан һуң былай тигән: «Ҡалған һыныҡтарҙы йыйып алығыҙ, бер нәмә лә әрәм булмаһын» (Яхъя 6:5—13).
Алла Батшалығы аслыҡтың һәм аҙыҡ-түлек етешмәүҙең сәбәбен юҡ итәсәк, һәм бөтә кешеләрҙең дә сифатлы һәм файҙалы ризығы мул буласаҡ. Бының ҡасан булырын белер өсөн «Алла Батшалығы ер менән ҡасан идара итә башлаясаҡ?» тигән мәҡәләне ҡарағыҙ.
a 2015 йылда БМО-ның бар ағзалары-хөкүмәттәре тарафынан ҡабул ителгән «2030 йылға тиклем үҫешеүҙең көн повесткаһы».
b БМО-ның Аҙыҡ-түлек һәм ауыл хужалығы ойошмаһы, Ауыл хужалығы үҫешенең халыҡ-ара фонды, БМО-ның Балалар фонды, БМО-ның Бөтә донъя аҙыҡ-түлек программаһы һәм Бөтә донъя һаулыҡ һаҡлау ойошмаһының уртаҡ отчеты.
c Асылыш китабындағы дүрт һыбайлы тураһында күберәк белер өсөн «Дүрт һыбайлы. Сер асылды» тигән мәҡәләне ҡарағыҙ.
d Йәһүә — Алланың шәхси исеме (Зәбур 83:18). «Йәһүә кем ул» тигән мәҡәләне ҡарағыҙ.