Ни өсөн беҙ конгрестар үткәрәбеҙ?

Ни өсөн был кешеләрҙең йөҙҙәре шатлыҡтан балҡып тора? Сөнки улар конгрестарыбыҙҙың береһенә килгән. Үткән замандарҙа ла Алланың хеҙмәтселәре йылына өс тапҡыр бергә йыйылырға тейеш булған (Ҡанун 16:16). Беҙ ҙә бөгөн шундай осрашыуҙарҙы түҙемһеҙлек менән көтөп алабыҙ. Йыл һайын беҙҙең өс мөһим ваҡиға үтә: ике тапҡыр бер көнлөк район конгресы һәм бер тапҡыр өс көнлөк региональ конгресс. Ундай осрашыуҙарыбыҙ беҙгә ниндәй файҙа килтерә?

Улар ҡәрҙәшлек бәйләнештәребеҙҙе нығыта. Боронғо израилдәр «йыйылыштарҙа» Йәһүәне ҡыуанып маҡтағандар. Беҙ ҙә махсус осрашыуҙарҙа Аллаға бергә ғибәҙәт ҡылыуыбыҙға шатбыҙ (Зәбур 26:12; 111:1). Шундай осрашыуҙар башҡа йыйылыштарҙан һәм хатта башҡа илдәрҙән килгән ҡәрҙәштәр менән танышырға һәм аралашырға мөмкинлек бирә. Ә төш ваҡытында беҙ конгресс үткән урында ҡалып, бергәләшеп ашайбыҙ, аралашабыҙ, ҡәрҙәштәр менән танышып, яңы дуҫтар табабыҙ (Ғәмәлдәр 2:42). Конгрестарҙа беҙ бөтә ҡәрҙәшлекте берләштергән яратыуҙы үҙ күҙебеҙ менән күрәбеҙ (1 Петр 2:17).

Улар беҙгә рухи яҡтан үҫергә ярҙам итә. Израилдәр Алла ҡанунының аңлатылыуын тыңлар өсөн бергә йыйылған (Ниҡәми 8:8, 12). Беҙ ҙә конгрестарҙа Изге Яҙмаға нигеҙләнеп бирелгән өгөт-нәсихәтте ҡәҙерләйбеҙ. Һәр конгрестың программаһы Изге Яҙмаға нигеҙләнгән. Ҡыҙыҡлы телмәрҙәр һәм сәхнәләштереүҙәр аша беҙ үҙ тормошобоҙҙа Алланың ихтыярын үтәргә өйрәнәбеҙ. Был ауыр ваҡыттарҙа имандаштарыбыҙ төрлө ҡыйынлыҡтар менән осраша. Уларҙың шул ауырлыҡтарҙы еңеп сыҡҡаны тураһында ишетеү беҙҙе рухландырып ебәрә. Региональ конгрестарҙа Изге Яҙмалағы ваҡиғаларҙы йәнләндереп ебәргән һәм һабаҡ алырлыҡ костюмлы драмалар ҡуйыла. Һәр конгреста Аллаға бағышланған кешеләр һыуға сумдырыла.

• Ни өсөн конгрестар күп шатлыҡ килтерә?

• Конгресҡа барыу һеҙгә ниндәй файҙа килтерә ала?