Алла бармы?

Изге Яҙманан яуап

Эйе, бар һәм Изге Яҙмала быны раҫлаусы күп дәлилдәр килтерелгән. Изге Яҙма Аллаға иманыбыҙҙы, дини ҡараштарға һуҡыр рәүештә эйәреп түгел, ә аңыбыҙға таянып һәм «барыһын һына[п]» үҫтерергә саҡыра (1 Фессалоникаларға 5:21; 1 Яхъя 5:20). Түбәндә Изге Яҙмаға нигеҙләнгән дәлилдәр килтерелә:

• Ғаләмдәге тәртип һәм унда тереклектең булыуы Барлыҡҡа килтереүсенең барлығын күрһәтә. Инжилдә былай тиелә: «Әлбиттә, һәр йорт кем тарафынандыр төҙөлә, әммә бөтөн нәмәнең төҙөүсеһе — Алла» (Еврейҙарға 3:4). Был фекер ябай ғына булһа ла, күп белемле кешеләр өсөн ул көслө дәлил булып тораa.

• Тормош мәғәнәһен аңларға теләү һәр кемгә тыумыштан уҡ һалынған була, һәм физик ихтыяждарҙы ҡәнәғәтләндереү генә был теләкте баҫа алмай. Бына ни өсөн Изге Яҙмала рухи аслыҡ тураһында һүҙ бара. Ул физик аслыҡ түгел, ә рухи аслыҡ, һәм ул үҙ эсенә Алланы белергә, уға табынырға ынтылыуҙы ала (Матфей 4:4; Асылыш 4:11). Рухи ихтыяждарҙың булыуы Хоҙай Тәғәләнең барлығын ғына түгел, уның беҙҙе яратыуын һәм шул ихтыяждарҙы ҡәнәғәтләндереүебеҙҙе теләүен дә раҫлай.

• Изге Яҙмалағы пәйғәмбәрлектәр үҙ үтәлешенән бер нисә быуат элек яҙылған булған, һәм уларҙа әйтелгән ваҡиғалар теп-теүәл билдәләнгән ваҡытында үтәлгән. Пәйғәмбәрлектәрҙең теүәллеге һәм ентеклелеге уларҙың кеше ихтыяры менән әйтелмәгәнен күрһәтә (2 Петр 1:21).

• 

  Изге Яҙманы яҙған кешеләр ул заманда әле бөтөнләй билдәле булмаған фәнни факттарҙы белгән. Мәҫәлән, боронғо ваҡытта күптәр Ер фил, ҡыр сусҡаһы, үгеҙ йә булмаһа, башҡа берәй хайуан өҫтөндә тора тип уйлаған. Изге Яҙмала иһә, Алла «ерҙе бушлыҡҡа элеп ҡуйған», тип яҙылған (Әйүп 26:7). Шулай уҡ ерҙең түңәрәк булыуы хаҡында ла Изге Яҙмала дөрөҫ мәғлүмәт бирелгән (Ишағыя 40:22). Күп кешеләр үҙ заманынан күпкә алға киткән бындай ҡарашты Изге Яҙманы яҙыусыларҙың теүәл мәғлүмәтте Алланан алыуы менән аңлата.

• Ҡайһы бер мөһим һорауҙарға кеше яуап таба алмаһа, Алла юҡ, тип иҫәпләй башларға мөмкин. Ләкин Изге Яҙма, ундай ауыр һорауҙарға ла яуап бирә. Мәҫәлән, әгәр Алла ярата һәм барыһын да булдыра ала икән, ни өсөн һуң донъяла яуызлыҡ һәм ғазаптар шул тиклем күп? Ни өсөн кешеләр дин арҡаһында йыш ҡына яҡшылыҡ түгел, ә яуызлыҡ ҡыла? (Титҡа 1:16).