The Hiémbi hi Salômô
6 “A we nu u yé nlam iloo bôda bobasôna,
nugwéha woñ a nke hee?
A nyoñ imbe njel?
Lok, di hôla we i yéñ nye.”
2 “Nugwéha wem a nsôs i wom wé,
i homa a bi bel binunumba,
inyu jés bémba nyoo i wom,
ni inyu ket mbônji.+
3 Me yé inyu nugwéha wem,
yak nugwéha wem a yé inyu yem.+
A yé i jés mintômba i bikai.”+
4 “A nugwéha wem,+ u yé nlam kiki Tirza,*+
u yé nlam kiki Yérusalem,+
bilama gwoñ bi nsuk me kiki mintôñ mi gwét mi mi nkodba i jo gwét.+
5 Mis+ moñ ma nun bañ me,
inyule i ngéda u nun me, ñem wem u mpuñgla.
Tjôñ tjoñ di yé kiki bémba i kembee
i i nsôs dikôa di Giléad.+
6 Masoñ moñ ma yé kiki bémba i mintômba
mi mi ntip lôl i jogop,
nwominsôna mi gwé mahas,
to man ntômba wada mu a nhañ bé.
7 Mamañ* moñ ma nene mu libadô li nhô su woñ
kiki grénad le ba nkan.
8 To ibale baa ba kiñe ba yé 60,
to ibale manyaa ma yé 80,
to ibale bingond bi bôda bi yé ngandak lelaa,+
9 wada ndik nyen a yé hibeñ hiem,+ nu a gwé bé liton i nyuu.
A yé tôbôtôbô i mis ma nyañ.
Nyen a nlémél nyañ ikété bon bobasôna nyañ a bi gwal.*
I ngéda dingonda dipe di mboma nye, di nkal nye le a yé kimasoda;
yak baa ba kiñe ni manyaa ma kiñe ba mbégés nye.
10 ‘Numbe nu muda a mbai hala kiki maye ma kel,
a yé nlam kiki sôñ,*
a mbai kiki mapubi ma hiañgaa,
bilama gwé bi nsuk me kiki mintôñ mi gwét mi mi nkodba i jo gwét?’”+
11 “Me bi sôs i wom u kômôl,+
inyu tehe too bibebela bi ño i nsôsôgô,*
inyu tehe too minkôô mi wai mi nsem,
too bie bi grénad bi mpémés bisem.
12 Ibabé le me yi,
i ngôñ ini i bi boñ me le me pam ngi kôôba
i bisu bi bikak bi mintôô mi bôt* ba litén jem.”
13 “A ngond Sulam, témb ni mbus, témb ni mbus!
Témb ni mbus, témb ni mbus,
inyu boñ le di memle bilama gwoñ!”
“Inyuki ni memle bilama bi ngond Sulam?”+
“Bilama gwé bi yé wengoñle mintôñ ima mi mi nsak lôñ!”*