Kaat Matéô

21 I ngéda ba bi kôôge bebee ni Yérusalem, ba pam i Bétfagé, i Hikôa Ôlivé, Yésu a ep banigil iba,+ 2 a kal bo le: “Kena i mbai ni ntehe nyoo bisu, i ngéda ni njôp mu, n’a koba le ba ntéñ jagas ni man wé ipañ yé. Ni tiñil mo, ni lona me mo. 3 Ibale mut a mbat bé jam, ni nlama kal le: ‘Nwet a gwé ngôñ ni mo.’ I nlélém ngéda, a’ ep magas.”

4 Hala a bi bôña yaga inyu yônôs jam li pôda ni njel mpôdôl, nu a kal le: 5 “Kala ngond Siôn le: ‘Nun-ki, kiñe yoñ i yé lo i weeni,+ i gwé ñem nwee,+ i yii i ngii jagas, ñ, man jagas yaga, mbôda i lém ba ngwélél inyu nson.’”+

6 Ha nyen banigil ba bi ke, ba boñ ndik kiki Yésu a bi kal bo.+ 7 Ba lona jagas ni man wé, ba kéhi mambot map i ngii magas, a yééne mo.*+ 8 Ngandak bôt ikété limut i tek mambot map i njel,+ bape ba kidik mintjep mi bie, ba leñek nwo i nloñ. 9 I mamut ma bé bôk nye bisu, yak i bôt ba bé noñ nye, ba bé waa bé lond le: “Tohol Man David, di nsoohe!*+ Nu a nlôl i jôl li Yéhôva* a yé nsaibak!+ Tohol nye, di nsoohe, a we nu u yé nyoo i ngingii!”+

10 I ngéda a bi jôp i Yérusalem, bôt ba tison yosôna ba bé ikété liyôgbe, ba kalak le: “Njee nu?” 11 Hiki ngéda, mamut ma bé timbhe le: “Mpôdôl Yésu nu,+ nyen a nlôl i Nasaret nu Galiléa!”

12 I ngéda Yésu a bi jôp i témpel, a luhul bôt bobasôna ba bé nuñul, ba sombok ikété témpel, a kwés ki bitéblé bi bahéñha moni ’isi, yak bibeñgi bi banuñul dibeñ.+ 13 A kal bo le: “I yé ntilga le: ‘Ndap yem y’a séblana le ndap masoohe,’+ ndi bé ni nyilha yo hôk* i mintonba.”+ 14 Yak bibôk bi bôt ni bôt ba ndim ba lo i nyeni i témpel, a mélés makon map.

15 I ngéda baéga biprisi ni bayimbén ba bi tehe bihélha bi mam a bi boñ ni kiki boñge ba bé lond i témpel le: “Tohol Man David, di nsoohe!”+ Ñem u hénd bo,+ 16 ba kal nye le: “Baa u nok yom ba yé pot?” Yésu a kal bo le: “Ñ. Baa ni maa bé añ haana le: ‘U bi boñ le bibégés bi pémél i manyo ma boñge ni ma minkéñéé mi bon’?”+ 17 Kiki a nyék bo, a nyodi i tison Yérusalem, a ke i Bétania, a tégbaha u nyoo.+

18 I ngéda a bé témb i Yérusalem bikegla tutu, njal i gwel nye.+ 19 A tehe e faigé mu njel, a tiige yo bebee, ndi a koba bé matam mu, ndik tjai;+ ha nyen a bi kal yo le: “Ibôdôl nano, w’a num ha bé matam kekikel.”+ I nlélém ngéda, e faigé i kôt. 20 Kiki banigil ba ntehe hala, ba hel, ba kal le: “Lelaa e faigé i nkôt hala ngélé yada?”+ 21 Yésu a timbhe, a kal bo le: “Me nkal bé maliga le, ibale ni gwé hémle, ndi ni bana bé pééna, n’a boñ ndik bé i jam me mboñ e faigé, ndi to ni nkal yak hikôa hini le: ‘Nyodi hana, kwoo nyoo i tuye,’ hala a’ bôña.+ 22 Mam momasôna ni mbat ikété masoohe, ni ban-ga hémle, n’a kôhna mo.”+

23 I ngéda a bi jôp i témpel, baéga biprisi ni mimañ mi litén mi lo i nyeni i ngéda a bé niiga, ba kal le: “Hee kunde i nlôl we i boñ mam mana? Njee a bi ti we i kunde ini?”+ 24 Yésu a timbhe, a kal bo le: “Yak me me mbat bé jam jada. Ibale ni ntimbhe me, ha nyen m’a kal bé hee me nyôñôl kunde i boñ mam mana: 25 hee Yôhanes a bi yôñôl kunde i sôble bôt? I ngii tole yak bôt ba binam?”* Ndi ba bôdôl kalna bo ni bo le: “Ibale di nkal le: ‘I bi lôl i ngii,’ ki a’ kal bés le: ‘Inyuki ni bi hémle ni bé nye?’+ 26 Ndi ibale di nkal le: ‘I bi lôl yak bôt ba binam,’ di nkon woñi le limut li ñunup inyule bobasôna ba nyoñ Yôhanes kiki mpôdôl.” 27 Jon ba bi timbhe Yésu le: “Di nyi bé.” Yak nye a kal bo le: “To me, me nkal bé me bé hee me nyôñôl kunde i boñ mam mana.

28 “Bé ni nhoñol lelaa? Mut wada a bééna bon iba. A ke yak nu bisu, a kal le: ‘A man, ke sal len i wom u minkôô mi wai.’ 29 Ndi nunu a timbhe, a kal le: ‘M’a ke bé.’ Ndi i mbus ngéda, a tam, a ke. 30 A kôôge nu yônôs iba bebee, a kal nye nlélém jam. Nunu a timbhe le: ‘Me nke, a pua,’ ndi a ke bé. 31 Njee ipôla bo iba a bi boñ sômbôl i isañ?” Ba kal le: “Nu bisu.” Yésu a kal bo le: “Me nkal bé maliga le, bakottas ni bôda ba libambe ba mbôk bé i bisu ikété Ane Nyambe. 32 Inyule Yôhanes a bi lo, a unda bé njel telepsép, ndi ni bi hémle bé nye. Ndi bakottas ni bôda ba libambe ba bi hémle nye;+ yak i ngéda ni bi tehe hala, ni bi tam bé i mbus ngéda kayéle ni hémle nye.

33 “Emblana hihéga hipe: Mut wada a bééna disi, a bel wom u minkôô mi wai,+ a kéña wo ni lipénd, a tém waa wai,* a oñ nkum ndap;+ i mbus, a ti wo basalnwom, a ke i loñ ipe.+ 34 Kiki ngéda libumbul li matam i bi kola, a ep minkol nwé yak basalnwom le mi yôñôl nye mé matam. 35 Ndi basalnwom ba gwel minkol nwé, ba bép wada, ba nol umpe, umpe ki ba ôm wo ngok.+ 36 A témb a om ki minkol mimpe, nsoñgi wap u bé loo u bisu, ndi ba bi boñ bo nlélém jam.+ 37 Sôk i nsôk, a ep bo man wé munlôm, a kalak le: ‘B’a ti man wem lipém.’ 38 Kiki ba ntehe man, basalnwom ba kalna le: ‘Nkôdôlbum nunu.+ Loga, di nol nye, di yoñ bum yé!’ 39 Ha nyen ba gwel nye, ba leñ nye i mbus wom u minkôô mi wai, ba nol nye.+ 40 Jon, i ngéda nwet wom u minkôô mi wai a nlo, kii a’ boñ basalnwom bana?” 41 Ba kal nye le: “Kiki ba yé bibéba bi bôt, a’ lona béba tjiba i ngii yap, a ti wom wé u minkôô mi wai basalnwom bape, ba ba ga ti nye matam i ngéda libumbul li nkola.”

42 Yésu a kal bo le: “Baa ni maa bé añ ikété Bitilna le: ‘Ngok bôt ba maoñ ba bi tjél, yon i bi yila ngok likas i bisu.*+ Hala a nlôl yak Yéhôva,* hala a yé ki jam li hélha i mis més’?+ 43 Inyu hala nyen me nkal bé le, b’a héya Ane Nyambe i bééni, ba ti ki yo litén li l’a num matam. 44 Yak i mut a nkwo i ngii ngok i, a’ bugi ngéñ ngéñ.+ Ndi inyu mut ngok i nkwél, y’a nyugut yaga nye.”+

45 I ngéda baéga biprisi ni Farisai ba bi nok dihéga dini, ba yi le bon a pôdlak.+ 46 Ba bééna ngôñ i gwel* nye, ndi ba bé kon mamut woñi inyule ma bé tehe nye kiki mpôdôl.+