Amôs
3 “Emblana bipôdôl bi Yéhôva inyu nan, a litén li Israel, bipôdôl inyu lihaa jôlisôna me bi nyodna i loñ Égiptô:
2 ‘Bébotama bon me bi yi ikété mahaa ma nkoñ ’isi momasôna.+
Inyu hala nyen m’a kéés bé inyu bibéba binan gwobisôna.+
3 Baa bôt iba ba nla kiha ibale ba nyegna bé?*
4 Baa mbondo njéé i ga kônd i lipan ibale nuga i ta bé?
Baa man mbondo njéé* a yé le a hum ikété hôk yé ibale a ngwel bé nuga?
5 Baa hinuni hi yé le hi gwiya* ’isi ibale hiandi hi ta bé?
Baa hiandi hi yé le hi pa ibale hi ngwel bé to yom?
6 Ibale ba nhem hioñ i tison, baa bôt ba ga kon bé woñi?
Baa bikuu bi yé le bi kwo i tison ibale Yéhôva bé nyen a mboñ hala?
7 Inyule Yéhôva, Nwet Bayemlikok, a ta bé le a boñ jam
nye ngi yeelene bagwélél bé le bapôdôl jimb jé.+
8 Mbondo njéé i nkônd!+ Njee a’ kon bé woñi?
Yéhôva, Nwet Bayemlikok, a mpot! Numbe mpôdôl a ga pot bé?’+
9 ‘Leglana i jam lini i ngii minkum mi mandap mi Asdôd,
yak ni i ngii minkum mi mandap mi loñ Égiptô.
Kala le: “Kodbana i ngii dikôa di Samaria;+
béñgnana yubda i i yé ikété yé,
yak ni malôga ma ma yé ikété yé.+
10 Inyule ba nyi bé boñ jam li téé sép,” hala nyen Yéhôva a mpot,
“ba nyônôs minkum nwap mi mandap ni bisañ ni manola.”’
11 Jon Yéhôva, Nwet Bayemlikok, a nkal le:
12 Yéhôva a nkal le:
‘Litén li Israel li nyén i Samaria i ngii bañga binañi, ba nañlak i binañi bilam.*+
Ndi ndék bôt yon y’a tohla ikété yap,
ndik kiki ntééda mintômba a nla ndik héya makôô ma nuga ima tole pes ôô i nyo u mbondo njéé.’
13 ‘Emblana, ni béhe ki* ndap Yakôb,’ hala nyen Yéhôva, Nwet Bayemlikok, Nyambe nu mintôñ mi gwét, a mpot.
14 ‘Inyule i kel m’a sébél Israel inyu kéés nye inyu bibéba* gwé gwobisôna,+
m’a kéés ki muu ma bisesema ma Bétel;+
bitoñ bi juu li bisesema bi ga bugi, bi kwo ’isi.+
15 M’a bôk mandap ma mbéñ ni mandap ma sép.’