Bakéés
2 Añgel i Yéhôva+ i bi nyodi i Gilgal,+ i ke i Bôkim, i kal le: “Me bi nyodna bé i loñ Égiptô, me lona bé munu loñ me bi bôn basôgôlsôgôl+ banan. Me bi kal ki le: ‘Kekikel, m’a bôk bé malômbla me bi boñ lôñni bé.+ 2 Ni nlama bé boñ malômbla ni bôt ba nyééne munu loñ+ ini, ni nlama bôk muu map ma bisesema.’+ Ndi ni bi nôgôl+ bé me. Inyuki ni bi boñ hala? 3 Jon yak me, me bi kal le: ‘M’a luhul bé bo i bisu binan,+ b’a yilna bé hiandi,+ banyambe+ bap b’a yoña bé.’”
4 I ngéda añgel i Yéhôva i bi mal kal bon ba Israel bobasôna bibañga bini, bôt ba litén ba bôdôl ee makeñi. 5 Inyu hala nyen ba bi o i homa nu jôl le Bôkim,* ba ti ki Yéhôva bisesema ha homa nu.
6 I ngéda Yôsua a bi huuha bôt ba litén, hiki man Lôk Israel a bi témb i ngababum a bi kôhna inyu boñ le ba yoñ loñ.+ 7 Litén li bi gwélél Yéhôva i dilo di Yôsua tjodisôna ni i dilo tjodisôna di mimañ mi litén mi mi bi yégle i mbus nyemb Yôsua, ni mi mi bi tehe mam makeñi momasôna Yéhôva a bi bôñôl Israel.+ 8 Yôsua man Nun, ngwélél nu Yéhôva, a bi wo, a ban-ga 110 nwii.+ 9 Ba bi jô nye i nkoñ u u bé ngababum yé, i Timnat-Hérés,+ i mbok dikôa i Éfraim, i pes ñombok i hikôa Gaas.+ 10 I hiai hi bôt hini hiosôna hi bi wo, hi juba ki ni basôgôlsôgôl bap; i hiai hi bi noñ ha, hi bi yi bé Yéhôva, to mam a bi bôñôl Israel.
11 Ha nyen bon ba Israel ba bi boñ béba i mis ma Yéhôva, ba kahal bégés Baal.+ 12 Hala nyen ba bi tjôô Yéhôva, Nyambe nu basôgôlsôgôl bap nu a bi nyodna bo i Égiptô.+ Ba kahal noñ banyambe bape, banyambe ba matén ma ma bé kéña bo,+ ba ôôbak i bisu gwap kayéle ba unbaha Yéhôva.+ 13 Ba tjôô Yéhôva, ba kahal bégés Baal ni bisat bi Astarôt.+ 14 Inyu hala nyen Yéhôva a bi unbene Israel ngandak, a sem bo i moo ma mintonba le mi kadal nkus wap.+ A sem ki bo i moo ma baoo bap ba ba bé kéña bo,+ jon bon ba Israel ba bé la ha bé jôs baoo+ bap. 15 Hiki homa ba bé ke, Yéhôva* a bé kolba bo, a boñok le bikuu bi kwél bo,+ kiki Yéhôva a bi pot ni kiki Yéhôva a bi kum soñ.+ Ba bé ikété ndutu ikeñi.+ 16 Jon Yéhôva a bé a ômle bo bakéés ba ba bé sôñ bo i moo ma mintonba.+
17 Ndi ba bi tjél yak emble bakéés, ba ke libambe ni bayambe bape, ba ôôbak i bisu gwap. Ba bi pala yék ndémbél ilam i basôgôlsôgôl bap, ba ba bi nôgôl mambén ma Yéhôva.+ Ba bi boñ bé kiki bo. 18 Hiki ngéda Yéhôva a bé a ômle bo nkéés,+ Yéhôva a bak ni i nkéés nu, a bé a tohol ki bo i moo ma baoo bap dilo tjodisôna di nkéés; inyule Yéhôva a bé a kônôl bo ngoo*+ i ngéda a bé a nok njelel yap inyule bôt ba bé tééñga bo,+ ba kébék ki bo mbai.
19 I ngéda nkéés a bé a wo, ba bé ba témb ba bôdôl boñ mam mabe iloo basañ bap, ba kahal noñ banyambe bape, ba béghak bo, ba ôôbak i bisu gwap.+ Ba bi nwas bé maboñok map mabe, to ndok yap. 20 Sôk i nsôk, Yéhôva a bi unbene Israel+ ngandak, a kal le: “Hala kiki bôt ba loñ ini ba mbôk malômbla+ mem me bi boñ ni basôgôlsôgôl bap, ba ndogbene+ ki me, 21 to me m’a luhul bé litén to jada ikété matén Yôsua a bi yék i mbus nyemb yé.+ 22 Hala nyen m’a noode bon ba Israel, inyu tehe too ba ga boñ kiki basañ bap, ba ba bi noñ i njel+ me Yéhôva me bi unda bo.” 23 Inyu hala nyen Yéhôva a bi nwas le i matén ma, ma yégle mu loñ. A bi pala bé luhul mo, a bi sem bé to mo i moo ma Yôsua.