Yôsua
9 I bikiñe bi bé i pes hiôñg i Yordan,+ bi niñik mu mbok dikôa, i Séféla,* mu ngwañ wonsôna u Tuye Nkeñi,*+ i mbombom Libañ, hala wee bikiñe bi Lôk Hét, bi Lôk Amôr, bi Lôk Kanaan, bi Lôk Péris, bi Lôk Hivi ni bi Lôk Yébus;+ i ngéda gwobisôna bi bi nok i jam li bi tagbe, 2 bi kodba inyu boñ malômbla le bi jôs Yôsua ni bon ba Israel.+
3 Yak bôt ba Gibéôn+ ba bi nok i jam Yôsua a bi boñ Yérikô+ ni Ai.+ 4 Jon ba bi gwélél i likeñge lini: ba ha bijek ikété minlômbi mi bibot, ba bii nwo i ngii magas map, lôñni minlômbi mi dibôi di wai,* mi mi bi tubi ndi ba kôñôl. 5 Ba haba miñunuk mi bitamb mi ba bi kôñôl, ba haba ki miñunuk mi mambot. Mu bijek ba bi lona, i bret gwobisôna ba bi yoñ bi bi kôt, bi njum* ki. 6 I mbus, ba ke yak Yôsua i homa ba bé yééne i Gilgal,+ ba kal nye ni mimañ mi Israel le: “Di nlôl i loñ i yé haa ngandak. Soho, boña malômbla ni bés.” 7 Ndi bon ba Israel ba timbhe Lôk Hivi*+ le: “Ngo bebek ni yiine hana ipañ yés. Lelaa ni di nla boñ malômbla ni bé?”+ 8 Lôk Hivi i timbhe Yôsua le: “Di yé bagwélél* boñ.”
Yôsua a kal bo le: “Bé ni yé bonjee? Ni nlôl hee?” 9 Ha nyen ba bi timbhe Yôsua le: “A nwet wés, di nlôl i loñ+ i yé haa ngandak inyule di nti jôl li Yéhôva Nyambe woñ lipém, ni le di bi nok ngan yé lôñni mam momasôna a bi boñ i Égiptô,+ 10 yak ni mam momasôna a bi boñ bikiñe bi Lôk Amôr gwo biba bi bi bé ii pes* i Yordan, hala wee kiñe Hesbôn le Sihôn,+ ni kiñe Basan le Og,+ nu a bé a yiine i Astarôt. 11 Jon mimañ mi litén jés ni bôt ba nkoñ wés bobasôna ba bi kal bés le: ‘Yoña bijek inyu liké, ni kee i boma bo. Ni kal bo le: “D’a ba bagwélél+ banan; soho boña malômbla ni bés.”’+ 12 Mu bijek di nlona, i bret bini bi bé bi ngi légék i ngéda di bi yék mandap més inyu lo i boma bé. Ndi nano, kiki bébomede ni yé i tehe, bi nkôt, bi njum+ ki. 13 Yak i dibôi di wai* dini di bé mondo i ngéda di bi yônôs tjo, ndi nano di ntubi.+ Yak ngandak liké i mboñ le mambot més ni bitamb gwés bi ôbi.”
14 Ha nyen mimañ mi Israel mi bi yoñ* ndék mu bijek gwap; ndi ba bi bat bé Yéhôva+ mahoñol mé. 15 Jon Yôsua a bi kôp nsañ ni bo,+ a boñ yak malômbla ni bo le a ga nwas bo i niñ; yak baane ba ntôñ ba kumul bo soñ+ le ba ga tééda i malômbla ma.
16 I mbus dilo daa le ba bi boñ malômbla ni bo, mimañ mi Israel mi nok le i maliga, i bôt ba, ba nyééne ha ipañ, bebee ni bo yaga. 17 Ha nyen bon ba Israel ba bi jôp i njel, ba pam bebee ni bitison bi bôt ba. Bitison gwap bi bé Gibéôn,+ Kéfira, Béérôt ni Kiriat-Yéarim.+ 18 Ndi bon ba Israel ba bi leñ bé bo gwét, inyule baane ba ntôñ ba bi kumul i bôt ba soñ i jôl li Yéhôva,+ Nyambe nu Israel. Inyu hala nyen likoda jolisôna li bi bôdôl huñbene baane ba ntôñ. 19 Ha nyen baane ba ntôñ ba bi kal bon ba Israel le: “Di kôli bé boñ bo béba, inyule di bi kumul bo soñ i jôl li Yéhôva, Nyambe nu Israel. 20 Lana nyen di ga boñ: di ga nwas bo i niñ inyu boñ le Nyambe a unbene bañ bés, inyule di mal kumul bo soñ.”+ 21 Baane ba ntôñ ba kal ki le: “Di nwahak bo i niñ, ndi ba ga tjap tjéé, ba ap ki malép inyu likoda li Israel jolisôna.” I makidik mana mon baane ba ntôñ ba bi yoñ inyu bôt ba Gibéôn.
22 I mbus, Yôsua a sébél bôt ba Gibéôn, a kal bo le: “Inyuki ni bi lôk bés, ni kal le: ‘Di nlôl haa ngandak,’ ki le i maliga, ni nyééne bebee ni bés?+ 23 Jon ni yé ntiihege+ ibôdôl nano, n’a ba minkol ngéda yosôna, n’a tjap tjéé, ni ap ki malép inyu ndap Nyambe wem.” 24 Ba timbhe Yôsua le: “A nwet wés, inyule ba bi tibil yaga toñle bés le Yéhôva Nyambe nan a bi ti ngwélél wé Môsi oda le a ti bé loñ yosôna, a nol ki bôt ba loñ bobasôna kiki ni mba ni njôp+ mu loñ. Ni bi kônha bés woñi,+ di kon ki woñi inyu biniñ* gwés, jon di bi boñ hala.+ 25 Nano, bés bana di yé i moo moñ. Boñ bés kiki u ntehe loñge, boñ ki bés kiki u ntehe le hala a téé.” 26 Lana nyen Yôsua a bi boñ: a sôñ bo i moo ma bon ba Israel, a nwas bé to le ba nol bo. 27 Ibôdôl i kel i, Yôsua a yilha bo batjap tjéé ni baap malép inyu likoda+ li Israel, ni inyu juu li bisesema, i homa Yéhôva a ga pohol;+ i bôlô i yon ba ngi salak letee ni len.+