Kaat bisu i Miñañ
28 I mbus ngéda, David a bi kot baane ba Israel bobasôna i Yérusalem: baane ba matén,+ baane ba mintôñ, mi mi nsélél kiñe, baane ba dikôô, baane ba mbôgôl,+ baane ba batééda nkus ni bémba i kiñe+ ni i bon+ bé, yak ni bôt ba ngomin ba ndap kiñe, ni mimpémba mi bôt, ni bôt bobasôna ba ba gwé ngap+ i sal bôlô. 2 Ha nyen Kiñe David a bi telep, a kal le:
“Emblana me, a lôk kéé, a litén jem. Me bi bana ngôñ i oñ ndap le i ba linôyôi li nkuu Malômbla u Yéhôva ni kéhne makôô i Nyambe+ wés, me kôôba ki maoñ+ ma. 3 Ndi bañga Nyambe a bi kal me le: ‘We bé nyen u ga oñ ndap inyu jôl+ jem, inyule u yé mut gwét, u nkôp ki matjél.’+ 4 Ndi ki le ikété lihaa li tata, men Yéhôva Nyambe nu Israel a bi pohol le me ba kiñe Israel ngéda yosôna;+ inyule a bi pohol Yuda le a ba ñéga;+ ikété litén li Yuda, a bi pohol lihaa li tata;+ ikété bon ba tata, men me bi lémél nye le a téé me kiñe ikété loñ Israel+ yosôna. 5 Ikété bon bem bôlôm+ (inyule Yéhôva a bi ti me ngandak bon bôlôm) a bi pohol man wem Salômô+ le a yén i yééne ane i Yéhôva, a ane Israel.+
6 “A bi kal ki me le: ‘Man woñ Salômô nyen a ga oñ ndap yem ni bikotoo gwem, inyule me mpohol nye le a ba man wem, yak me m’a yila isañ.+ 7 Ibale a nyoñ makidik i noñ mambén mem ni matéak+ mem kiki a mboñ nano, m’a boñ le ane yé i nom i boga ni boga.’+ 8 Jon me yé i pot i bisu bi bon ba Israel bobasôna, ba ba yé i likoda li Yéhôva, ni i maôô ma Nyambe wés le: yoña ngéda i yéñ mambén momasôna ma Yéhôva Nyambe nan, ni nôgôl ki mo inyu boñ le ni yén munu loñge loñ+ ini, ni yigle ki yo bon banan kiki ngababum i boga ni boga.
9 “Ndi we a man wem Salômô, yéñ le u yi Nyambe nu isoñ, gwélél nye ni ñem u yôni*+ lôñni mahoñol* malam,* inyule Yéhôva a nwan miñem+ nwominsôna, a nwan ki mahoñol+ momasôna. Ibale u nyéñ nye, a ga nwas le u yi nye;+ ndi ibale u ntjôô nye, yak nye a ga tjôô we i boga ni boga.+ 10 Yi le wen Yéhôva a mpohol le u oñ ndap i i ga ba témpel. Bana makénd, u bôdôl bôlô.”
11 I mbus, David a ti man wé Salômô titii+ i libebe+ li témpel kiki ba nlama oñ jo, ni i bituñ gwé, ni i bituñ ba ntéédana gwom, ni i bituñ bi yé i ngii ndap, ni i bituñ bi kétékété, yak ni i tuñ i ngudul nkuu Malômbla.*+ 12 A bi ti ki nye titii i bikotoo+ bi ndap Yéhôva kiki ba nlama oñ gwo, ni i bikumba* gwobisôna bi bé mu mapañ, ni i matéédana* ma nkus ma ndap i bañga Nyambe, ni i bituñ ba ntéédana gwom bipubhaga,*+ yak ni i gwom gwobisôna mbuu u Nyambe u bi yeelene nye. 13 A bi ti ki nye biniigana inyu mintôñ mi biprisi+ ni mi Lôk Lévi, ni inyu minson nwominsôna mi ndap Yéhôva, ni inyu bisélél gwobisôna ba ngwélél i ndap Yéhôva; 14 a bi kal ki nye kilô i gôl yañen a nlama gwélél, hala wee gôl i kôli inyu boñ bisélél gwobisôna inyu minson nwominsôna; yak ni kilô yañen i mbéda inyu bisélél bi silba gwobisôna, ni inyu bisélél gwobisôna inyu minson nwominsôna; 15 yak ni kilô yañen inyu bitééne bi bilambe+ bi gôl, ni bilambe gwap bi gôl; kilô yañen inyu bitééne bi bilambe gwobisôna ni bilambe gwap; yak ni kilô yañen inyu bitééne bi bilambe bi silba, ni inyu hiki tééne bilambe ni bilambe gwé kiki ba ngwélél yo; 16 yak ni kilô yañen inyu hiki téblé i gôl i het ba mbii minlôñ mi bret,*+ yak ni kilô yañen i silba inyu bitéblé bi silba, 17 kilô yañen inyu nwas, inyu biséya, inyu dibôi di bañga gôl;+ yak ni kilô yañen inyu hiki man séya nu gôl; yak ni kilô yañen inyu hiki man séya nu silba. 18 A bi kal ki nye kilô yañen i bañga gôl a nlama gwélél inyu bañ juu li binjinjiñ+ lôñni yimbne i kak,+ hala wee bikérubim+ bi gôl bi bi nsambal bipapai gwap inyu hô nkuu Malômbla u Yéhôva. 19 David a bi kal le: “Woo u Yéhôva u bé i ngii yem, a bi ti ki me pék le me tila mam momasôna ma mbéda inyu oda* titii+ i ndap.”+
20 I mbus, David a kal man wé Salômô le: “Bana ñem ngui, u lédés ki, u bôdôl bôlô. U kon bañ woñi, u sehla bañ to, inyule Yéhôva Nyambe, Nyambe wem, a yé ni we.+ A ga yôi bé we, to tjôô we,+ ndi a ga ba lôñni we letee maoñ momasôna ma ndap Yéhôva ma mal. 21 Mintôñ mi biprisi+ ni mi Lôk Lévi+ mini nwon mi ga gwel minson nwominsôna mi ndap i bañga Nyambe. U gwé bôt ba bôlô ba likeñge ba ba gwé ngôñ i gwel hiki nson,+ u gwé yak baane+ ni bôt ba litén bobasôna ba ba ga boñ hiki jam u ga kal bo.”