Kaat Markô
3 Lisañ lipe Yésu a témb a jôp i ndap bibégés, mut wada a bé ha, woo u bi wo* nye.+ 2 Ndi Farisai i bé béñge yaga nye inyu tehe too a’ mélés kon u mut nu i kel sabat, le ndi ba ôm nye nsohi. 3 A kal i mut woo u bi wo* le: “Telep, lo hana ñemkété.” 4 I mbus, a bat bo le: “I kel sabat, baa i yé kunde i boñ loñge tole i boñ béba, i tohol niñ* tole i nol?”+ Ndi ba yén nwee. 5 Kiki a mal béñge bobasôna, hala a siidaha nye ñem inyule a bi tehe minledek nwap mi miñem,+ a kal i mut nu le: “Sambal woo woñ.” Kiki a nsambal wo, woo wé u mbôôp. 6 Ha nyen Farisai i pam i mbégdé, kunda yada, i bôdôl hek pék ni ntôñ u banit Hérôdé+ inyu yéñ njel i nol Yésu.
7 Ndi Yésu ni banigil bé ba yoñ njel tuye, yak limut li bôt likeñi li li bé lôl i Galiléa ni i Yudéa li noñ nye.+ 8 Limut li bôt likeñi li nyodi yak i Yérusalem, i Iduméa, i pes likôl i Yordan, lôñni i pes i Tir ni i Sidôn, li lo i boma nye inyule li bi nok ngan i ngandak mam a bé boñ. 9 Ndi a kal banigil bé le ba kôôbana nye man môñgô inyu boñ le limut li hihe bañ nye. 10 Inyule kiki a mélés makon ma ngandak bôt, ba bobasôna ba bééna bibéba bi makon ba kéña nye inyu boñ le ba tihba nye.+ 11 Yak i bôt ba bééna mimbuu mimbe*+ ba bé kwo i bisu gwé hiki ngéda ba bé tehe nye, ba londok, ba kalak le: “U yé Man Nyambe.”+ 12 Ndi ngandak ngélé, a bé tibil yaga ti bo oda le ba kal bañ bôt njee a yé.+
13 Kiki a bé bet hikôa, a sébél ba a bi pohol,+ ba noñ nye.+ 14 A pohol* 12 bôt, a ti ki bo jôl le baôma, bon ba bé lama yéga nye, bon a bé lama ep i téé likalô, 15 bon a bé lama ki ti ngui i pémés mimbuu mimbe.+
16 Bana 12+ bôt bon a bi pohol:* Simôn, nu a bi ti ki jôl le Pétrô;+ 17 Yakôbô man Sébédéô lôñni manyañ le Yôhanes (a bi ti ki bo jôl le Bôanerges, li li nkobla le “Bon ba mbambat”);+ 18 Andréa, Filipô, Bartôlôméô, Matéô, Tômas, Yakôbô man Alféô, Tadéô, Simôn mut makénd,* 19 ni Yuda Iskariôt, nu a bi sôk liibana nye.
I mbus, a jôp ikété ndap, 20 yak limut li témb li kodba, kayéle ba bééna bé to pôla i je. 21 Ndi i ngéda bôt bé ba lihaa ba bi nok hala, ba pam inyu gwel nye inyule ba bé kal le: “A nkônd njék.”+ 22 Yak bayimbén ba ba bi lôl i Yérusalem ba bé kal le: “A gwé Belsébub,* a mpémés ki mimbuu mimbe ni ngui i ñane mimbuu mimbe.”+ 23 Ndi kiki a nsébél bo ipañ yé, a pôdôs bo ni njel dihéga le: “Lelaa Satan a nla pémés Satan? 24 Ibale ane i mbagla, wee ane i, i nla bé nom;*+ 25 ibale yak ndap lihaa i mbagla, wee ndap i y’a la bé nom. 26 Nlélém jam ki, ibale Satan a njôs nyemede, a bak mbaglak, wee a nla bé nom, ndi a yé i ke i lisuk jé. 27 Ni maliga, mut to wada a nla bé jôp ikété ndap i mpémba mut inyu nip gwom gwé ibale a mbôk ndugi bé a kañ i mpémba mut u. Hala ndik nyen a nla yoñ gwom gwobisôna bi ndap yé. 28 Me nkal bé maliga le, b’a nwéhél bon ba bôt mam momasôna, to ba mboñ imbe béba, to ba nleñ imbe sol. 29 Ndi nu ni nu a nsol mbuu mpubi, a’ kôhna bé nwéhél i boga ni boga,+ ndi kogse i béba yé i nom mba ni mba.”+ 30 A bi pot hala inyule ba bé kal le: “A gwé mbuu mbe.”+
31 I mbus ha, nyañ ni lôknyañ+ ba lo, ba telep i mbégdé, ba ep mut i sébél nye.+ 32 Kiki limut li bé li yii, li ma kéña nye, ba kal nye le: “Nun-ki, nyuñ ni lôknyuñ ba yé i mbégdé, ba nyéñ tehe we.”+ 33 Ndi a timbhe bo le: “Bonjee ba yé mama yem ni lôk kéé?” 34 Ha nyen a nun i bôt ba bé ba yii, ba ma kéña nye, a kal le: “Nuna-ki! Bana bon ba yé mama yem lôñni lôk kéé!+ 35 Nu ni nu a mboñ sômbôl i Nyambe, nyen a yé mankéé nu munlôm, ni nu muda, ni mama yem.”+