Yésaya
6 I nwii Kiñe Ôsiya a bi wo,+ me bi tehe Yéhôva a yii i yééne ane i i nyôgi,+ masuk mé ma mbot ma yônôs témpel. 2 Bisérafim bi bé bi téé i ngii yé; hiki yada i bééna bipapai bisamal. Hiki sérafim i bé gwélél bipapai biba inyu hô su wé, bipapai biba inyu hô makôô mé, i gwéélak ki bipapai biba inyu puue.
3 Hiki sérafim i bé lond, i kalak maasañ le:
“Numpubi, numpubi, numpubi le Yéhôva nu mintôñ mi gwét.+
Hisi hiosôna hi yé nyonok ni lipém jé.”
4 Hiki nlondok wap* u bé boñ le makôga ma nyeñg, yak Témpel i yon ni hiida.+
5 I mbus, me kal le: “Ngoo ni me!
Me yé bebee ni nyemb,*
inyule bibép gwem bi yé nyega,
me niñ ki ikété litén li li gwé bibép bi bi yé nyega;+
ngo mis mem ma ntehe Kiñe, Yéhôva nu mintôñ mi gwét nyemede!”
6 Ha nyen Sérafim yada i bi puue, i lo i meeni; mu woo wé, i bééna likalak li nlék+ le i bi bada ni biyôñôl i juu li bisesema.+ 7 I tihba nyo wem, i kal le:
“Nun-ki! Li mal tihba bibép gwoñ.
U gwé ha bé nsohi,
yak bibéba gwoñ bi nwéhlana.”
8 I mbus, me nok kiñ Yéhôva i nkal le: “M’a om njee, njee a ga kil bés?”+ Ha nyen me bi timbhe le: “Me nunu! Om me!”+
9 A timbhe me le: “Ke kal litén lini le:
10 Boñ le miñem mi bôt bana mi yila nledek,+
loñ maôô map,+
lém yak mis map
inyu boñ le mis map ma tehna bañ,
yak maôô map ma noga bañ,
to miñem nwap mi nok bañ,
tiga le ba hielba le ndi me mélés makon map.”
11 Ha nyen me bi bat le: “Éé a Yéhôva, letee ni ngéda mbe?” A timbhe me le:
“Letee bitison bi tjiba, mut to wada a ba ha bé mu,
mandap ma bana ha bé to mut,
yak loñ i tjiba, i yégle hôlô;+
12 Letee Yéhôva a kena bôt haa,+
bebee le loñ yosôna i yégle nso kiki ñoñ.
13 “Ndi jôga jada ikété jôm li ga yégle mu; yak i jôga li, li ga tiimba lék. Litén li Israel li yé kiki e ikeñi tole soso e, i ngéda ba nkit yo, kumul i nyégle; ntjep* mpubhaga u ga pémél mu kumul i.”