Bakéés

17 Mut wada a bé yééne i mbok dikôa i Éfraim,+ jôl jé li bé le Mika. 2 Kel yada, a kal nyañ le: “I 1 100 batjañtjañ ba silba ba bi nibil we, me nok yak we u ntiihe i mut a bi nip gwo, men me gwé i silba i. Men me bi nip yo.” Ha nyen nyañ a bi kal le: “Yéhôva a sayap man wem.” 3 Mika a timbhe nyañ 1 100 batjañtjañ ba silba bana, ndi nyañ a kal le: “Ibabé set, m’a téé i silba ini ipubhaga inyu Yéhôva inyu boñ le man wem a gwélél yo i boñ ntjok ôñgba ni ñôôk ôñgba.*+ Jon m’a timbhe we i silba i.”

4 I ngéda a bi timbhe nyañ silba, nyañ a yoñ 200 batjañtjañ ba silba, a ti bo ñôô silba. Ñôô silba a bañ ntjok ôñgba ni ñôôk ôñgba;* ba bii gwo ikété ndap Mika. 5 I mut nunu le Mika a bééna ndap bisat,* a kôñôl éfôd,*+ a ôô bitérafim,*+ a téé ki* man wé wada le a yilna nye prisi.+ 6 Ha ngéda i kiñe i bé bé i loñ Israel.+ Hiki mut a bé boñ kiki a bé tehe loñge.*+

7 Mañge wanda wada a bé i Bétléhém+ i Yuda, a bé lôl i lihaa li Yuda.* Ndi a bé man Lôk Lévi+ nu a bi yén nyoo ndék ngéda. 8 A bi nyodi i tison i Bétléhém i Yuda le a yéñ homa numpe i yééne. Mu liké jé, a pam i mbok dikôa i Éfraim, i ndap Mika.+ 9 Mika a kal nye le: “U nlôl hee?” A timbhe le: “Me yé man Lôk Lévi, me nlôl i Bétléhém i Yuda, me yé i yéñ homa liyééne.” 10 Mika a kal nye le: “Yén i meeni, w’a ba kiki ntipék* ni prisi inyu yem. M’a ti we jôm li batjañtjañ ba silba hiki nwii lôñni mambot ni bijek.” Ha nyen man Lôk Lévi a bi jôp i nyeni. 11 Hala nyen man Lôk Lévi a bi neebe i yén yak Mika, mañge wanda a yila kiki man wé wada. 12 Mika a bi téé* man Lôk Lévi le a gwélél nye nson u prisi,+ a bé yééne ki i ndap Mika. 13 I mbus, Mika a kal le: “Nano, me nyi le Yéhôva a ga boñ me loñge inyule man Lôk Lévi a nyila prisi yem.”