Kaat bisu i Miñañ

23 I ngéda David a bi un ngandak kayéle a ba bebee ni nyemb,* a bi téé man wé Salômô kiñe Israel.+ 2 I mbus, a kot baane ba Israel bobasôna, biprisi+ ni Lôk Lévi.+ 3 Ba bi soñgol+ Lôk Lévi i i bééna 30 ma nwii tole iloo ha; ba soñgol bo wada wada, nsoñgi wap u pam 38 000. 4 Ikété yap, bakena nson u ndap Yéhôva ba bé 24 000, bagwélél ni bakéés+ ba bé 6 000, 5 batat manwemel+ ba bé 4 000, 4 000 di bôt dipe di bé bégés+ Yéhôva lôñni bikôkôda David a bi kélél le: “Me mboñ gwo inyu bégés Nyambe.”

6 I mbus, David a kap* bo mintôñ mintôñ+ inoñnaga ni bon ba Lévi: Gersôn, Kôhat ni Mérari.+ 7 Bon ba Gersôn le Ladan ni Siméi. 8 Bon ba Ladan le Yéhiel nu a bé ñane, Zétam ni Yôel,+ ba bé bo baa. 9 Bon ba Siméi le Selômôt, Haziel, Haran; ba bé bo baa. Baéga ba mandap ma bikôkôa ma Ladan ba. 10 Bon ba Siméi ba bé le Yahat, Zina, Yéus ni Béria. Bo ba-na ba bé bon ba Siméi. 11 Yahat nyen a bé a ñane, Ziza a noñok nye. Ndi kiki Yéus ni Béria ba bi bana bé ngandak bon bôlôm, ba bi yila ndap bikôkôa yada, ba kôhna ki nson wada.

12 Bon ba Kôhat le Amram, Izhar,+ Hébrôn ni Uziel,+ ba bé bo ba-na. 13 Bon ba Amram le Arôn+ ni Môsi.+ Ndi Nyambe a bi pohol+ Arôn ni bon bé bôlôm inyu pubus Homa a nlôôha mpubhaga, inyu ti Yéhôva bisesema, inyu sélél nye ni inyu sayap litén i jôl jé i boga ni boga.+ 14 Ndi inyu Môsi, mut bañga Nyambe, ba bi soñgol bon bé ikété litén li Lôk Lévi. 15 Bon ba Môsi le Gersôm+ ni Éliézer.+ 16 Ñane bon ba Gersôm le Sébuel.+ 17 Réhabia nyen a bé éga mbôda* Éliézer; Éliézer a bi bana bé bon bôlôm bape, ndi ki le bon ba Réhabia+ ba bé ngandak. 18 Ñéga bon ba Izhar+ a bé le Sélômit.+ 19 Bon ba Hébrôn le Yéria nu a bé ñéga, nu yônôs iba le Amaria, nu yônôs aa le Yahaziel, nu yônôs ina le Yékaméam.+ 20 Bon ba Uziel+ le Mika, nu a bé ñéga, nu yônôs iba le Isiya.

21 Bon ba Mérari le Mali bo Musi.+ Bon ba Mali le Éléazar bo Kis. 22 Éléazar a bi wo ngi man munlôm, a bi bana ndigi bon bôda. Bon ba Kis, manyañ isañ wap,* bon ba bi bii bo. 23 Bon ba Musi le Mali, Éder ni Yérémôt, ba bé bo baa.

24 I bon ba Lôk Lévi bana bon ba bi soñglana inoñnaga ni mandap map ma bikôkôa, ni baéga ba mandap map ma bikôkôa. Ba bi soñgol bon ba Lôk Lévi ibôdôl i 20 ma nwii tole iloo ha, ba tila ki môl map ikété bikaat. Bon ba bé gwel minson mi ndap Yéhôva. 25 Inyule David a bi kal le: “Yéhôva Nyambe nu Israel a nti litén+ jé noi, a ga yééne i Yérusalem i boga ni boga.+ 26 Bon ba Lôk Lévi ba ga begee ha bé lap, to yom yo ki yo ba ngwélél i nson u lap.”+ 27 Inyu hala nyen David a bi ti biniigana bi nsôk le, ba soñgol bon ba Lôk Lévi ba ba bééna 20 ma nwii tole iloo ha. 28 Bôlô yap i bé le ba hôla bon ba Arôn+ inyu nson u ndap Yéhôva, ba bé yoñ ngéda ni bikotoo,+ bikumba, ni i pubus hiki yom ipubhaga, ni nson umpe wo ki wo u u mbéda i ndap i bañga Nyambe. 29 Ba bé ti ki mahôla inyu kôôba minlôñ mi bret,*+ flawa ilam inyu likébla li bijek, mimbamba mi biôlô mi ngi-séñha,+ bikoga ba mbôm i flapan, flawa le ba mbôô,+ ni mintén mi kilô nwominsôna inyu hek i gwom bi. 30 Ba bé telep hiki kegla+ inyu ti Yéhôva mayéga ni inyu bégés nye, ba boñok nlélém jam kôkôa.+ 31 Ba bé ti mahôla hiki ngéda i mbéda le ba sémél Yéhôva bisesema bi ntul i hié i kel sabat,+ i sôñ mondo,+ ni i mangéda ma mangand.+ Nsoñgi wap u bé inoñnaga ni mambén ba bi téé inyu yap. Ba bé gwel nson hiki ngéda i bisu bi Yéhôva. 32 Ba bé gwel yak minson mi ndap libadô i likoda ni mi homa mpubhaga; ba hôlga ki lôkisañ yap, bon ba Arôn inyu minson mi ndap Yéhôva.