Yérémia

19 Haana nyen Yéhôva a mpot: “Kee yak mma dibee,+ u somb hibôi hi biték. Yoñ ki ngim mimañ mi litén ni ngim mimañ mi biprisi, 2 u kee i nsôsôgô u Man Hinom,+ i lijubul li Nwemel u mimbôak mi dibee. I ngéda u mpam nyoo, pot bibañga me ga kal we. 3 U ga kal bo le: ‘Emblana lipôdôl li Yéhôva, a bikiñe bi Yuda ni bôt ba nyééne i Yérusalem. Yéhôva nu mintôñ mi gwét, Nyambe nu Israel, a nkal le:

“‘“M’a lona bikuu hana homa nunu kayéle hiki mut a ga nok i jam li, maôô ma ga loñ nye. 4 Inyule ba bi tjôô me,+ ba ôbôs i homa nunu.+ Ba bi sémél banyambe bape bisesema hana, banyambe le to bo, to basôgôlsôgôl bap, to bikiñe bi Yuda ba bi yi bé; ba bi yônôs ki matjél ma bôt ba yé nginsohi+ hana homa nunu. 5 Ba bi oñ bahoma ba nyôgi ba Baal, inyu sem bon bap kiki sesema i ntul i hié inyu Baal;+ jam le me bi ti bé bo oda i boñ, me bi pot bé jo, li bi lo bé to me i mahoñol.”’*+

6 “‘“Inyu hala nyen nuna-ki! Ngéda y’a lo,’ hala nyen Yéhôva a mpot, ‘le ba ga sébél ha bé i homa nunu le Tôfet, to nsôsôgô u Man Hinom,* ndi nsôsôgô u Manola.+ 7 Me ga yumus bipék bi Yuda ni bi Yérusalem hana homa nunu; m’a boñ le baoo bap ba nol bo ni pansoñ, me ga sem ki bo i moo ma bôt ba nyéñ nol bo.* M’a boñ le dinuni di ngii ni binuga bi bikai bi je mim nwap.+ 8 M’a yilha i tison ini yom bilim, yom diyana.* Hiki mut a ga tagbene nyoo, ndi a tehe yo, a ga hel, nyuu i kôp nye disuhuu, a hem ki hiôa inyu bikuu gwobisôna bi nkwél yo.+ 9 M’a boñ le ba je minsôn mi bon bap bôlôm ni mi bon bap bôda; hiki wada wap a ga je minsôn mi mut wé libôk, inyule tison yap i mba nkéñék, ba ga lehel ki ñem i ngéda baoo bap lôñni bôt ba nyéñ nol bo* ba ga hék bo.”’+

10 “I mbus hala, bol hibôi i bisu bi bôt ba mba lôñni we, 11 ndi u kal bo le: ‘Haana nyen Yéhôva nu mintôñ mi gwét a mpot: “Hala nyen me ga bol i litén lini ni i tison ini, kiki mut a mbol hibee hi biték kayéle ba nla ha bé at hio; ba ga jô mim i Tôfet letee homa a nene ha bé inyu jô bôt.”’+

12 “Yéhôva a nkal le: ‘Hala nyen me ga boñ i homa nunu ni bôt bé, inyu boñ le me yilha i tison ini kiki Tôfet. 13 Mandap ma Yérusalem ni mandap ma bikiñe bi Yuda ma ga yila nyega kiki i homa nunu le Tôfet;+ ñ, i mandap momasôna ba bé bet i ngii minyôl ndi ba tinak ntôñ u gwét u ngii wonsôna+ bisesema, ba tinak ki banyambe bape makébla ma wai.’”+

14 I ngéda Yérémia a bi nyodi i Tôfet, i het Yéhôva a bi om nye i legel nwin, a bi ke a telep i kotoo i témpel Yéhôva, a kal litén jolisôna le: 15 “Haana nyen Yéhôva nu mintôñ mi gwét, Nyambe nu Israel, a nkal: ‘Me yé i lona bikuu gwobisôna me bi kal le me nlona munu tison ini ni mambai mé momasôna, inyule ba bi nai* le ba nôgôl bé lipôdôl jem.’”+