Kaat Korintô iba
3 Baa hala a yé ki nseñ le di témb di unda bé bonjee di yé? Baa i ngi bédga, kiki bôt bahogi, le di ti bé bikaat bi mbôgi, tole bé bon ni nlama ti bés bikaat bi? 2 Ngo bébomede bon ni yé kaat yés,+ ntilga ikété miñem nwés, kaat le bôt ba binam bobasôna ba ñañ, ba yik ki. 3 Inyule i yé ntiik le ni yé yaga kaat Kristô, kaat le bés bagwelnson di bi tila,+ ha ni tinti bé, ndi ni mbuu u Nyambe nu a niñ; ha i ngii dibambha di ngok bé,+ ndi i ngii dibambha di minsôn, ikété miñem.+
4 Ni njel Kristô nyen di mbôdôl Nyambe ñem i ntén unu. 5 Hala a ngwés bé kal le bésbomede di kôli yaga kal le jam jo ki jo li nlôl ni bés, ndi ngap yés i gwel nson i nya i kôli i nlôl bés yak Nyambe,+ 6 nyen a bi ti toi bés ngap i ba bagwelnson ba malômbla ma yondo+ i nya i kôli, ha bagwelnson ba mbén bé,+ ndi ba mbuu mpubi; inyule mbén i mpémés mbagi nyemb,+ ndi mbuu u Nyambe u nti niñ.+
7 Ndi mbén i i nsal nson u nkena nyemb, bibañga gwé bi bak nkédlak i ngii ngok,+ ibale i bi nene ni ngandak lipém kayéle bon ba Israel ba bi la bé bok Môsi mis inyu lipém li su wé,+ lipém li li bé lama mal, 8 baa nson u mbuu mpubi+ u nlama bé bana lipém li nloo li?+ 9 Inyule ibale mbén i i mpémés mbagi+ nôgôs i bééna lipém,+ bôô ni ngélé yañen ni nson u u nkena i telepsép?+ Ngo w’a bana lipém li nloo li! 10 Ni maliga, yak i jam li bi bôk kôhna lipém, li bi nimis lipém jé i bisu bi lipém li mbuma ñañ.+ 11 Inyule ibale i jam li bé lama mal li bi lo ni lipém,+ bôô ni ngélé yañen ni i jam li nlama yégle?+ Ngo l’a bana lipém likeñi!
12 Kiki di gwé i nya botñem ini,+ di mpot ni ngandak makénd, 13 ndi di mboñ bé kiki Môsi a bi boñ i ngéda a bi hô su wé ni libadô+ inyu boñ le bon ba Israel ba bok bañ mis inyu tehe lisuk li jam li bé lama mal. 14 Ndi ba bi la bé nok.+ Letee ni len, nlélém libadô won u ngi hôk miñem nwap i ngéda ba ñañ malômbla ma kwañ,+ inyule ni njel Kristô ndik nyen libadô li nla nyodi.+ 15 Ni maliga, letee ni len ini, hiki ngéda ba ñañ bitilna bi Môsi,+ libadô li nhô miñem nwap.+ 16 Ndi i ngéda mut a nhielba inyu bégés Yéhôva,* libadô li nyodi.+ 17 Ndi Yéhôva* a yé Mbuu;+ i homa mbuu u Yéhôva* u yéne, ha ki nyen kunde i yé.+ 18 Jon bésbobasôna, hala kiki di nhéya libadô li bak li nhô masu més, wee di bayak kiki biléman bi bi ñunda lipém li Yéhôva,* di héñha kayéle di ba i pôna i Nyambe, ibôdôl i likala li lipém jada ikepam i likala li lipém lipe,* ndik kiki Yéhôva* nu a yé Mbuu* a mboñ.+