Sakaria
9 Lipôdôl li Nyambe lini:
“Bibañga bi Yéhôva bini ikolba loñ Hadrak
inyule jis li Yéhôva li mbéñge bôt ba binam+
ni matén ma Israel momasôna.
2 Bi yé yak ikolba Hamat,+ nu a yé ipañ yé,*
bi yé ki ikolba Tir+ ni Sidôn,+ ba ba nhoñol le ba nlôôha bana pék.+
3 Tir a bi ôñôl nyemede lisolbene.*
Silba a bi kot i yé ngandak kiki lipum li biték,
yak gôl a bi kot i yé ngandak kiki ndobo i minloñ.+
4 Nuna-ki! Yéhôva a ga yoñ gwom gwé gwobisôna.
5 Askélôn a ga tehe i jam li, a kon woñi;
Gasa a ga kon woñi ngandak,
nlélém jam ni Ékrôn, inyule nu a bôdlak ñem a ga wo nyuu.
Kiñe i ga ba ha bé i Gasa,
yak Askélôn a ga bana ha bé bôt ba nyééne mu.+
6 Man linyaa nyen a ga yééne i Asdôd,
m’a mélés ki ngôk u man Filistia.+
7 M’a héya matjél mu nyo u man Filistia,
me héya yak mam ma nyega ma ma péñgi nye i masoñ,
bôt bé ba ba nyégle, ba ga ba bôt ba Nyambe wés;
a ga ba kiki ñane* ikété Yuda,+
yak Ékrôn a ga yila kiki man Yébus.+
8 M’a yééne i bisu bi ndap yem kiki ntat ndap,+
le ndi ñoo to wada a jôp bañ mu, to pam a pam bañ;
ñéga bôlô* to wada a ga tagbene ha bé mu,+
inyule nano memede me mal tehe i jam li* ni mis mem.
9 A ngond Siôn, hagak!
A ngond Yérusalem, leñek diléla!
Nun-ki! Kiñe yoñ i yé i lo i weeni.+
10 M’a tjé bikak bi gwét bi Éfraim,
ni bihosi bi Yérusalem.
Mimpihlôñgô mi bajogwét mi ga ba ha bé.
A ga añle biloñ nsañ.+
Énél yé i ga ke ibôdôl nunu tuye ikepam nuu tuye numpe,
11 Ndi we, a muda,* ni njel matjél ma malômbla moñ,
nyen m’a pémés bôt boñ ba mok mukété bee i i gwé bé malép.+
12 A bé bôt ba mok ba ni ntééda botñem, témba i lisolbene li ngui.+
Me nkal yaga we i len ini le:
‘A muda,* m’a timbhe we ngaba yoñ bisai ngélé iba.+
13 Inyule me ga nimbil* Yuda kiki me nimbil mpihlôñgô wem.
M’a ha ki Éfraim mu mpihlôñgô,*
a Siôn, m’a tinde bon bôlôm boñ,
le ba kolba bon bôlôm boñ, a Grikia;
m’a yilha ki we kiki pansoñ i njogwét.’
14 Ba ga tehe Yéhôva i ngii yap,
yak likoñ jé li ga pam kiki nwegnwek.
Nwet Bayemlikok le Yéhôva a ga hem hioñ,+
a ga tagbe ki ni bambuk ba mbebi ba ba nlôl i pes nwelmbok.
15 Yéhôva nu mintôñ mi gwét a ga sôñ bo,
ba ga tjé dibaña di ngok di baoo bap, ba yémbél ki bo.+
Ba ga yô kiki bôt le ba nyo ngandak wai;
ba ga ba kiki séya i i nyon ni wai,
ni kiki matjél ba nkôp mu makas ma juu li bisesema.+
16 I kel i, Yéhôva Nyambe wap a ga tohol bo,
inyule ba yé bémba yé, ni litén jé;+
inyule ba ga bai mu hisi hié kiki tik ngok i mbai i ngii ntut u ane.+
17 Loñge yé ñem i gwé bé minwaa,+
yak bilama gwé bi mbuma ñañ!