Bakéés

10 I mbus nyemb i Abimélek, Tôla man Pua, man Dôdô, man Lôk Isakar, a bi bôdôl tohol Israel.+ A bé yééne i Samir, i mbok dikôa i Éfraim. 2 A bi kéés Israel 23 nwii. I mbus, a wo, ba jô nye i Samir.

3 I mbus yé, Yair, man Lôk Giléad, a bi kéés Israel 22 nwii. 4 A bééna 30 ma bon bôlôm ba ba bé kil i ngii 30 ma magas, ba bééna 30 ma bitison; ba ngi séblak bitison bi le Havôt-Yair+ letee ni len, bi yé i nkoñ u Giléad. 5 I mbus ngéda, Yair a wo, ba jô nye i Kamôn.

6 Bon ba Israel ba bi témb ba boñ mam mabe i mis ma Yéhôva,+ ba bôdôl bégés Baal,+ ni bisat bi Astarôt, ni banyambe ba Aram,* ni banyambe ba Sidôn, ni banyambe ba Môab,+ ni banyambe ba Lôk Amôn,+ ni banyambe ba bôt ba Filistia.+ Bon ba Israel ba bi tjôô Yéhôva, ba bégés ha bé nye. 7 Yéhôva a bi unbene Lôk Israel, a sem bo i moo ma bôt ba Filistia ni Lôk Amôn.+ 8 I bôt ba matén ma, ba bi tét bon ba Israel, ba tééñga ki bo ngandak mu nwii u; inyu 18 nwii, ba bi tééñga bon ba Israel bobasôna ba ba bé yééne i Giléad, uu nwii u Yordan, mu nkoñ u u bé ndugi nkoñ u bon ba Amôr. 9 Bon ba Lôk Amôn ba bé yap lom Yordan inyu jôs bon ba Yuda, ba Benyamin ni ba Éfraim; Lôk Israel i bi son njonok ngandak. 10 Ha nyen Lôk Israel i bi lôndôl Yéhôva, i bat nye mahôla,+ i kal nye le: “Di bi boñ béba i mis moñ, di bi tjôô Nyambe wés, di kahal bégés Baal.”+

11 Ndi Yéhôva a bat bon ba Israel le: “Baa me bi tohol bé bé i moo ma bon ba Égiptô,+ ni ma Lôk Amôr,+ ni ma Lôk Amôn, ni ma bôt ba Filistia,+ 12 ni i moo ma bon ba Sidôn, ma bon ba Amalek ni ma bon ba Madian i ngéda ba bé tééñga bé? Me bi tohol bé i moo map i ngéda ni bi lôndôl me. 13 Ndi to hala, ni bi tjôô me, ni kahal bégés banyambe+ bape. Jon m’a tohol ha bé bé.+ 14 Kena yak banyambe ni bi pohol, ni bat bo mahôla.+ Ba tohlak bé i ngéda ni yé ikété njiiha.”+ 15 Bon ba Israel ba kal Yéhôva le: “Di bi boñ béba. Boñ bés to kii u ntehe loñge. Ndi soho, tohol ndigi bés i len ini.” 16 I mbus, ba héya bakén ba banyambe ba bé i boni, ba bôdôl gwélél Yéhôva,+ kayéle a bi neebe ha bé* le ba nok ndutu.+

17 I mbus ngéda, Lôk Amôn+ i kodba, i téé mintôñ nwap mi gwét i Giléad. Yak bon ba Israel ba kodba, ba téé mintôñ nwap mi gwét i Mizpa. 18 Bôt ba Giléad ni baane bap, ba kalna le: “Njee a ga éga bés i jôs Lôk Amôn?+ I mut nu nyen a ga ane bôt ba Giléad bobasôna.”