Bakéés

11 Yifta,+ man Lôk Giléad a bé njogwét nunkeñi; a bé man nu muda libambe wada, ndi jôl li isañ li bé le Giléad. 2 Ndi yak nwaa Giléad a bi gwélél nye bon bôlôm. I ngéda i bon bôlôm bana ba bi nañ, ba luhul Yifta, ba kal nye le: “W’a bana bé ngaba i bum i tata wés, inyule muda numpe nyen a bi gwal we.” 3 Yifta a bi ke lôkisañ ngwéé, a ke a yééne i loñ Tôb. Bôt ba ba bééna bé bibôlô ba jôp i lôñ yé, ba bôdôl kiha ni nye.

4 I mbus ngéda, Lôk Amôn i lo i jôs Israel+ gwét. 5 Kiki gwét bi bôdôl ndigi ipôla Lôk Amôn ni Israel, mimañ mi Giléad mi pala ke i loñ Tôb inyu yoñ Yifta. 6 Mi kal Yifta le: “Lo yila ñane ntôñ wés gwét, inyu boñ le di jôs Lôk Amôn.” 7 Ndi Yifta a kal mimañ mi Giléad le: “Ni bi oo me, ni luhul me i ndap tata.+ Baa nano nu ni yé ikété ndutu, nyen ni nlo i sébél me?” 8 Ha nyen mimañ mi Giléad mi bi kal Yifta le: “I jam li jon li nlona bés i weeni. Ibale u neebe i ke lôñni bés ni i jôs Lôk Amôn gwét, wen w’a ba ñane wés, bés bôt ba Giléad+ bobasôna.” 9 Yifta a kal mimañ mi Giléad le: “Ibale ni ntémbna me le me jôs Lôk Amôn, ndi Yéhôva a boñ le me yémbél gwét, m’a yila ñane nan!” 10 Mimañ mi Giléad mi kal Yifta le: “Yéhôva a ba mbôgi yés* le d’a boñ kiki u mpot.” 11 Ha nyen Yifta a bi ke lôñni mimañ mi Giléad, litén li yilha nye ñéga wap ni ñane ntôñ wap gwét. Yifta a bi tiimba bibañga gwé gwobisôna i bisu bi Yéhôva i Mizpa.+

12 I mbus, Yifta a om balegelnwin yak kiñe Lôk Amôn,+ a kal le: “Me ni we di gwééna kii* le u loo jôs me gwét i loñ yem?” 13 Kiñe Lôk Amôn i timbhe balegelnwin ba Yifta le: “Israel a bi kadal hisi hiem i ngéda ba bé lôl i Égiptô,+ ibôdôl i lép Arnôn+ ipam i lép u Yabôk, letee ni i Yordan.+ Nano, timbis hisi hi ni nsañ.” 14 Ndi Yifta a tiimba om balelgelnwin yak kiñe Lôk Amôn 15 inyu kal nye le:

“Yifta a mpot le: ‘Israel a bi kadal bé hisi hi Môab,+ to hisi hi bon ba Amôn,+ 16 inyule i ngéda ba bé lôl i Égiptô, bon ba Israel ba bi kil i ñoñ letee ni Tuye Nkôibaga,+ ba sôk pam i Kades.+ 17 I mbus, bon ba Israel ba bi om balegelnwin yak kiñe Édôm,+ i kal nye le: “Soho, nwas bés di lôô i loñ yoñ,” ndi kiñe Édôm i bi tjél. Yak kiñe Môab,+ ba bi ômle nye nwin, ndi a bi tjél. Jon bon ba Israel ba bi yén ha i Kades.+ 18 I ngéda ba bi témb ba jôp i njel, ba bi lôô i ñoñ, ba kiiña loñ Édôm+ ni loñ Môab. Ba bi kil i pes likôl i loñ Môab,+ ba yén bebee ni lép Arnôn; ndi ba bi lel bé nwaa nkoñ u Môab,+ inyule lép Arnôn won u bé nwaa nkoñ u Môab.

19 “‘I mbus, bon ba Israel ba bi om balegelnwin yak Sihôn, kiñe Lôk Amôr, nu a bé ane i Hesbôn, bon ba Israel ba kal nye le: “Soho, nwas bés di lôô i loñ yoñ letee di pam i homa+ di nke.” 20 Ndi Sihôn a bi neebe bé le bon ba Israel ba lôô i nkoñ wé inyule a bé bôdôl bé bo ñem, Sihôn a bi kot ntôñ wé gwét wonsôna, a téé wo i Yahaz, a leñ bon ba Israel+ gwét. 21 Yéhôva Nyambe nu Israel a bi sem Sihôn ni ntôñ wé gwét wonsôna i moo ma bon ba Israel; bon ba Israel ba yémbél gwét, ba yoñ disi tjodisôna i het bon ba Lôk Amôr ba bé yééne.+ 22 Hala nyen ba bi yoñ nkoñ wonsôna u Lôk Amôr ibôdôl i lép Arnôn letee ni lép u Yabôk, ibôdôl i ñoñ letee ni Yordan.+

23 “‘Yéhôva Nyambe nu Israel nyen a bi luhul Lôk Amôr inyu ti litén jé Israel+ i loñ i, nano we u nsômbôl luhul bon ba Israel? 24 Hiki yom nyambe woñ Kémôs+ a nti we, baa u nyoñ bé yo? Jon yak bés d’a luhul hiki mut Yéhôva Nyambe wés a bi luhul+ munu loñ ini. 25 Baa u nloo Balak+ man Zipôr, kiñe Môab? Baa u bi nok le a bi kolba Israel, to jôs nye gwét? 26 Ibôdôl nu bon ba Israel ba nyééne i Hesbôn lôñni minkoñ+ nwé,* i Arôer lôñni minkoñ nwé nwominsôna, ni i bitison gwobisôna bi yé bebee ni lép Arnôn, hala a yé 300 nwii nano, inyuki u bi noode bé témbna minkoñ mi mu ngéda i?+ 27 Me mboñ bé we béba, u kôli bé lo i jôs me. I len ini, Yéhôva nu a yé Nkéés,+ a kéés hop u yé ipôla bon ba Israel ni bon ba Amôn.’”

28 Ndi kiñe bon ba Amôn i bi emble bé nwin Yifta a bi ômle nye.

29 Yifta+ a bi kôhna mbuu u Yéhôva, a lôô i Giléad ni nkoñ u Manasé inyu ke i Mizpa* nu Giléad;+ a nyodi ha i Mizpa nu Giléad a ke i jôs Lôk Amôn.

30 I mbus, Yifta a bôn+ Yéhôva le: “Ibale u nsem bon ba Amôn i moo mem, 31 i mut a’ pémél i likôga li ndap yem inyu boma me i ngéda m’a lôl i gwét bi bon ba Amôn ni nsañ, m’a ti Yéhôva+ i mut nu kiki ba nti sesema i ntul i hié.”+

32 Yifta a bi ke i jôs bon ba Amôn gwét, Yéhôva a hôla nye, a yémbél bo. 33 A bi nol bo bañga linolok, a yoñ minkoñ nwap ibôdôl i Arôer ipam i Minit, 20 ma bitison, letee ni Abel-Kéramim. Hala nyen bon ba Israel ba bi bémbe bon ba Amôn.

34 Sôk i nsôk, Yifta a huu i mbai yé i Mizpa,+ ndi ngond yé yon i bi lo i boma nye, i kôdôk hingoma, i sagak! A bé pom yé man. A bééna bé man munlôm to man muda numpe, handugi nye. 35 I ngéda a bi tehe ngond yé, Yifta a pat mambot mé, a kal le: “Wééi! A ngond yem! U mpat me ñem,* inyule wen m’a sem. Me bi mal bôn Yéhôva jam, me nla ha bé héñha+ jo.”

36 Ndi ngond yé i kal nye le: “A ta, ibale u mbôn Yéhôva jam, boñ me kiki u mbôn+ nye, inyule Yéhôva a nhôla we i yémbél baoo boñ, Lôk Amôn.” 37 A kal ki isañ le: “Bôñôl me i jam lini: nwas me metama sôñ iba, le me kee i dikôa, me ee libak jem li konji, me ni mawanda mem ma bôda.”*

38 Isañ a kal nye le: “Kenek!” A ke sôñ iba ni mawanda mé i dikôa inyu ee libak jé li konji. 39 I mbus sôñ iba, a témb yak isañ, isañ a yônôs mbônga a bi boñ inyu yé.+ A bi lal bé ni munlôm niñ yé yosôna. I jam lini li bi yila lem* i loñ Israel le: 40 nwii ndi nwii, bingond bi bôda bi bé bi ke i bégés ngond Yifta, man Lôk Giléad, dilo dina hiki nwii.