Yésaya
56 Yéhôva a nkal le:
“Ni nit mbagi i téé sép,+ boña ki mam ma téé sép,
inyule ndék ngéda wee me nlona tohi,
yak telepsép yem i ga nene.+
2 Maséé ni mut a mboñ hala,
yak ni man mut nu a ntéñbe mu jam li,
a ntééda mbén i sabat, a mbôk bé yo,+
a ngwel nyemede le a boñ bañ jam libe jo ki jo.
3 Nkén mut nu a nlo i bégés Yéhôva+ a nlama bé kal le:
‘Yéhôva a ga bagal me ni litén jé.’
To nwak u nlama bé kal le: ‘Nuna-ki! Me yé ndik nwok e.’”
4 Inyule haana nyen Yéhôva a mpot inyu nwak mi mi ntééda dilo tjem di sabat, mi mi mpohol i jam li nlémél me, mi téñbege i noñ malômbla mem:
5 “Me ga ôñôl bo jél, me ti ki bo jôl ikété ndap yem ni ikété mapénd mem,
jam li li nlôôha ba nseñ iloo bon bôlôm ni bon bôda.
Me ga ti bo jôl li li ga nom i boga ni boga,
li li ga lém bé.
6 Inyu bakén ba bôt ba ba nke yak Yéhôva i sélél nye,
i gwés jôl li Yéhôva,+
ni i yila bagwélél bé;
hala wee, i bôt bobasôna ba ntééda mbén sabat, ba mbôk bé to yo,
ba téñbege i noñ malômbla mem,
7 me ga lona bo i hikôa hiem hipubhaga,+
me ga boñ le ba kon maséé ikété ndap yem masoohe.
Me ga leege bisesema gwap bi ntul i hié ni bisesema gwap bipe i ngii juu jem li bisesema.
Inyule ndap yem y’a séblana le ndap masoohe inyu matén momasôna.”+
8 Nwet Bayemlikok le Yéhôva nu a yé i kot bôt ba Israel ba ba yé nsandak,+ a mpot le:
“Handugi i bôt me bi bôk me kot, m’a kot bôt bape, me lona bo i nyeni.”+
9 A binuga bi bikai gwobisôna, loga i je,
ñ, a binuga bi bikai gwobisôna bi bi yé i lipan.+
10 Bôt bé ba faa ba yé ndim,+ to wada wap a bi tehe bé to jam.+
Bobasôna ba yé kiki ngwo i i yé mbuk, i nla bé bôs.+
Ba nhehel, ba niñi ndik ha; ba ngwés ba nke ’ilo.
11 Ba yé kiki ngwo i i mbéna je;*
ba ta ba nuak bé.
Ba yé batééda mintômba ba ba gwé bé yi.+
Bobasôna ba mboñ ndik i yom i nlémél bo;
hiki wada wap a nyéñ ndik i je bôt nseñ, a kalak le:
12 “Loga, me nke me yoñ wai,
loga di nyo maok letee di hiôô.+
Yak yani a ga ba nlélém kiki len, iloo yak len!”